Sinira ang mga ebidensya... Ex-governor, arestado sa pagkawala ng 43 estudyante

ni Justine Berganio @Overseas News | August 8, 2026

Photo: Dating gobernador ng Guerrero na si Angel Aguirre - Circulated

Inaresto ng mga awtoridad sa Mexico ang dating gobernador ng Guerrero na si Angel Aguirre matapos akusahan ng obstruction of justice at forced disappearance kaugnay ng pagkawala ng 43 estudyante noong 2014.

Ayon kay Attorney General Ernestina Godoy, lumabas sa bagong testimonya ng dalawang testigo, kabilang ang isang protected witness, na iniutos umano ni Aguirre ang pagsira sa mahahalagang ebidensiya na maaaring nakatulong upang matukoy ang kinaroroonan ng mga nawawalang estudyante.

Sinabi rin ni Godoy na unang iginiit ng mga opisyal ng estado na walang umiiral na CCTV footage ng mga estudyanteng bumiyahe sakay ng bus malapit sa mga tanggapan ng pamahalaan. Gayunman, isang testigo na matagal umanong nanahimik dahil sa banta sa kanyang buhay ang lumantad ngayong taon at nagbigay ng bagong impormasyon sa kaso.

Batay sa mga naunang international investigation, pinatay ang mga estudyante ng mga miyembro ng organized crime na nakipagsabwatan umano sa ilang pulis habang patungo ang mga ito sa isang protesta sa Mexico City.

Tatlo pa lamang sa 43 estudyante ang natukoy ang mga labi, habang patuloy na hinahanap ang iba.

Ayon naman sa Interdisciplinary Group of Independent Experts, matagal nang iniimbestigahan si Aguirre at pinatitibay ng mga bagong ebidensiya ang paniniwalang may pananagutan ang estado sa insidente. Kung hindi umano nawasak ang mga ebidensiya, mas maaga sanang natunton ang mga nawawalang estudyante.

Nauna nang itinanggi ni Aguirre ang anumang pagkakasangkot sa kaso.

---

Tinaniman ng bomba

MINIBUS SUMABOG, 2 TODAS, 14 SUGATAN 

PATAY ang dalawa katao habang 14 ang sugatan matapos sumabog ang isang minibus na nilagyan umano ng bomba sa bayan ng Jaramana, sa labas ng Damascus, Syria, nitong Huwebes ng gabi.

Batay sa paunang imbestigasyon, isang explosive device ang itinanim sa sasakyan na siyang naging sanhi ng pagsabog. Nakuhanan din ng video ang wasak na minibus na hinila palayo mula sa pinangyarihan ng insidente.

Isang residente na may tindahan malapit sa lugar ang nagsabing malakas ang pagsabog at tumama pa ang shrapnel sa harapan ng kanyang establisimyento..

Samantala, isinugod sa Mujtahid Hospital ang ilan sa mga nasugatan, kabilang ang driver ng minibus. Naganap umano ang pagsabog sa isang makitid na kalsadang puno ng mga tindahan at street vendors kaya marami ang nadamay.

Patuloy ang imbestigasyon ng mga awtoridad upang matukoy ang nasa likod ng pambobomba.

23 patay, 70 sugatan sa bumagsak na tren sa Mexico

ni Lolet Abania | May 4, 2021

Nasa 23 ang namatay habang marami ang nasugatan matapos na bumagsak ang tren na kanilang sinasakyan nang gumuho ang isang elevated metro line sa Mexico City kahapon, ayon sa mga awtoridad.

Makikitang ang carriages ay nakasabit sa overpass mula sa mga sala-salabat na kawad at kable kung saan halos nakababa na ang dulo ng tren o naka-V-shape.

“Unfortunately, there are 23 deceased, including minors,” ani Mexico City Mayor Claudia Sheinbaum.

Tinatayang nasa 70 naman ang nasugatan sa insidente, na pinakamalalang nangyari sa Mexico City sa kanilang metro line mula nang ito ay binuksan noong 1969.

Agad na rumesponde ang emergency workers upang matulungan ang mga biktima sa loob ng carriages.

Inilagay naman ng mga medics sa mga stretchers ang ibang mga nasugatang biktima, habang ang mga nasawi ay dinala sa iba’t ibang ospital.

Ayon pa sa alkalde, nangyari ang insidente matapos na ang isang section ng elevated tracks ay mag-collapse sa Olivos station bandang alas-10:00 ng gabi (0300 GMT).

Nagtungo naman ang mga kaanak ng mga biktima sa site upang alamin ang tungkol sa kanilang mga mahal sa buhay na posibleng nakasakay sa nasabing tren.

“My daughter-in-law called us. She was with him and she told us the structure fell down over them,” sabi ni Efrain Juarez sa Agence France-Presse (AFP), kung saan ang kanyang anak ay nakasama sa insidente.

Isa pang lalaki na ayaw ipabanggit ang pangalan, ang nagsabing ang kanyang kapatid na lalaki ay nakasama sa na-trap sa loob ng tren.

“He came with his wife and they managed to get her out, but he was crushed there and we don't know anything,” aniya.

Samantala, sandaling inihinto ang pag-rescue sa iba pang biktima sa dahilang maaaring bumigay nang husto ang tren.

“For now, the rescue has been suspended because the train is very weak. A crane is coming to continue the work,” ani Sheinbaum.