Misa para sa Pista ng Poong Nazareno, tuloy, 4 na lugar sa Maynila, ilalaan

ni Thea Janica Teh | January 4, 2021

Maglalaan ng 4 na area ang lokal na pamahalaan ng Maynila para sa mga debotong dadalo sa Misa sa Quiapo Church sa Kapistahan ng Poong Nazareno sa Enero 9.

Ayon kay Mayor Isko Moreno, pinayagan nito ang pagbubukas ng ilang area bilang konsiderasyon sa mga debotong gustong dumalo sa pista sa kabila ng nararanasang pandemya.

Aniya, “Doon naman sa dadako sa ating area sa Quiapo, we will make Villalobos, Carriedo, Hidalgo and Plaza Miranda available sa excess sa loob ng simbahan kasi may maximum requirement.”

Nitong Linggo, inanunsiyo ni Quiapo Church Spokesperson Fr. Douglas Badong na may ilang tradisyon ang hindi isasagawa sa araw ng kapistahan tulad ng prusisyon, salubong at pahalik upang maiwasan ang pagkalat ng COVID-19.

Bukod pa rito, inanyayahan din ni Fr. Badong ang lahat ng gustong dumalo sa misa na mas mabuting pumunta na lamang sa kani-kanilang parish church imbes na pumunta pa sa Quiapo Church.

Nag-request na rin umano ang pamunuan ng Quiapo Church sa lokal na pamahalaan ng Maynila na isara ang ilang kalsada kabilang ang southern part ng Quezon Boulevard upang makapagbigay-daan sa mga deboto.

Samantala, sinabi rin ni Moreno na mamamahagi sila ng face shield at face mask sa Quiapo Church.

Kahit nasa loob ng bahay... Gagamit ng paputok, ikukulong!

ni Lolet Abania | December 31, 2020

Nagbigay ng babala sa mga residente ng Maynila si Mayor Isko Moreno na sinumang mahuhuling gumagamit ng mga paputok o anumang uri ng fireworks ay aarestuhin ng mga awtoridad, kahit pa nasa loob ng kanilang bahay.

"We are always certain about our rules. While it is true that we're trying to be diplomatic as much as possible by asking o paghihikayat, but kung nilalabag po, marami pong police na naka-deploy sa buong Maynila, at maraming posibleng mahuli dahil huhulihin po talaga," ani Moreno sa kanyang briefing ngayong Huwebes.

Sinabi ni Moreno na nararapat na ang lungsod ng Maynila ay makapagdiwang ng Bagong Taon nang mapayapa.

"But then again, we will. Marami pong pulis, huwag ninyo na pong subukin. Wala pong piskalya ngayon, 'pag nahuli kayo ng pulis sa violation ng mga batas, naku, Diyos ko, biruin ninyo, unang linggo ng taon, nasa oblo (loob) kayo," sabi ng alkalde.

Matatandaang nagkaisa ang mga Metro Manila mayors na ipagbawal ang paggamit ng lahat ng uri ng paputok ngayong holiday season, kasabay ng pagpasa ng isang resolusyon para rito.

Ang mga siyudad ng Valenzuela, Marikina, Navotas, Parañaque, Muntinlupa, Quezon City ay nagpasa na ng mga ordinances para ipagbawal ang firecrackers sa kanilang lugar, habang ang Caloocan City ay nag-isyu ng memorandum sa mga barangay chairmen para ipaalala ang nasabing ban.

Gayunman, may ilang local government units (LGUs) na sinasabing maglalagay na lamang sila ng patakaran tungkol dito kabilang na ang Mandaluyong City.

Gamit nang rapid test kits, natagpuang nakakalat sa kalsada ng Maynila

ni Lolet Abania | September 2, 2020

Nagdulot ng takot sa mga residente ng Maynila ang nagkalat na gamit nang rapid test kits sa Barangay 453, Dela Fuente corner Loyola Streets, Sampaloc Manila, kagabi, Martes.

Agad na rumesponde ang lokal na pamahalaan ng Manila sa sumbong at inutusan ni Mayor Isko Moreno na linisin ang nagkalat na gamit na rapid test kits sa lugar, na sinasabing nanggaling sa isang magbabasura na nagbibisikleta mula sa Espana.

Ayon kay Department of Environment and Natural Resources (DENR) Usec. Benny Antiporda, dapat na maging maingat at responsable ang lahat sa pagtatapon ng basura, lalo na pagdating sa ganitong bagay.

“May treatment storage at disposal facilities na pinaglalagyan ng hazardous waste. Mayroon kaming ipinamamahaging mga kulay na trash bin para i-identify as household health care waste,” sabi ni Antiporda.

Gayunman, inaalam pa ng awtoridad kung saan nanggaling ang mga gamit na rapid test kits na nagkalat sa kalsada.

“Aalamin natin kung ano ang pinakamalapit na kumpanya sa lugar na gumagamit ng rapid test kits. Titingnan din natin kung may pananagutan ang barangay sa nangyari,” sabi pa ni Antiporda.