Fuel subsidy, naibigay na sa 63,864 PUV operators — LTFRB

ni Jeff Tumbado @News | September 19, 2023

Inihayag ng Land Transportation Franchising and Regulatory Board (LTFRB) na naipamahagi na nito ang ayuda sa 63,864 na mga PUV operator sa buong bansa na siyang mga benepisyaryo sa ilalim ng Fuel Subsidy Program (FSP).

Base sa datos ng LTFRB, noong Setyembre 15 ay na-credit na ang kaukulang halaga sa account ng 63,864 na mga PUV operator sa buong bansa. Ito ay ilang araw lamang matapos ma-download sa LTFRB ang pera noong Setyembre 12 at sinimulan ng ahensiya ang implementasyon nito noong Setyembre 13 at 14.

Sa naturang bilang, ang mga Traditional Public Utility Jeepney (TPUJ) ang may pinakamalaking bilang na nakatanggap ng ayuda na umabot na sa 61,655.

Kasunod nito ang mga Public Utility Bus (PUB) kung saan 1,059 na ang nakatanggap ng ayuda, at 563 naman para sa mga Modern Public Utility Jeepney (MPUJ).

Nakatanggap na rin ng ayuda ang mga operator ng Minibus, Tourist Transport Services, School Transport, at mga Filcab.

Hinggil naman sa isyu na may ilang operator pa ang hindi nakakatanggap ng kanilang ayuda dahil sa election ban, ang Department of Transportation (DOTr), sa pakikipag-ugnayan sa LTFRB, ay nasa proseso na ng pagsumite ng isang petisyon sa Commission on Elections (Comelec) na naglalayong i-exempt ang FSP sa Comelec Resolution No. 10944.

Ang naturang resolusyon ay nagbabawal ng pamamahagi ng public funds para sa social welfare at public works sa panahon ng eleksyon tulad ng Barangay at Sangguniang Kabataan Elections na gaganapin sa Oktubre 30, 2023.

P1 dagdag-pasahe sa jeep, tablado — LTFRB

ni Mai Ancheta @News | August 15, 2023

Bigo ang transport group na mapagbigyan sa hirit na dagdag-pisong rush hour rate upang makatulong kahit papaano sa epekto ng mataas na presyo ng produktong petrolyo.

Ayon kay Land Transportation Franchising and Regulatory Board (LTFRB) Chief Teofilo Guadiz III, mataas ang pisong hirit na dagdag-pasahe tuwing rush hour.

Mabigat aniya para sa mga sumasakay sa mga pampublikong sasakyan gaya ng jeepney ang pisong dagdag sa pamasahe.

"I think it's too high even one peso for me is a little bit too high. Masyadong masakit sa bulsa

ng mga mananakay," ani Guadiz.

Matatandaang naghain ng petisyon ang ilang transport group para sa dagdag-pisong singil tuwing rush hours upang hindi umano malugi ang mga pampublikong tsuper sa matinding trapik.

Batay sa petisyon, ang paniningil ng surge charge ay mula 4:00am-8:00am; at 5:00pm hanggang 8:00 pm.

Sinabi ni Guadiz na wala ng bisa ang petisyon dahil naghain ng panibagong petisyon ang transport groups para sa dagdag-P2 sa pasahe.

Nakatakdang dinggin ng LTFRB sa susunod na linggo ang panibagong petisyon ng transport groups para sa hirit na dalawang pisong dagdag-pasahe .

Transport groups sa LTFRB: P2 dagdag-pasahe sa jeep

ni Mai Ancheta @News | August 12, 2023

Humingi ng dagdag na P2 sa pamasahe sa jeep ang apat na transport groups upang makabawi sa mataas na presyo sa produktong petrolyo.

Naghain ng petisyon nitong Biyernes ng umaga sa tanggapan ni Land Transportation Franchising and Regulatory Board (LTFRB) Chairman Teofilo Guadiz III ang mga grupong Liga ng Transportasyon at Operators sa Pilipinas, FEJODAP, PISTON, at Stop and Go Movement upang payagan silang magdagdag ng P2 singil sa pamasahe sa unang apat na kilometro ng biyahe.

Ayon kay LTOP President Orlando Marquez, hindi na nila kayang balikatin ang sunud-sunod na pagtaas sa presyo ng produktong petrolyo na umabot na aniya ng P10 ang itinaas kada litro simula noong Hulyo.

Tumaas din umano nang sobra-sobra ang presyo ng piyesa ng mga sasakyan na dagdag-pahirap sa mga tsuper at operators

Humiling ng pang-unawa si Marquez sa mga pasahero dahil nahihirapan na sila sa walang tigil na pagtaas sa presyo ng petrolyo at halos kakarampot na lamang ang naiuuwing kita sa kanilang pamilya.

Kapag maaprubahan ang petisyon ng public transport groups, magiging P14 na ang minimum na pamasahe mula sa kasalukuyang P12.