Sa Abril 1... P320 rebate para sa mga kostumer ng Maynilad

ni Lolet Abania | March 31, 2022

Magbibigay ang Maynilad Water Services Inc. ng P320 rebate sa kanilang mga kostumer na labis na naapektuhan ng water service interruption noong mga nakaraang buwan simula bukas, Abril 1.

Ito ay matapos na patawan ng penalty ng Metropolitan Waterworks and Sewerage System Regulatory Office (MWSS-RO) ang Maynilad dahil sa matagal at mahabang araw na kawalan ng serbisyo ng tubig noong Disyembre hanggang Pebrero.

Batay sa datos ng Maynilad, mahigit sa 200 barangay na mula sa Las Piñas, Muntinlupa, Parañaque, Pasay at ilang lugar sa Cavite ang matinding naapektuhan ng water service interruption dahil sa mababang produksiyon ng tubig mula sa Putatan Water Treatment Plant.

Ayon sa Maynilad, umabot sa 198,000 kostumer ng mga naturang barangay ang mabibigyan ng rebate na may kabuuang halaga na P63.3 milyon.

Binanggit naman ni MWSS-RO chief Patrick Lester Ty na posibleng dumoble pa ang rebate kung hindi maaayos ng Maynilad ang problema sa loob ng tatlong buwan.

“After the penalty, they have 180 days to fix things or they can be penalized again. If they do not fix things within 180 days, dodoble ang penalty,” pahayag ni Ty.

Bagama’t nasolusyunan na ng Maynilad ang unang naipataw na penalty ng MWSS-RO, may ilang lugar pa rin na kanilang nasasakop at pinagseserbisyuhan ang nakararanas ng water service interruption o mahinang suplay ng tubig.

Ayon kay Ty, hindi sapat na dahilan ang kakapusan ng suplay ng tubig upang hindi makasunod ang Maynilad sa kanilang service agreement.

“Just because there’s water shortage, that does not mean that they cannot be penalized for the water quality, for their failure to comply with the schedule. There are other service obligations that need to comply with even if they need to conserve water,” giit pa ni Ty.

Caloocan at Cavite, patuloy na walang suplay ng tubig – Maynilad

ni Lolet Abania | March 14, 2022

Patuloy na makararanas ang mga kostumer ng Maynilad Water Services Inc. ng water service interruption dahil sa mabilis na pagkonsumo ng tubig at tinatawag na high turbidity level ng suplay nito.

Sa interview ngayong Lunes kay Maynilad spokesperson Jennifer Rufo, sinabi nitong apektado ang mga residente sa Caloocan sa bahagi ng norte hanggang Cavite sa bahagi ng south, mula alas-10:00 ng gabi hanggang alas-6:00 ng umaga.

“Yes po. Tuloy-tuloy po siya. Bale pinipilit po nating gawing off-peak lang po ‘yung interruptions para bigyan po tayo ng pagkakataon na punuin ‘yung ating mga reservoir in time for peak demand the following day,” paliwanag ni Rufo.

Ayon kay Rufo, tumataas ang kinokonsumong tubig ngayon dahil sa mainit na panahon, habang ang tubig sa reservoirs ay mas madaling maubos kaysa karaniwan.

Aniya pa, sa southern part gaya ng Muntinlupa, ang suplay ng tubig mula sa Laguna Lake ay limitado na rin dahil sa spikes naman ng turbidity.

Gayunman, sinabi ni Rufo na nagsasagawa na ang Maynilad ng mga treatment facilities at naglalagay na rin ng mga deep wells para makadagdag ng suplay ng tubig sa kanilang mga kostumer.

Nitong Sabado, nag-anunsiyo ang Maynilad ng water service interruptions ng hanggang Marso 16, kung saan ayon kay Rufo, posibleng ma-extend pa ito.

Ang Maynilad ay nagseserbisyo sa mga kostumer na nasa mga lungsod ng Caloocan, Las Piñas, Makati, Malabon, Manila, Muntinlupa, Navotas, Parañaque, Pasay, Quezon, Valenzuela.

Gayundin, sa ilang lugar sa Cavite gaya ng mga lungsod ng Bacoor, Cavite, at Imus, at sa mga bayan ng Kawit, Noveleta at Rosario.

Wala nang VAT simula Marso 21.. Maynilad at Manila Water, bawas-singil sa kostumer — MWSS

ni Lolet Abania | March 3, 2022

Asahan ng mga kostumer ng Manila Water Company Inc. at Maynilad Water Services Inc., ang mababang singil habang ang value added tax (VAT) ay aalisin na sa billing system ng dalawang kumpanya ng tubig, ayon sa Metropolitan Waterworks and Sewerage System-Regulatory Office (MWSS-RO) ngayong Huwebes.

Sa isang virtual press briefing, sinabi ni MWSS-RO chief regulator Patrick Ty na ang sumusunod na passage ng kani-kanyang congressional franchises ng Maynilad at Manila Water, ang water services charges ng mga water distribution utilities ay hindi na subject para sa 12% VAT simula Marso 21, 2022.

“The changes will result in a reduction in Maynilad and Manila Water customers’ monthly water bills,” sabi ni Ty. Gayunman, sa halip na VAT, ang water services ng mga kumpanya ng tubig ay subject sa 2% ng iba pang percentage tax o national franchise tax (NFT) at ang aktuwal na rate ng local franchise tax (LFT) na ipinatutupad ng mga local government units (LGUs). Ang NFT at LFT ay magre-reflect bilang tinatawag na “government tax” sa mga water bills ng mga kostumer simula Marso 21.

“The MWSS-RO remains committed to ensuring the availability, accessibility, and affordability of water supply in the East and West Concessionaire areas,” pahayag ni Ty.

Ang Manila Water ay nagsusuplay ng tubig at wastewater services sa mga residente ng mga Lungsod ng Makati, Mandaluyong, Pasig, San Juan, Taguig, at Marikina; at Municipality ng Pateros. Sakop din nito ang southeastern parts ng Quezon City, at Sta. Ana at San Andres ng Lungsod ng Manila.

Sa lalawigan ng Rizal, siniserbisyuhan din nito ang Lungsod ng Antipolo, at mga munisipalidad ng San Mateo, Rodriguez, Cainta, Taytay, Teresa, Angono, Baras, Binangonan, Jalajala, Cardona, Morong, Pilillia, at Tanay.

Habang ang Maynilad ay nagsusuplay ng tubig at wastewater services sa mga residente sa maraming bahagi ng Lungsod ng Manila; northern at western parts ng Quezon City; western parts ng Makati City; at sa mga Lungsod ng Caloocan, Pasay, Parañaque, Las Piñas, Valenzuela, Muntinlupa, Navotas, at Malabon sa Metro Manila.

Siniserbisyuhan din nito ang mga munisipalidad ng Kawit, Noveleta, at Rosario, gayundin sa mga Lungsod ng Bacoor, Cavite, at Imus sa Province of Cavite.