Salano at Camacho champ uli sa Trilogy Run

ni Anthony E. Servinio @Sports | June 3, 2024

Sina Maricar Camacho at Richard Salano, ang mga nagkampeon ng Half-Marathon sa 2024 HOKA Trilogy Run Asia Leg 2 kahapon sa Mall of Asia. (A. Servinio)

Umulit bilang kampeon si pambansang atleta Richard Salano habang balik sa panalo si beterana Maricar Camacho sa ikalawang yugto ng 2024 Hoka Trilogy Run Asia Manila Leg Linggo ng umaga sa Mall of Asia. Pinaspasan ng dalawa ang 21.1 kilometrong daan at sundan ang kanilang mahusay na ipinakita sa unang yugto ng serye noong Abril 7 sa parehong lugar. 

Mahigpit na nagbantayan sina Salano, James Kevin Cruz at Eduard Flores hanggang nakababa sila ng Buendia Flyover papuntang Cultural Center.  Doon ay nagpasya na humataw ni Salano sa nalalabing 5 kilometro at unang nagtapos sa oras na 1:13:53 habang pangalawa si Cruz (1:14:05) at pangatlo si Flores (1:14:28). 

Iba ang naranasan ni Camacho na pumangatlo lang sa Leg One at hawak niya ang liderato mula simula hanggang katapusan sa oras na 1:32:57.  Malayo na ang mga humahabol na sina Jennelyn Isibido (1:35:18) at Maria Joanna Abutas (1:37:18). 

Si Southeast Asian Games Triathlon gold medalist Kim Mangrobang ang nag-reyna sa 10 km  sa oras na 40:44 at sinamahan sa entablado nina Mea Gey Ninura (42:27) at Jessa Mae Roda (42:48) na nagkampeon sa 16 kilometro sa Baguio Leg One noong Mayo 5.  Nanaig sa mga kalalakihan sina kampeon ng Manila Leg One James Darell Orduna (32:51), Edgar Lee Jr. (34:23) at Jaspher Delfino (37:40). 

Isa pang pambansang atleta sa Obstacle Course Seannah Swift ang panalo sa 5km sa 21:27 habang pangalawa at pangatlo sina Joneza Mie Sustituedo (23:45) at Jyzel Gabriel (30:03).  Kampeon sa mga lalake si Mark Angelo Riagtan (17:31) na dinaig sina Karl Oxales (18:14) at Evelou Abutas (18:28).

Ang iba pang Leg 2 ay nakatakda sa Cebu (Hunyo 9), Baguio (Hulyo 7), Bacolod (Hulyo 28) at Cagayan de Oro (Setyembre 15).  Magbubukas pa lang ang serye sa Davao ngayong Hunyo 16 at ang Leg Two nila ay sa Agosto 25.    

Valencia Champ Allali, abangan sa Manila Int'l Marathon 2024

ni Anthony Servinio @Sports | February 9, 2024

Humandang masaksihan ang pinakamabilis na karera sa kasaysayan ng Pilipinas sa parating na Manila International Marathon 2024 ngayong Pebrero 24 sa Quirino Grandstand. Isang pulutong ng banyagang mananakbo sa pangunguna ni Nasser Allali ng Pransiya ang determinadong magtala ng bagong marka para sa makasabog-bagang 42.195 kilometro.

Umoras ang Montreal 1976 at Moscow 1980 Olympic gold medalist Waldemar Cierpinski ng Silangang Alemanya ng 2:14:39 sa unang edisyon ng patakbo noong 1982 at hanggang ngayon ay nananatiling matatag ang marka.

Ang alamat na si Eduardo “Vertek” Buenavista ang may hawak ng pambansang marka na 2:18:44 na naabot niya noong 2004 sa Japan.

Sariwa pa si Allali sa pagtakbo sa malupit na Valencia Marathon noong nakaraang buwan sa Espanya. Kahit nagtapos siya ng ika-86, nagtala siya ng bagong personal na marka na 2:17:06.

Ang oras ng Pranses ay tiyak na mas matindi kung ihahambing sa mga pambatong Pinoy at mga Aprikanong naninirahan sa bansa na hindi makalapit sa marka ni Cierpinski. Handa nilang harapin ang hamon ng tinatayang mahigit 50 mga bisita na magmumula sa mga kapitbahay sa Timog Silangang Asya, Hong Kong, Macau, India, Amerika, Alemanya, Netherlands at Belgium.

Magiging malaking tulong ang halos patag na ruta na daraan ng kahabaan ng Roxas Boulevard at Gil Puyat hanggang Ayala Triangle. Maliban sa Full Marathon, magkakaroon din ng karera sa 21, 10 at limang kilometro.

Ayon kay race organizer at beteranong mananakbong si Dino Jose, panahon na upang magkaroon ng bagong marka para sa Marathon. Umaasa rin siya na ito ang magiging daan upang makaakit ng mas marami at mas malalakas na banyagang kalahok sa 2025.

Ginaganap ang pagpapalista online sa manilamarathon.com. Maaari ring magpalista sa ECYY Sports Hub sa 126 Pioneer Street, Mandaluyong City at KolourPro sa Scout Santiago kanto ng Scout Limbaga, Quezon City hanggang Pebrero 16.

Manila Int'l Marathon babalik sa Pebrero 2024

ni Anthony E. Servinio @Sports | October 24, 2023

Magbabalik ang isa sa pinamakasaysayang karera sa Pilipinas, ang "Manila International Marathon: Run For Awareness", sa Pebrero 24, 2024. Asahan ang isang mabilis at kalidad na takbuhan sa patag na daan na magsisimula at magtatapos sa Rizal Park at iikot din sa mga lungsod ng Pasay, Paranaque at Makati.

Ayon kay race organizer Dino Jose sa kanyang panayam sa BULGAR Sports Beat podcast, espesyal ang parating na karera at bahagi ng malilikom na pondo ay mapupunta sa mga sundalo na nakadestino sa BRP Sierra Madre sa Ayungin Shoal sa West Philippine Sea. May nakalaan din na tulong para sa Philippine Coast Guard.

Upang maangat ang kalidad, makakalahok ng libre ang mga mananakbong may patunay na umoras sila na hindi lalampas ng 2:35:00 at may diskwento ang mga may oras na mas mababa sa tatlong oras. Ito ay limitado sa unang 200 lamang.

Maliban sa Marathon, may mga karera din sa 21, 10 at limang kilometro. Ginaganap na ang pagpapalista online sa manilamarathon.com hanggang Pebrero 21, 2024 o umabot ng 5,000 kalahok kung ano man ang mauna.

Lahat ng mga magtatapos ng ay tatanggap ng medalya, t-shirt at regalo mula sa mga sponsor. Ang mga kampeon ng kalalakihan at kababaihan ay kakatawanin ang Pilipinas sa Taiwan International Marathon sa Nobyembre, 2024.

Ang 1982 Manila International Marathon ang unang karerang Pinoy na kinilala ng AIMS, ang samahan ng mga malalaking patakbo sa buong mundo. Noong taon na iyon, nagkampeon si 1976 at 1980 Olympic gold medalist Waldemar Cierpinski ng Silangang Alemanya sa oras na 2:14:27 na hanggang ngayon ay ang pinakamabilis na Marathon na itinakbo sa Pilipinas.

Nais ni Jose at kanyang mga kasama Manuel Oyao at Race Director Red Dumuk na mabuhay muli ang sigla ng takbuhan gaya noong simula ng Dekada 80. Ang tatlo ay may malawak na karanasan sa pag-organisa ng mga karera noong panahon na iyon at handang gamitin ito upang hubugin ang bagong henerasyon.