Number coding, suspended sa Pasko at Bagong Taon — MMDA

ni Lolet Abania | December 22, 2021

Inanunsiyo ng Metropolitan Manila Development Authority (MMDA) ngayong Miyerkules na suspendido ang number coding scheme ng mga holidays gaya ng Pasko at Bagong Taon.

Sa isang advisory ng MMDA, ang number coding scheme para sa mga provincial buses at sa mga private at public utility vehicles sa Metro Manila ay suspendido sa Disyembre 25, 2021, Sabado (Pasko), Enero 1, 2022, Sabado (Bagong Taon).

Ayon pa sa MMDA, suspendido rin ang number coding mula alas-5:00 ng hapon hanggang alas-8:00 ng gabi sa Metro Manila buses, pribadong sasakyan, at PUVs sa Disyembre 24, Biyernes (Christmas Eve), Disyembre 30, Huwebes (Rizal Day), Disyembre 31, Biyernes (New Year’s Eve).

“Ibig sabihin, ang mga sasakyang may plakang nagtatapos sa 7 at 8 na sakop ng coding tuwing Huwebes (Rizal Day); at 9 at 0 na sakop ng coding tuwing Biyernes ay maaaring bumiyahe sa mga lansangan ng Metro Manila buong araw,” pahayag ng MMDA.

26-anyos na misis, nanganak sa vaxx facility

ni Lolet Abania | August 24, 2021

Isang 26-anyos na ginang ang napaanak na lamang sa isang vaccination facility sa Makati City nitong Lunes nang hapon.

Ayon sa Metropolitan Manila Development Authority (MMDA), nagsilang ng babaeng sanggol ang ginang sa vaccination facility sa MMDA main headquarters matapos siyang dalhin ng tricycle driver na ama ng beybi sa lugar nang alas-5:27 ng hapon para humingi ng tulong.

Gayunman, habang hinihintay nila ang ambulansiya na magdadala sa ginang sa ospital, naghanda naman ang vaccination team ng isang makeshift na delivery table para makahiga ang ginang.

Pagkalipas ng 14 minuto, nanganak ang ginang ng malusog na baby girl.

Sinabi pa ng MMDA, nasa mabuting kalagayan na ang mag-ina, habang dinala na rin sila sa malapit na pagamutan.

Ayon sa ama ng beybi, dinala niya ang ginang sa isang lying-in na malapit sa Guadalupe Church subalit sarado ito kaya naisipan niyang dalhin na lamang sa vaccination facility ng MMDA.

Pinuri naman ni MMDA Chairman Benhur Abalos ang maagap na ginawa ng vaccination team para sa ginang.

Aniya, karamihan sa mga tumulong sa pagpapaanak sa naturang ginang ay naka-assign sa Road Emergency Group ng ahensiya.

Outdoor exercises sa NCR, bawal na — MMDA

ni Ronalyn Seminiano Reonico | August 10, 2021

Ipinagbabawal na sa Metro Manila ang mga outdoor exercises ngayong isinailalim ang rehiyon sa enhanced community quarantine (ECQ), ayon sa Metropolitan Manila Development Authority (MMDA).

Saad ni MMDA chairman Benhur Abalos, Jr., "Bilang panghuli, nagpasa rin kami ng resolution ngayon lang hapon na ultimo paglabas ng bahay, maski exercise, bawal na po.

“Sapagka't importante for the next two weeks, mapangalagaan ang mga nasa Metro Manila.”

Samantala, ang NCR ay isasailalim sa ECQ hanggang sa Agosto 20.