E-driver’s license, start na

ni Mai Ancheta @News | July 14, 2023

Sisimulan na ng Land Transportation Office (LTO) ang pag-iisyu ng electronic driver's license matapos ipalabas ang implementing guidelines para sa digitalization ng ahensya.

Batay sa inilabas na LTO Memorandum Circular No. HAV-2023-2410, lahat ng may valid driver's license ay mabibigyan ng access sa eDL module.

Ayon kay LTO Officer-in-Charge Assistant Secretary Hector Villacorta, ang eDL ay isang valid, ligtas at alternatibong pagkakilanlan ng indibidwal na gumagamit ng sasakyan.

Ang mga motoristang magkakaroon ng eDL ay makakagamit din ng kaparehong pribilehiyo ng mayroong physical driver's licence.

Inaatasan ng LTO ang lahat ng deputized agents na kilalanin ang eDL bilang valid na lisensya para makagamit ng motor vehicle.

Kapag nasita, kailangan lamang ipakita ang eDL sa Land Transportation Management System (LTMS) online portal account, at ang mga hindi makapagpakita ng kaniilang eDL ay ikukonsiderang lumabag sa kabiguang magdala ng lisensya.

Ang mga mahuhuling motorista ay maiisyuhan pa rin ng Temporary Operator's Permit (TOP) 0 Electronic Temporary Operator's Permit (eTOP) at dapat na maasikaso ito sa loob ng 72 oras.

Kapag mayroong hindi nabayarang violation ang eDL holder, masususpinde ang LTMS account nito at hindi papayagan ng LTO na gamitin ang screen shot o larawan ng kanyang eDL.

Fixer, dumami — LTO.. Online exam sa renewal ng lisensya, aalisin na

ni Mai Ancheta | June 10, 2023

Upang maiwasang mabiktima ng mga fixer, pinag-aaralan ng Land Transportation Office (LTO) na alisin na ang online comprehensive examination para sa mga magre-renew ng lisensya.

Ayon kay LTO officer-in-charge Hector Villacorta, hindi niya makuha ang lohika kung bakit kinakailangan pang mag-exam kapag magre-renew ng lisensya.

Hindi naman aniya nababawasan ang kaalamam sa pagmamaneho para muling mag-exam.

Ang sistemang online comprehensive examination aniya ay nagiging bentahe para sa mga fixer dahil maraming mga driver lalo na ang nasa public transport ang hindi gaanong marunong gumamit ng computer at inaalok ng hanggang P2,000 para ang mga fixer na ang sumagot at umayos sa kanilang online examination.

OFWs, una sa plastic license card — LTO

ni Madel Moratillo | June 2, 2023

Prayoridad ng Land Transportation Office (LTO) na mabigyan ng plastic drivers’ license cards ang mga papaalis na mga overseas Filipino workers (OFWs).

Sa Laging Handa Public Briefing, sinabi ni LTO officer-in-charge Hector Villacorta na ito ay para magamit ng mga OFW bilang government ID ang driver’s license.

Sa ngayon, nasa 53,000 na plastic driver’s license ang natitira sa LTO.

Sabi ni Villacorta, pinalawig na ng LTO ang validity ng mga expired na lisensya hanggang sa Oktubre 31.

“Sa ngayon ay nakatutok tayo sa urgent, iyong dalawang problema na inumpisahan nitong discussion na ito – iyong lack of license cards and plates of motor vehicles. 53,000 na lang nga iyong ating license cards eh ang solusyon diyan is in-extend natin iyong mga existing up to October 31 at iyon nga, iyong 53,000 priority muna iyong mga migrant workers,” pahayag ni Villacorta.

Ipapakiusap na lamang nila sa mga traffic enforcers na ang validity ng expired na lisensya ay hanggang sa Oktubre 31.

Una nang inanunsyo ng LTO na malapit nang maubos ang plastic card kung kaya papel na muna ang ilalabas na lisensya.