Nasangkot sa road rage... Criminology student, binawian ng lisensya

ni Jeff Tumbado @News | June 18, 2026

Photo: LTO

Tuluyang binawi ng Land Transportation Office (LTO) ang pribilehiyo sa pagmamaneho ng isang criminology student na sangkot sa viral road rage incident sa Vergara Highway sa Cabanatuan City noong Hunyo 5, 2026.

Ayon sa LTO, napatunayang nagkasala ng reckless driving at pagmamaneho habang nasa impluwensya ng alak ang estudyante matapos ang isinagawang imbestigasyon at pagdinig.

Ipinataw ng LTO ang perpetual disqualification na nagbabawal sa naturang estudyante na makakuha ng anumang uri ng lisensya sa pagmamaneho sa hinaharap.

Bagama’t hindi personal na dumalo ang respondent sa pagdinig, ibinatay ng ahensya ang desisyon nito sa kanyang sinumpaang salaysay na isinumite sa pamamagitan ng kanyang kinatawan, kasama ang iba pang ebidensiyang nakalap.

Sa kanyang salaysay, inamin ng estudyante na nakainom siya ng alak bago magmaneho at humingi ng paumanhin sa kanyang naging asal.

Inamin din niya na siya ang makikita sa viral na video na bumaba ng kanyang sasakyan at paulit-ulit na sinipa at inatake ang isang truck habang nagaganap ang komprontasyon.

Binigyang-diin ni LTO Chief Assistant Secretary Markus V. Lacanilao na hindi kukunsintihin ng ahensya ang anumang paglabag sa batas-trapiko na naglalagay sa panganib sa publiko, kabilang na ang mga paglabag na ginagawa ng mga estudyanteng driver.

800 lisensya, sinuspinde, binawi ng LTO

ni Jeff Tumbado @News | June 14, 2026

Photo: File / LTO

Mahigit 800 driver's license ang sinuspinde at tuluyang binawi ng Land Transportation Office (LTO) sa pinahigpit na patakaran ng ahensya.

Ayon kay LTO Chief Assistant Sec. Markus Lacanilao, simula Oktubre 2025 nang simulan ang paghihigpit bilang bahagi ng kampanyang palakasin ang disiplina sa kalsada at matiyak ang kaligtasan ng publiko.

Nabatid na 434 na lisensya ang kanilang binawi habang 396 naman ang sinuspinde mula nang maupo si Lacanilao sa kanyang posisyon.

Sa kabuuang 434 na binawing lisensya, 325 ang kinansela sa loob ng dalawang taon, 15 ang pinatawan ng apat na taong kanselasyon, 94 naman ang tuluyan nang binawi.

Nag-iimprenta ng LTO license, pinatatalupan

ni Mylene Alfonso @News | May 21, 2026

Photo: LTO / File

Nagpasaklolo na sa National Bureau of Investigation (NBI) ang grupong Flag Maharlika upang imbestigahan ang Dermalog, ang IT service provider ng Land Transportation Office (LTO) na responsable sa pag-iimprenta ng driver’s license.

Ayon sa grupo, may access umano ang Dermalog sa mahahalagang rekord at printing system ng LTO, base sa Ombudsman Resolution na inilabas noong 2022. Nakasaad din sa ulat na kaya umanong mag-imprenta ng lisensya ang provider kahit hindi ito matunton ng LTO, kabilang na sa labas ng Pilipinas.

Lumabas din sa imbestigasyon na kailangang makipag-ugnayan pa sa empleyado ng Dermalog sa Malaysia para sa ilang proseso ng sistema.

Dahil dito, inirekomenda noon ng LTO Technical Working Group na i-blacklist ang kumpanya sa mga susunod na bidding.

Bukod sa umano’y paglabag sa Anti-Graft and Corrupt Practices Act at Government Procurement Reform Act, isinama rin sa reklamo ang posibleng paglabag sa Cybercrime Prevention Act dahil sa illegal access, data interference, at system interference.