Montemayor sa MPTC Stage 3, Russian individual winner

ni Elyssa Nichole @Sports | May 2, 2026

Photo: Stage 3 winner si #44 Emmanuel Montemayor ng  Go-for-Gold Philippines sa oras na 03:23:09 sa MPTC Tour of Luzon kahapon. (mptcpix)

Palayan City -  Ipinakita ni Emmanuel Dave Montemayor ng Go for Gold Philippines ang tikas sa kaskasan matapos nitong dominahin ang Stage 3 ng MPTC Tour of Luzon kahapon na nagtapos sa Nueva Ecija.

Nakasabay ni 24-year-old Montemayor na tumawid sa meta ang teammate nitong si Marc Ryan Lago pero nahirang na Stage winner ang una sa inirehistrong tatlong oras, 23 minuto at siyam na segundo sa 140.1 km. New Clark City - Palayan City habang pumangalawa ang huli.

Dumating na tersero ang isa pang Pinoy rider na si Sumiso Basalan ng Excellent Noodles Cycling Team habang pang-apat si Russian rider Nikita Shulchenko mula sa LCW UAE Cycling Team.

Naagaw naman ni Shulchenko ang overall Individual General Classification sa teammate niyang si  Yousef Ibrahiem Alrefai.

Kasama si Alrefai sa peloton ng dumating sila sa finish line pero lumanding ito sa 27th place kaya nalaglag ito sa No. 2 sa IGC sa event na suportado ng Metro Pacific Tollways Corp., Manny V. Pangilinan Group of Companies at Philippine Sports Commission.

Umakyat sa No. 3 sa IGC si Montemayor, 2 minuto at apat na segundo ang lamang sa kanya ng magsusuot ng yelow jersey na si Shulchenko.

Ang mga nasa top 10 sa IGC ay sina Basalan, Mervin Corpuz ng 7-Eleven Cliqq Roadbike Philippines, Antoine Huby (7RP), Dave Eeron Cangayao ng Standard Insurance Philippines, Ronilan Quita (7RP), Douglas Tyler Hannay ng Excellent Noodles at Rench Michael Bondoc (G4G). 

Samantala, nabawi naman ng Go for Gold ng tutok sa Team General Classificaion, pangalawa ang 7Eleven Cliqq Roadbike Philippines habang Pangatlo ang Standard Insurance Philippines.

Tugawin Team umangkla sa Stage 2, Seoul una sa TTT

ni Elyssa Nichole @Sports | May 1, 2026

Photo: Ang Excellent Noodles ang nasa unahan sa Team General Classification matapos ang Stage 2 ng MPTC Tour of Luzon 2026 kahapon. (tolpix) 

Matapos ang dalawang araw na padyakan ay naagaw ng Excellent Noodles ang unahan sa Team General Classification matapos ang Stage 2 ng MPTC Tour of Luzon 2026 na nagsimula sa Clark Parade Grounds at nagtapos sa New Clark City Athletics Stadium sa Capas, Tarlac.

Pinagwagian ng Seoul Cycling team ang 43km Team Time Trial Stage 2 na pinamunuan ni multiple national ITT winner at Tour of Korea champion Min Kyeong Ho, ipinasa nilang tiyempo ang 56 minuto at 35 segundo.

Pangalawa ang Excellent Noodles Cycling team na inirehistro ang 57 minuto at 08 segundo sapat upang maagaw ang unahan ng Team Classification.

Sampa sa podium ang powerhouse Standard Insurance Philippines kung saan inirehistro ang 57 minuto at 30 segundo para sa third place.

May kabuuang 15 oras, 31 minuto at 54 segundo sa general classification ang Excellent Noodles umakyat sa second place ang Standard Insurance Philippines habang ang dating nangunguna na Go-for- Gold ay lumagpak sa pangatlo matapos dumating na pang-anim sa Stage 2.

Ina-angklahan ni Ryan Tugawin ang Excellent Noodles Cycling team, kasama niya sina Joseph Javiniar, Mar Sudario, Jomar Camingao, Umiso Basalan, Ramon Christopher Dela Cruz at Stage 1 third placer Tyler Hannay.

Ilalarga ngayong araw ang 145km Stage 3 Clark papuntang Palayan, Nueva Ecija kung saan ay may 2 Sprints at 1 KOM (Cat.3).      

UAE Cycle team angat agad ang lakas sa Tour of Luzon

ni Elyssa Nichole @Sports | April 30, 2026

Photo: Ang mga Stage 1 Individual Classification Podium Winners na (mula kaliwa) #126 Alrefai, Yousef Ibrahiem (LCW),  #123 Shulchenko, Nikita (LCW) at #57 Hannay, Douglas Tyler (ENCT) sa MPTC Tour of Luzon mula Calatagan, Batangas hanggang Tagaytay City kahapon. (tolpix)  

Tagaytay City - Naparamdam agad ng lakas ang mga foreign riders matapos sikwatin ni Syrian rider Alrefai Yousef Ibrahiem ng LCW UAE Cycle team ang panalo sa Stage 1 ng MPTC Tour of Luzon 2026, kahapon.

Halos sabay na dumating sa finish line sina Alrefai at kakamping Nikita Shulchenco, inirehistro nila ang tiyempong 3 oras, 36 minuto at 35 segundo sa 143.7 kms. na nagsimula sa Calatagan, Batangas at nagtapos sa Praying Hands sa Tagaytay City.

Pero nakalamang sa oras si 19-year-old Alrefai dahil sa makukuhang bonus bilang stage winner sa event na suportado ng MVP Group at Philippine Amusement and Gaming Corp. katuwang ang National Sports Tourism Inter-Agency Committee.

Tumersero ang pambato ng Excellent Noodles na si Douglas Tyler Hannay ng Great Britain, naungusan siya ni Ibrahiem ng may 1 minuto at 56 segundo.

Dalawang Pinoy riders mula sa Go for Gold ang umupo sa fourth at fifth placers, ito'y sina Jericho Jay Lucero at Rench Michael Bondoc ayon sa pagkakasunod.

Lumanding naman si Joo sa sixth place na inamin na halos lahat ng mata ay nakatuon sa kanya sa simula pa lang ng karera. “Everybody was watching me,” ani Joo.