MECQ sa Metro Manila, fake news — NCRPO

ni Lolet Abania | December 20, 2020

Mariing inihayag ng National Capital Region Police Office (NCRPO) ngayong Linggo na peke ang kumakalat sa social media na diumano’y memo na isasailalim ang Metro Manila sa modified enhanced community quarantine (MECQ).

Ipinunto ni NCRPO acting director Police Brig. Gen. Vicente Danao na tanging ang Inter-Agency Task Force (IATF) ang makapagdedesisyon sa quarantine classification ng isang lugar. “Actually, it is an unsigned memo. So, definitely it is not an official document. It is only the IATF ang nag-a-announce niyan,” ani Danao.

“Kung meron po tayong sasabihin, it is just a recommendation from our part. Definitely po, 'yung lumalabas na memo is a fake news,” dagdag pa niya. Ang memo umano na nakuha ng NCRPO ay tinawag nilang “covert deployment” para sa pagpapatupad ng sinasabing MECQ sa naturang rehiyon.

Kasalukuyang nasa general community quarantine hanggang December 31 ang Metro Manila. Gayunman, ayon kay Danao, ang NCRPO ay nag-deploy ng mas maraming pulis sa mga nasabing lugar upang magpatupad ng health protocols para maiwasan ang pagkalat ng COVID-19.

Bukod dito, aniya, nagdagdag sila ng kapulisan sa iba’t ibang lugar bilang hakbang ng ahensiya sa maaaring mangyaring kriminalidad at terorismo. “Medyo naghigpit tayo ng kaunti sa ating GCQ o sa ating health protocol implementation,” sabi ni Danao.

“Hindi lang po health protocol ang atin pong ini-implement diyan kundi most of the anti-criminality and especially sa anti-terrorism,” aniya pa.

Matatandaang sinabi ni Department of National Defense (DND) Sec. Delfin Lorenzana na hindi totoo ang kumakalat na ulat na isasailalim sa MECQ ang Metro Manila, gayundin sina Department of Interior and Local Government (DILG) Sec. Eduardo Año at Joint Task Force COVID Shield commander Police Lt. Gen. Cesar Hawthorne Binag na nagsasabing walang katotohanan ang mga pahayag na ito.

Simbang Gabi puwede na, Christmas party bawal pa rin

ni Thea Janica Teh | November 30, 2020

Inirerekomenda ng mga mayors sa Metro Manila ngayong Sabado sa pamahalaan na i-extend ang general community quarantine (GCQ) sa rehiyon hanggang katapusan ng taon at bawasan ang curfew hours upang makadalo ang mga tao sa Simbang Gabi.

Ayon sa Chairman ng Metro Manila Mayors na si Parañaque Mayor Edwin Olivarez, ito rin ang paraan upang maiwasan ang gatherings sa panahon ng holiday.

Una nang sinabihan ng OCTA Research group ang mga mayors sa Metro Manila na maaaring umabot sa 1,000 kaso ng virus kada araw kung hindi papanatilihin ang community quarantine sa rehiyon.

Dagdag pa ni Olivarez, unti-unti nang nagluluwag sa mga protocol ang ilang malls at pasyalan kaya ito rin ang paraan upang maipagpatuloy pa rin ang paghihigpit at pagsasagawa ng health standard.

Bukod pa rito, napag-usapan din ng mga mayors na gawing 12:00mn hanggang 3:00am ang curfew hours upang makadalo ang mga tao sa Simbang Gabi na magsisimula sa Disyembre 16.

Samantala, ipinagbabawal pa rin ang pagsasagawa ng Christmas party sa rehiyon sa ilalim ng GCQ dahil limitado lamang sa 10 ang maaaring dumalo rito.

Metro Manila, GCQ hanggang November 30

ni Ronalyn Seminiano Reonico | October 27, 2020

Mananatili sa ilalim ng general community quarantine (GCQ) ang Metro Manila hanggang sa November 30 at iba pang lugar, ayon kay Pangulong Rodrigo Duterte sa kanyang recorded address ngayong Martes nang umaga.

Ayon kay P-Duterte, nais ng mga mayors na manatili sa ilalim ng GCQ ang National Capital Region.

Bukod sa Metro Manila, ang mga sumusunod na lugar ay isasailalim din sa GCQ simula November 1 hanggang 30:

Batangas,

Lanao del Sur

Iloilo City

Bacolod City

Tacloban City

Iligan City

Mula noong Agosto ay isinailalim na sa GCQ ang Metro Manila at ilan pang kalapit na lugar kaugnay ng hiling ng mga medical workers upang mabawasan ang lalong pagdami ng kaso ng COVID-19.