Diaz, ikakampanya ang Pinay lifters sa Bogota

ni MC - @Sports | October 12, 2022

Pangungunahan ni Tokyo Olympics gold medalist Hidilyn Diaz ang kampanya ng bansa sa International Weightlifting Federation World Championships na nakatakda sa Disyembre 5 hanggang 16 sa Bogota, Colombia.

“Isasama sa aming mga babaeng lifter para sa World Championships sa Colombia ang aming pambatong si Hidilyn Diaz,” sabi ni Samahang Weightlifting ng Pilipinas (SWP) president Monico Puentevella.

Ito ang magiging unang kompetisyon para kay Diaz, kasama ang pinakasalan na strength at conditioning coach na si Julius Naranjo noong Abril pagkatapos ng kanyang ginintuang pagsisikap sa Hanoi Southeast Asian Games noong nakaraang Mayo.

Itinatanghal ng bansa ang best of the best na kinabibilangan ng Asian champion at SEA Games gold winner na sina Vanessa Sarno, Tokyo Olympian Elreen Ando, ​​Kristel Macrohon at Rosegie Ramos. Kasama rin sa roster sina Lovely Inan, Nestor Colonia, John Ceniza at John Pacaldo.

Sinabi ni Puentevella na nagpadala lamang sila ng dalawang kinatawan na sina Rose Jean Ramos at Fernando Agad sa nagpapatuloy na Asian Championships sa Manama, Bahrain para tumutok sa Bogota tilt. “We skipped the Asian, para makasali tayo sa World this December. Ang Olympics ang pangunahing layunin natin,” aniya.

Si Ramos, nakababatang kapatid ni Rosegie, ay nakakuha ng tanso sa Manama sa kabila ng pagiging pinakabatang kalahok na 16 taong gulang.

Fighting Maroons, nakahabol sa panalo; Pacman, nage-ensayo na

ni Gerard Arce / MC - @Sports | October 5, 2022

Naitakas ng University of the Philippines Fighting Maroons ang isang pambihirang come-from-behind victory laban sa Adamson University Soaring Falcons sa overtime sa pamamagitan ng 87-78 sa ikalawang laro ng quadruple-double kahapon sa 85th season ng University Athletic Association of the Philippines (UAAP) men’s basketball sa Philsports Arena sa Pasig City.

Pinagtulungan nina Malick Diouf at Zavier Lucero ang Fighting Maroons para kunin ang ikalawang sunod na panalo na bumangon mula sa 16-puntos na pagkakalubog sa first half. Lumista ng 13-4 blast ang Katipunan-based squad sa additional period kabilang ang apat na puntos ni Diouf at matinding block upang maiselyo ang panalo na kinailangang maghabol mula sa 16-puntos na kalamangan.

Tumapos ang season 84 Finals MVP na si Diouf ng 13pts, 12 rebounds, 4 assists, 4 blocks at 3 steals sa 5-of-7 shooting, habang nanguna sa puntusan si Lucero sa 15pts, 7 rebounds, 4 assists, at 1 steal.

Samantala, itinaas ni Manny Pacquiao ang level ng kanyang boxing training sa pagsisimula ng kanyang gym work bilang paghahanda sa kanyang exhibition bout laban kay DK Yoo ng South Korea sa Disyembre.

Sa ilang mga video, ipinakita ng retiradong boxing champion at dating senador ang paghataw sa punching bag at paggawa ng mitt work sa kanyang gym sa General Santos City.

Nakatakdang labanan ni Pacquiao si DK Yoo sa isang charity match sa Disyembre 11.

Pumayag ang dating senador na labanan ang Koreano kung saan ang kikitain nito ay gagamitin para sa pagtatayo ng bahay ng mga walang tirahan sa Pilipinas.

Pumirma rin si Pacquiao sa isang kasunduan para makalaban ang kanyang dating sparring partner na si Jaber Zabayani ng France sa Pebrero sa susunod na taon.

Indonesian Police, kakastiguhin sa mga nasawi sa soccer riot

ni MC - @Sports | October 6, 2022

Nasa hot seat ngayon ang Indonesia National Police dahil sila ang pangunahing nagsimula ng malubhang trahedya ng stampede sa pagtatapos ng laro ng football sa East Java province noong Sabado kung saan ang paghahagis ang mga awtoridad ng tear gas para i-disperse ang mga tao ay bawal sa international governing body ng soccer-FIFA.

Kitang-kita sa video footage na na-upload sa social media ng mga saksi sa loob ng Kanjuruhan stadium sa siyudad ng Malang na naghagis ng tear gas ang mga pulis sa maraming tao sa stands at sa mga fans na nagra-riot sa loob ng pitch nang matalo ang local soccer club na Arema FC mula sa karibal na Persebaya Surabaya.

Libu-libong bystanders ang naapektuhan ang mga mata at lalamunan mula sa nalanghap na gas kaya nag-unahan ang mga ito sa pagtakbo sa exits at doon nagsimula ang malagim na stampede. Nakita rin sa footage na nakasusi ang mga exits kaya nag-panic at puwersahang binubuksan ito ng marami.

Sa labas ng stadium galit na galit ang maraming supporters kaya sinunog ang ilang patrol car. Naiulat na may aktuwal na 125 katao ang nasawi at ayon sa pulisya rito ay hindi 174 na unang naireport dahil nadoble ang bilang kasama na ang mga kababaihan, bata at 2 pulis.

May 21 ang malubhang nasugatan habang 300 ang dumanas ng minor injuries.

Ang Kanjuruhan incident ay ikatlo na sa pinakamalagim na trahedya sa world soccer history. Noong 1964, may 328 katao ang nasawi sa labanan ng Peru at Argentina sa Estadio Nacional. Habang sa Ghana, may 126 katao ang namatay sa isa pang stadium stampede noong 2001.