Iwas-kotong — LTO.. Paniniket, digital na

ni Jeff Tumbado | January 31, 2023

Target ng Land Transportation Office (LTO) na gawing automated o digital na ang paniniket ng lahat ng law enforcers nito sa buong bansa simula sa susunod na linggo.

Alinsunod na rin ito sa direktiba ni Pangulong Bongbong Marcos, na ipatupad ang digitalization sa ahensya.

Ayon kay LTO Chief Assistant Sec. Jay Art Tugade, ipamamahagi na sa mga law enforcer ng ahensya ang Law Enforcement Handheld Mobile Device na gagamitin para sa pagbibigay ng electronic Temporary Operators’ Permit (e-TOP).

Ibig sabihin, hindi na gagamit ng manual na TOP na karaniwang ibinibigay sa mga indibidwal na may paglabag sa batas-trapiko.

Dagdag ng LTO Chief, ang mga paglabag sa batastrapiko na ipapasok sa mga handheld device ay hindi na maaaring baguhin pa.

Sa pamamagitan ng digital na paniniket, maiiwasan din umano ang kotong.

Sakali namang maisapinal na ng LTO ang cashless payment feature ng mga law enforcement handheld mobile device, pupuwede nang makapagbayad ng multa gamit

ang credit card o load wallets ang mga may traffic violation.

Ang mga law enforcement handheld mobile device ay mayroong camera at fingerprint scanner para magamit ng mga LTO traffic enforcer sa pagberipika kung peke o totoo ang ipiniprisintang driver’s license.

Maaari rin nilang gamitin ang camera bilang face recognition scannerMayroon ding dalawang mobile data SIM cards ang nasabing aparato upang magkaroon ng internet connectivity at makapagpadala ng datos sa LTO online system.

Gayunman, kahit walang mobile connectivity o offline, makakapagbigay pa rin ito ng

traffic violation ticket.

Driver ng SUV na bumundol sa guwardiya ng mall, tukoy na; hearing sa Hunyo 7 — LTO

ni Lolet Abania | June 6, 2022

Nag-isyu na ang Land Transportation Office-National Capital Region (LTO-NCR) ngayong Lunes ng umaga ng isang show cause order laban sa driver ng SUV na sangkot sa hit-and-run ng isang guwardiya ng mall sa Mandaluyong City na naganap nitong Linggo ng hapon.

Ito ang kinumpirma ni LTO-NCR Regional Director Atty. Clarence Guinto sa isang radio interview, kung saan aniya, naitakda ang hearing sa Martes, Hunyo 7.

“We scheduled the hearing this week and hopefully the driver and the owner would appear in the hearing. We are, of course, observing due process, ‘yung notice of hearing,” sabi ni Guinto.

Nagpapagaling naman ang biktimang security guard na si Christian Joseph Floralde sa ospital sa Mandaluyong matapos na ma-hit and run ng isang SUV habang nagdi-direct ito ng trapiko.

Unang sinabi ng Mandaluyong Police na isang White Toyota RAV 4 na may plate number NCO 3781 ang sangkot sa insidente ng hit-and-run, na naganap bandang alas-4:00 ng hapon nitong Linggo sa intersection ng Julio Vargas Avenue at St. Francis St. sa Mandaluyong, at subject para sa validation ng LTO.

Hindi naman pinangalanan ni Guinto ang suspek na driver ng SUV dahil aniya sa Data Privacy Law, subalit sinabi niyang isa itong Pilipino. Gayundin, dinedetermina pa ng LTO kung ang driver ay siya ring may-ari ng sasakyan.

Pinasalamatan naman ni Guinto, ang mga netizens na nag-upload ng video ng naturang insidente. Ayon kay Guinto, ang pinakamataas na penalty na maaaring maibigay ng LTO laban sa suspek na driver ay revocation ng driver’s license nito.

“May isang high resolution video cam na na-identify ‘yung plate number so we were able to get the details in our system ng kung sino ang may-ari ng motor vehicle na ‘yun,” sabi ni Guinto.

Ayon naman kay Mandaluyong Police chief Col. Gauvin Unos, ang driver ng SUV na bumundol at sumagasa pa sa guwardiya ng mall, kung saan nakuhanan din ng video ang insidente at nag-viral sa social media ay posibleng sampahan umano ng kasong frustrated murder.

Samantala, sinabi ng partner ni Floralde na si Arceli Flores, nahihirapan umano ang biktima na huminga dahil sa tinamong pinsala sa gitnang bahagi ng kanyang katawan.

Kasalukuyang binigyan ang biktima ng oxygen support, habang nagtamo rin ng mga sugat sa kanyang ulo.

LTO, SSS, at Pag-IBIG Fund… Ilang ahensiya ng gobyerno nagluwag sa pagpoproseso ng mga dokumento

ni Jasmin Joy Evangelista | January 17, 2022

Nagluwag sa pagpoproseso ng mga dokumento ang LTO, Social Security System at Pag-IBIG Fund ngayong panahon ng pandemya.

Ang LTO, pinalawig din ang bisa ng mga lisensiya.

“Ang mga mag-eexpire ng January extended iyan hanggang March, 'yung mag-expire ng February, extended hanggang April at yung March, extend hanggang May, at kung kailangan i-extend ng mas mahaba pa gagawin natin yan," ani LTO chief Edgar Galvante.

“Ang ibang ibang offices ng LTO na naka locate sa mga mall, nagsasara iyan mga 7 p.m. even on Saturdays. Kung bukas iyong mall, bukas rin iyong LTO office," dagdag niya.

Ang validity ng temporary operators permit, student permit, conductor's license at medical certificates na tatapat ang expiration sa Enero, Pebrero, at Marso ay pinalawig din.

Extended naman ang renewal ng mga sasakyang nagtatapos sa 1 ang plaka, hanggang Pebrero.

Tuluy-tuloy naman ang transaksiyon sa SSS sa kabila ng pagkakasakit ng ilang tauhan nito.

“Kaya nakikiusap po kami sa ating mga miyembro, sa ating mga employer, gamitin po natin iyong online facility para safe tayo and also makatulong din tayo doon sa pagsugpo nitong paglaganap ng COVID," ani SSS Public Affairs and Special Events Division head Fernando Nicolas.

Nilinaw din ng ahensiya ang maaaring mag-apply ng sickness benefit claim.

"Kahit anong klaseng sakit iyan kahit na flu or Covid or ano pa ba, basta po nagkaroon kayo ng sakit at hindi nakapasok ng apat na araw, at least 4 days, minimum of 4 days, kayo po ay pwede mag file ng sickness benefit claim sa SSS," ani Nicolas.

Magpapatuloy din ang serbisyo ng Pag-IBIG Fund ayon kay Atty. Kalin-Lei Franco-Garcia, na Vice President for Public Relations and Info Servces.

“Ang PAG-IBIG fund po ay nag-ooffer pa rin po ng 100 percent full service po sa aming mga branches. Ine-encourange po namin na mag online po sila, tulad po ng SSS, karamihan po ng aming services ay available na online, kahit po yung mine-mention ko na housing loan application na drop box lang, puwede na rin po iyon online," ani Franco-Garcia.

Para sa mga inquiries at concerns, maaaring makipag-ugnayan sa LTO, SSS, at Pag-IBIG sa kani-kanilang hotline numbers at social media accounts.