Paul, naniningil ng $3-M na utang ni Mayweather

ni MC - @Sports | September 27, 2022

Hindi pa raw nababayaran si YouTuber Logan Paul ni Floyd Mayweather Jr. sa kanilang nagdaang exhibition match noong Hunyo ng nakaraang taon.

Nagbakbakan ang dalawa sa 8-rounds bout sa isang pay-per-view event sa Hard Rock Stadium sa Florida, kung saan ay walang nanalo sa kanilang laban dahil isa lamang itong exhibition fight. Ayon kay Paul, may utang pa rin sa kanya si Mayweather mula sa naturang laban.

"He didn't pay me, I wished he paid me. I got paid a little bit, not like I should have gotten paid, no. I am out a few million," reklamo ni Paul sa Impaulsive podcast. "He probably [still owes me] between two and three [million dollars]," ani Paul.

Noong Enero unang isinambulat ni Paul na hindi pa rin siya nababayaran sa naturang exhibition match. Sumagot naman si Mayweather sa isyu na pinoproseso pa aniya ang pera.

Una ring pinaniniwalaan ni Paul na nagwagi siya sa laban. "He did not knock out a YouTuber in eight rounds. He guaranteed a knockout in our press conference. I don't know there is a world where you can take away from that fight that Floyd won," aniya.

Nagretiro si Mayweather sa professional boxing noong 2017 pero nagbalik sa ibabaw ng ring para sa mga exhibitions. Noong Linggo ay nanalo siya sa knockout sa isang exhibition fight kontra Japanese MMA fighter Mikuru Asakura sa Saitama Super Arena sa Japan

Pacman at Mayweather, nagparunggitan sa Japan

ni MC - @Sports | September 26, 2022

Nagkita ang mortal na magkaribal sa boxing na sina Manny Pacquiao at Floyd Mayweather sa press conference para sa RIZIN 38 noong Sabado sa Saitama, Japan.

Pero sa pagkakataong ito sina Pacquiao at Mayweather, na parehong nagretiro mula sa aktibong pakikipaglaban, ay hindi nagpalitan ng suntok, bagkus ay mga parunggitan sa isa't isa.

Sa Japan kasi ay makakalaban ni Mayweather si Mikuru Asakura, isang mag-aaral ni Pacquiao, sa isang exhibition bout. Magaganap ngayong araw ang laban ng dalawa.

Gayunpaman, hindi nito napigilan sina Pacquiao at Mayweather na makipagpalitan ng verbal jabs. “Nandito ako para suportahan ang aking boksingero na lalaban bukas — si Asakura Mikuru,” ani Pacquiao. “I’m so thankful na pumunta siya sa Pilipinas, sa Manila para magkaroon ng mga techniques about boxing, and train with me there. Kaya ito ay magiging isang magandang boxing exhibition laban kay Floyd.”

Sinabi ni Mayweather na si Asakura na sinanay ni Pacquiao ay gagawing mas kapana-panabik ang laban. “Mas exciting na nakapunta siya sa Pilipinas at humingi ng payo kay Manny,” sabi ni Mayweather.

Nanindigan si Mayweather na walang nakakaalam kung paano siya tatalunin, maging si Pacquiao na nadaig ng Amerikano noong lumaban sila noong 2015. “Tulad ng sinabi ko noon, walang blueprint kung paano talunin si Mayweather,” wika ng mayabang na mamang itim.

Nakatakda ring lumaban si Pacquiao sa isang exhibition bout laban sa Korean martial artist na si DK Yoo sa Disyembre.

Diamante, nagreyna sa 7 event, most bemedalled sa Novice Swim

ni MC - @Sports | September 26, 2022

Nadomina ni Nicola Queen Diamante ang anim sa pitong event na nilahukan para tanghaling ‘most bemedalled’ swimmer sa pagtatapos ng 1st Novice Swim Championship sa maulang Linggo sa Teofilo Ildefonso swimming pool sa Rizal Memorial Sports Complex (RMSC) sa Malate, Manila.

Nakopo ni Diamante, isang miyembro ng RSS Dolphines Swim Team, ang girls 11-yrs old class A 25-meter free style sa oras na 14.30 segundo, butterfly (14.80), backstroke (16.30), breastroke (21.40), 50-meter freestyle (30.40), at 100-m Individual medley (1:29.40).

Hindi nakumpleto ni Diamante ang isang sweep sa grassroots development program ng Congress of Philippine Aquatics, Inc. (COPA) na pinamumunuan ni Batangas solon Eric nang masilat sa tunggalian laban kay Alex Pasia ng Sharknado Swimming Team sa ang 100-m freestyle (45.80) sa tiyempong 1:09.10.

Noong nakaraang buwan sa Reunion swimfest ng COPA, itinanghal din si Diamante na top swimmers tangan ang apat na gintong medalya sa Class A 100-m butterfly (1:21.30); 100-m backstroke (1:24.70); 100-m freestyle (1:11.00) at ang 200-m back (3:04.90).

“Masayang masaya po ako at nagpapasalamat sa COPA dahil tuloy-tuloy ang tournament nila sa mga kabataan tulad ko. Mas gagalingan ko pa po sa susunod. Medyo maginaw na kanina kaya hindi ko na masyadong nakahirit,” pahayag ni Diamante, patungkol sa malakas na hangin at bahagyang pag-ulan dala ng bagyong ‘Karding.

Idineklara ng weather bureau ang signal No.3 sa Maynila bandang hapon ngunit masuwerte ang organizers na natapos ang event pagkatapos ng lunch break. “Inagahan nga namin after we receive the info about the signal warning. Pasalamat naman kami at natapos ng maaga at napauwi natin ang lahat bago pa bumuhos ang ulan. Hindi na kami nag-awarding, abot na lang 'yung mga medals,” pahayag ni technical director head Richard Luna.

Sinabi ni COPA Board member Chito Rivera na inaasahan niya ang malaking partisipasyon ng public school student habang inihayag ang planong doblehin ang bilang ng mga kalahok sa susunod na tournament -- ang Reunion 3rd leg swim challenge sa Oktubre 22-23.