Fixer, dumami — LTO.. Online exam sa renewal ng lisensya, aalisin na

ni Mai Ancheta | June 10, 2023

Upang maiwasang mabiktima ng mga fixer, pinag-aaralan ng Land Transportation Office (LTO) na alisin na ang online comprehensive examination para sa mga magre-renew ng lisensya.

Ayon kay LTO officer-in-charge Hector Villacorta, hindi niya makuha ang lohika kung bakit kinakailangan pang mag-exam kapag magre-renew ng lisensya.

Hindi naman aniya nababawasan ang kaalamam sa pagmamaneho para muling mag-exam.

Ang sistemang online comprehensive examination aniya ay nagiging bentahe para sa mga fixer dahil maraming mga driver lalo na ang nasa public transport ang hindi gaanong marunong gumamit ng computer at inaalok ng hanggang P2,000 para ang mga fixer na ang sumagot at umayos sa kanilang online examination.

OFWs, una sa plastic license card — LTO

ni Madel Moratillo | June 2, 2023

Prayoridad ng Land Transportation Office (LTO) na mabigyan ng plastic drivers’ license cards ang mga papaalis na mga overseas Filipino workers (OFWs).

Sa Laging Handa Public Briefing, sinabi ni LTO officer-in-charge Hector Villacorta na ito ay para magamit ng mga OFW bilang government ID ang driver’s license.

Sa ngayon, nasa 53,000 na plastic driver’s license ang natitira sa LTO.

Sabi ni Villacorta, pinalawig na ng LTO ang validity ng mga expired na lisensya hanggang sa Oktubre 31.

“Sa ngayon ay nakatutok tayo sa urgent, iyong dalawang problema na inumpisahan nitong discussion na ito – iyong lack of license cards and plates of motor vehicles. 53,000 na lang nga iyong ating license cards eh ang solusyon diyan is in-extend natin iyong mga existing up to October 31 at iyon nga, iyong 53,000 priority muna iyong mga migrant workers,” pahayag ni Villacorta.

Ipapakiusap na lamang nila sa mga traffic enforcers na ang validity ng expired na lisensya ay hanggang sa Oktubre 31.

Una nang inanunsyo ng LTO na malapit nang maubos ang plastic card kung kaya papel na muna ang ilalabas na lisensya.

LTO Chief Tugade, nag-resign

ni Jeff Tumbado | May 23, 2023

Ang hindi pagkakasundo sa pagitan nina Department of Transportation (DOTr) Secretary Jaime Bautista sa pamamalakad sa Land Transportation Office (LTO) ang dahilan umano ng pagbibitiw bilang hepe ng ahensya ni Assistant Secretary Atty. Jose Arturo Tugade.

Bagama't hindi direktang sinabi ay binanggit na lamang sa mensahe ni Tugade na layunin nitong mabigyang laya si Bautista na maaksyunan ang ilang suliranin sa nabanggit na tanggapan.

Ani Tugade, sa pagbibitiw niya sa LTO, mabibigyan ng pagkakataon ang kalihim na pumili ng tao na nararapat na mamuno sa iniwan niyang tanggapan.

Ilan sa mga usapin sa kanilang opisina ang kakapusan ng card para sa lisensya at kakulangan ng plates para sa numero ng mga sasakyan. Naglabas din ng pahayag si Bautista at pinasalamatan si Tugade sa serbisyo nito.