Scottie at Kai, pa-kondisyon na, referees sa FIBA, well trained

ni MC / VA @Sports | August 19, 2023

Maibalik sa kanilang "game shape" sina Scottie Thompson at Kai Sotto ang pinagsisikapan nina Gilas Pilipinas head coach Chot Reyes Bago sumabak ang koponan sa una nitong laban kontra Dominican Republic sa opening day ng 2023 FIBA World Cup sa Agosto 25 sa Philippine Arena.

Noon lang nakaraang Linggo nagsimulang mag-ensayo muli sina Thompson at Sotto para sa Gilas makaraang mabigyan ng go-signal ng doktor matapos nilang maka-recover sa kanilang injuries.

"Last Sunday, kumpleto nang lahat, full contact, no limitations and no restrictions," pahayag ni Reyes.

Bagamat parehas ng maayos ang kondisyon ng dalawang mga manlalarong nabanggit , ayon kay Reyes ay iba pa rin 'yung makita ang totoo nilang kondisyon 'pag nasa aktuwal na laro na they are in decent shape, ang aktuwal na game shape ay iba pa rin.

"That remains to be seen. Iba ang kondisyon sa practice, iba 'yung conditioning sa laro. All the rest I'm very confident that they're in competitive game shape already," wika pa ng national basketball team tactician.

Si Thompson ay nagtamo ng metacarpal injury habang si Sotto ay may iniindang back spasms. Uumpisahan ng Gilas ang kampanya sa FIBA World Cup sa pagsagupa nito sa Dominican Republic sa opening day sa 55,000-seater Philippine Arena sa Bocaue, Bulacan.

Sunod nilang kakalabanin ang Angola sa Agosto 27 at ang Italya sa Agosto 29 na parehas gaganapin sa Araneta Coliseum sa Quezon City.

Ang FIBA World Cup 2023 ay may mga referees na trained at handa na tiniyak ng Pre-Competition Clinic (PCC) mula August 19 - 22 sa Quezon City.

TIniyak sa kanilang training program na ang 4 na game officials ay nasa tip-top shape, isang linggo bago ang world meet.

Mahigit naman sa 1,000 volunteers ang itatalaga ng Samahang Basketbol ng Pilipinas (SBP) Local Organizing Committee sa kabuuang kaganapan ng FIBA Basketball World Cup 2023, ayon kay SBP president Al Panlilio.

Pingol, una sa kampeonato ng Dream's Run sa 3x3 Women's

ni MC @Sports | August 17, 2023

Lumutang ang husay ni Kaye Pingol sa Uratex Dream’s run ng WMovement’s First 3x3 Elite Invitational Tournament championship noong Linggo sa Veacon Hope Sports Center sa Caloocan City.

Si Pingol, ang no. 6 ranked ng bansa sa women's 3x3 player ay nagsalpak ng 15 puntos para sa kabuuang 21-14 finals win laban sa Titans.

At para sa tournament MVP, lahat ay nakapokus siya sa layunin sa kabila ng pagdaranas ng pagkatalo sa final group stage game. "Laban lang. Yun lang ang nasa isip namin. Kahit natalo kami dun sa huling laro namin sa group stage, alam naming na may pag-asa pa rin kami at kailangan lang bumawi,” ayon kay Pingol.

Nakatulong kay Pingol si Sam Harada na tumapos ng 6 na puntos, isa rito ang game-clinching free throw para ganap na maiuwi ang P25,000 cash prize.

Pinuri ni Team owner Peachy Medina ang pagsisikap ng kanyang team kabilang na ang laro nina Mikka Cacho at Tina Deacon. “Talagang ipinakita ng girls 'yung character nila kaya we’re very proud of them. Kahit may mga na-injure sa kanila, hindi sila nag-give up,” saad ni Medina. Binigyang kredito rin niya ang lahat ng teams na lumahok sa torneo.

Tinalo ng Uratex ang My Philippines tungo sa semifinals, 18-10, nang manguna sila sa Pool B leaders na pinamumunuan nina Clare Castro, Allana Lim, Raiza Palmera-Dy, at Monique del Carmen.

Nangunguna sa Titans sa kabilang banda sina Snow Penaranda na may 7 puntos kasama sina Hazelle Yam, Mary Joy Galicia, at Khate Castillo nang iuwi ang P15,000.

Sa semis, tinalo ng Titans ang Lady Macbeth Riots sa semifinals, 21-15. Nanguna sa Macbeth sina national team members Afril Bernardino, Malia Bambrick, Gabi Bade, Louna Ozar, at Camille Nolasco.

Eala kampeon sa W25 Roehampton, Gilas Pilipinas kontra Ivory Coast

ni MC @Sports | August 15, 2023

Nasungkit ni Alex Eala ng Pilipinas ang ikalawang kampeonato ng season at ikaapat na overall sa ITF Women's World Tennis Tour sa W25 Roehampton sa Great Britain noong Linggo.

Ginapi ng 18-year-old sixth seed si WTA World No. 166 at No. 2 seed Arina Rodionova ng Australia, 6-2, 6-3, sa National Tennis Centre. Tagumpay na idinagdag ng 250th-ranked Eala sa listahan ng kanyang professional titles ang korona mula sa 2023 W25 Yecla sa Spain, 2022 W25 Chiang Rai sa Thailand, at 2021 W15 Manacor sa Spanish island ng Mallorca.

Patungo sa kanyang final, tinalo ni Eala ang tatlong Australian bago winalis si 3rd seed at 208th-ranked Arianne Hartono sa semifinals, 7-6(4), 2-6, 6-1. Sinipa ng Rafa Nadal Academy player ang 201st-ranked top seed Priscilla Hon sa quarterfinals (6-2, 6-4), World No. 289 Destanee Aiava sa second round (3-6, 7-5, 6-3), at World No. 781 qualifier Gabriella Da Silva Fick sa first round (6-3, 6-4).

Samantala, makakasagupa ng national men’s basketball team na kilala rin bilang Gilas Pilipinas ang koponan ng Ivory Coast sa isang tune-up game ngayong darating na Biyernes-Agosto 18 sampung araw bago magsimula ang International Basketball Federation (FIBA) 2023 World Cup sa Agosto 25. Idaraos ang tune up match ng world no.42 Ivory Coast at ng Gilas sa Philsports Arena sa Pasig City ganap na alas-8 ng gabi.

Isa sa 16 na African team na nag-qualified sa World Cup, kabilang ang Ivory Coast sa Group G kung saan kasama nila at makakatunggali sa group stage ang World no.1 Spain, no.13 Brazil at no.22 Iran.

Pangungunahan ang Ivory Coast ng kanilang playmaker na si Sire Dieng nagtala ng average na 10.1 puntos at 2.7 assists sa African World Cup qualifiers. Mayroon ding tatlong manlalaro ang koponan na may taas na 6-foot-8.