Travel ban sa UK dahil sa bagong Coronavirus, 'di pa final answer - Duque

ni Lolet Abania | December 29, 2020

Nilinaw ni Department of Health (DOH) Sec. Francisco Duque III na ang naunang inanunsiyo tungkol sa travel ban sa 20 bansa na may mga naitalang kaso ng bagong Coronavirus variant ay isa lamang rekomendasyon at wala pang pinal na desisyon.

"It's a recommendation... Hintayin na lang natin 'yung sa OP (Office of the President) issuance today," sabi ni Duque sa isang phone interview.

Unang inanunsiyo ngayong Martes ng umaga nina Duque, Department of Labor (DOLE) Sec. Silvestre Bello III at ng Department of Transportation (DOTr) na palalawakin ang travel ban sa 20 bansa mula December 30, 2020 hanggang January 15, 2021 dahil sa posibleng pagkalat ng bagong Coronavirus variant sa bansa.

Samantala, sa isang news briefing, pinayuhan ni Presidential Spokesperson Harry Roque ang publiko na maghintay sa ilalabas na mga guidelines mula sa Office of the President ngayong araw.

"What I understand now is the Office of the Executive Secretary is drafting guidelines that would conform to what the President said na walang Pilipino na nais umuwi na puwedeng pigilan," ani Roque.

"My office is the only one authorized to issue any information relating to COVID so, antayin n'yo pong mag-issue tayo ng anunsiyo kung epektibo na ang travel ban sa iba pang mga bansa sa may new variants... May dahilan po kung bakit nais ni Presidente na sentral po sa opisina natin ang pag-release ng impormasyon para maiwasan ang kalituhan," dagdag ng kalihim.

Matatandaang inaprubahan ni Pangulong Rodrigo Duterte ang extension ng travel ban sa United Kingdom, kabilang ang mga transited mula sa naturang bansa ng dagdag na dalawang linggo matapos ang December 31, 2020.

.05 Rollback sa diesel, .25 sa kerosene

ni Lolet Abania | December 28, 2020

Nakatakdang mag-rollback sa presyo ng produktong petrolyo ngayong linggo matapos ang pitong magkakasunod na linggong pagtaas sa diesel at kerosene, habang walang pagbabago sa gasoline.

Sa hiwalay na advisories, ang Pilipinas Shell Petroleum Corp. at Seaoil Philippines Inc. ay naglabas ng anunsiyong magbabawas ng presyo sa kada litro ng diesel ng P0.05 at kerosene ng P0.25.

Magpapatupad naman ang Petro Gazz ng parehong pagbabago, subalit hindi kasama rito ang kerosene.

Magiging epektibo ang bagsak-presyo ng petrolyo nang alas-6:00 ng umaga bukas, December 29, 2020. Kasunod na ring magpapalabas ng katulad na abiso ang iba pang kumpanya ng langis.

Sa pinakahuling datos mula sa Department of Energy (DOE), lumalabas na ang naging year-to-date adjustment ay may net decrease ng P3.22 kada litro sa gasoline, P7.36 kada litro sa diesel at P10.59 kada litro sa kerosene.

Ipo at Angat Dam, umapaw na, nagpakawala ng tubig

ni Lolet Abania | December 27, 2020

Binuksan ang isang gate ng Ipo Dam sa Norzagaray, Bulacan nitong Linggo nang hapon matapos magdala ng malakas na pag-ulan ang dalawang low pressure area (LPA), ayon sa PAGASA Hydrometeorology Division Flood Forecasting and Warning Section.

Bukod pa rito, binuksan din ang isang gate ng Angat Dam na matatagpuan din sa Bulacan.

Pinaalalahanan ng PAGASA ang mga residente ng Norzagaray, Angat, San Rafael, Bustos, Baliuag, Pulilan at Plaridel dahil sa posibilidad na pagbaha sa pagpapakawala ng tubig sa Dam.

Nasa 100.32 meters na ang water level ng Ipo Dam, samantala nasa 213.38 meters naman ang Angat Dam na sumobra na sa spilling level nitong 212 meters.

Ibinahagi ng PAGASA na huling namataan ang 2 LPA sa 40 kilometers east ng Infanta, Quezon at 190 kilometers north-northwest ng Puerto Princesa, Palawan.

Naghahanda na rin ang National Disaster Risk Reduction and Management Council sa posibilidad na pagbaha at pag-landslide sa Luzon dahil sa pag-ulan.