Class suspension sa buong bansa, ‘di puwede! — CHED

ni Lolet Abania | November 17, 2020

Sinagot ng Commission on Higher Education (CHED) ang panawagan ng pagkakaroon ng academic break sa buong bansa o kahit Luzon-wide matapos ang matinding naidulot ng mga bagyong tumama sa ‘Pinas.

Sa isang interview kay CHED chairperson Prospero De Vera III, ipinunto niya na hindi makapagbibigay ng isang unilateral decision ang komisyon para sa academic break.

“No to both, especially for the nationwide academic break because the impact of the typhoon and the disasters are different across different parts of the country,” sabi ni De Vera sa interview ng CNN-Philippines, ngayong Martes.

“Number two, no also to the Luzon-wide (break) because the universities are already deciding on it,” sabi ni De Vera.

Una nang nag-anunsiyo ang mga unibersidad ng isang linggong suspensiyon ng kanilang klase bilang tugon sa mga naapektuhan ng bagyo, naging problema sa distance learning at iba pang pasanin ng mga estudyante at guro dahil sa kalamidad.

Ayon kay De Vera, ang mga school authorities at iba’t ibang lokal na pamahalaan ang dapat na magdeklara ng class suspension dahil mas nalalaman ng mga ito ang sitwasyon ng kani-kanilang lugar.

“We leave that to the school authorities, because different schools and different students and families are affected differently. This is still a matter that is being discussed. We don’t know yet the actual disaster assessment on the ground,” paliwanag ni De Vera.

“For schools that are severely affected, the commission will help these schools. And if the assistance is in terms of academic break then the commission will decide on appropriate time on what is the appropriate academic break for individual universities,” aniya pa.

Samantala, sinang-ayunan ni Presidential Spokesperson Harry Roque ang naging desisyon ng CHED na walang nationwide o Luzon-wide academic break.

“Ang decision po ng CHED ay hindi po papayagan itong academic break na hinihingi ng ilan, kung hindi ang desisyon po ng en banc ng CHED ay para mag-extend po iyong mga pamantasan, mga kolehiyo na hindi nakapagklase dahil sa bagyo ng one or two weeks para po matapos ang kanilang semestre,” ani Roque sa news conference sa Cagayan.

“Tayo po ay nasa blended learning at ang primary mode of instruction po natin ay modular. So, hindi po masyadong naapektuhan dahil wala po ngang face-to-face classes sa lahat ng ating mga eskuwelahan,” sabi pa ni Roque.

Intensity 4.4 na lindol sa Batanes

ni Lolet Abania | November 16, 2020

Niyanig ng 4.4-magnitude na lindol ang lalawigan ng Batanes, ayon sa Philippine Institute of Volcanology and Seismology (Phivolcs).

Sa nailabas na bulletin ng Phivolcs, alas-3:19 ng hapon ngayong Lunes, November 16 naramdaman ang pagyanig sa layong 21.59°N, 121.21°E - 110 km N 37° W ng Itbayat, Batanes, may lalim na 033 kilometers at tectonic in origin.

Wala namang naitalang nasaktan matapos ang lindol.

Pinapayuhan ng Phivolcs ang publiko na maging mapagmatyag at mag-ingat sa posibleng pagkakaroon ng aftershocks.

P-Duterte, lalahok sa APEC Summit

ni Lolet Abania | November 16, 2020

Ipinahayag ni Pangulong Rodrigo Duterte na lalahok siya sa nakatakdang online meeting ng mga lider sa buong mundo sa Asia Pacific Economic Cooperation (APEC) Summit na gaganapin sa Biyernes, November 20, kasabay ng pagtalakay ng mga ito sa nanghihinang ekonomiya ng mga bansa dahil sa COVID-19 pandemic, ayon sa Malacañang.

Ito ang kauna-unahang pagsasagawa virtually ng APEC Economic Leaders’ Meeting, kung saan ayon kay Presidential Spokesperson Harry Roque ay magkakaroon ng dalawang sessions sa nasabing summit.

Ayon sa Malaysia, ang host country ngayong taon, asahan na tatalakayin ang paglulunsad ng bagong vision na magbibigay gabay sa 21 Pacific Rim economies sa mga susunod na taon.

Ang summit noong nakaraang taon sa Chile ay nakansela dahil sa mga violent protests sa mga bansa sa South America.

Samantala, noong nakaraang linggo, lumahok virtually si Pangulong Duterte sa 37th Association of Southeast Nations (ASEAN) Summit and Related Summits, kung saan binanggit niya ang tungkol sa pagpapalalim ng regional integration at pagpapalakas ng supply chain connectivity.

Hinimok din ni P-Duterte ang mga Southeast Asian countries sa pagkakaroon ng kooperasyon para tiyakin na ang kani-kanilang mamamayan ay maka-access sa COVID-19 vaccines.

Pinangunahan din ni Pangulong Duterte ang mga lider ng mga bansa para sa isang open dialogue at tinukoy niya ang pagpapaigting ng multilateralism para sa pagtugon sa COVID-19 pandemic at recovery, climate action, at pagkakaroon ng kapayapaan at isyu ng seguridad sa Asia Pacific, partikular na ang South China Sea disputes.