Mga dapat iwasan kung makikipag-meet sa naka-match sa dating app

ni Mharose Almirañez | May 2, 2022

Na-love at first chat ka na ba? Sa dami ng trial cards na na-experience mo sa pakikipag-talking stage, bakit patuloy ka pa rin sa pagsu-swipe right? Hindi ka pa ba nato-trauma sa internet love?

Ang totoo’y napakakumplikado talaga ng online dating. Hindi ito tulad ng iniisip ng iba na kahit sinong makausap mo over the internet ay magiging dyowa mo na rin instantly. Hindi naman kasi lahat ng nasa dating app o site ay into romantic relationships. ‘Yung iba, looking for mabebentahan ng insurance, kotse, bahay, mai-scam o friends with benefits.

Kaya beshie, sana ay aware ka sa totoong motibo ng kausap mo bago ka pa tuluyang mahulog sa “pogi typings” niya. Mabuti na ‘yung umpisa pa lang ay alam n’yo na ang hinahanap ng isa’t isa para hindi ka mabiktima ng salitang, “Masaya naman tayo, ‘di ba?”

Pero anu-ano ang mga dapat iwasan kapag napagdesisyunan n’yo nang mag-meet? Narito ang ilang tips:

1. ‘WAG MALI-LATE SA DATE. Mapa-babae o lalaki ay hindi dapat nino-normalize ang Filipino time. Nakaka-green flag kung darating ka ahead of time sa meet up place at malaking red flag naman kung ilang oras mong paghihintayin ang ka-meet mo.

2. ‘WAG MANG-INDIAN. ‘Yung tipong, malayo ka pa lang at nakita mo na hindi mo pala type in person ‘yung ka-meet mo, kaya sa halip na sumipot ay bibiglang-liko ka paalis sa meet up place. Tapos, magdadahilan kang may emergency kaya hindi ka nakasipot sa date n’yo. Naku, beshie, bad habit ‘yan!

3. ‘WAG MAGPO-PROXY. Kung conscious ka sa hitsura mo kaya hahanap ka ng friend na magpo-proxy sa date n’yo, very wrong move ‘yan, beshie! Una pa lang, i-inform mo na siyang hindi ka kasing ganda, kasing sexy, kasing pogi o kasing macho nu’ng nasa picture kaya huwag siya masyadong mag-expect sa ‘yo. Wala kayo sa K-Drama. Okie?

4. ‘WAG MAGSASAMA NG CHAPERON. Masisira ang diskarte ng ka-date mo kung alam niyang may ibang nanonood at nakikinig sa inyo. So, beshie, mag-share location ka na lang o magkabit ng hearing device para updated pa rin sa real time tsika ang mga Marites mong friend.

5. ‘WAG BONGGAHAN ANG ARRIVE. Manamit nang naaayon sa lugar upang hindi kayo maging center of attraction. Hindi mo rin dapat ipamukha sa kanya na isa kang high maintenance person dahil iisipin niyang, “Ayyy, out of my league ‘to. Ayoko rito!”

6. ‘WAG MAGING MABOKA. Nakaka-turn off kung puro ikaw lang ‘yung nagsasalita sa buong date. ‘Yung tipong, naikuwento mo na pati buhay ng nanay, ninang at kapitbahay n’yo, samantalang siya ay nandu’n pa rin sa topic na, “Bakit kayo naghiwalay nu’ng ex mo?”

7. ‘WAG MAGING TOUCHY. Upang hindi humantong kung saan ang first date n’yo, obserbahan mong maigi ang bawat galaw niya at ‘wag basta magpadala sa matamis niyang ngiti at nanghi-hypnotize na kindat. Sa paraan pa lang kung paano siya tumingin at humawak sa ‘yo, sana ay ma-gets mo na ang hidden meaning nu’n. Unless, game ka rin sa gusto niya.

8. ‘WAG MAGSE-SELPON. Okey sana kung pi-picture-an ka niya, pero kung mas inatupag pa niya ang pagse-selpon habang kasama ka niya ay nangangahulugan lamang na hindi ka niya gusto o hindi siya masyadong interesado sa ‘yo.

Ilan lamang ‘yan sa mga dapat iwasan during first meet-up upang hindi mauwi sa "Talking stage, gone wrong" at nang hindi siya madagdag sa listahan ng Instagram story o My Day viewers mo.

Matapos pumalpak ang unang date, marami ang nade-depress sa katatanong sa kanilang self-worth. Ilang Facebook users na rin ang nag-deactivate at nagpalit ng kulay itim na profile picture habang nasa healing process.

Beshie, hindi ka naman panget at boring kasama sa personal. Siguro, maling tao lang ‘yung na-swipe right mo. So, tama na ang pag-e-emote, hanap ka na lang ng bagong trauma. Charot!

Feeling excited? 5 Bagay na hindi dapat minamadali, alamin!

ni Mharose Almirañez | April 28, 2022

“Dumadaan ang araw, ‘di mo namalayan naubusan ka ng oras,” ‘ika nga sa kanta ni Sarah Geronimo na Isa Pang Araw.

Lahat naman tayo ay gustong mag-skip to the good part. ‘Yung tipong looking forward tayo sa future, kung saan pati orasan ay gusto nating i-fast forward.

Time is gold, beshie. Kahit gaano ka man ka-excited, dapat mo pa ring sulitin ang oras dahil hinding-hindi mo na ‘yan maibabalik kahit humiling ka pa sa Diyos ng isa pang araw.

Bilang gabay, narito ang ilang bagay na dapat mong sulitin sa halip madaliin:

1. PAGTANDA. Minsan ka lang magiging bata kaya sulitin mo na. Ang totoo, ito ang pinakamasayang parte ng pagiging tao. ‘Yung edad na hindi mo pinoproblema ang finances. ‘Yung tipong mga sugat sa tuhod lang ang iniiyakan mo. ‘Yung bigyan ka lang ng kendi ay masaya ka na. ‘Yung iisipin mo lang ay kung paano magtutulug-tulugan kapag pinapatulog ni nanay sa tanghali.

As we grow older, hahanap-hanapin natin ‘yung sapat na oras ng tulog at pahinga. Hindi na tayo mapapatahan ng kendi at hindi lang sugat sa tuhod ang nakapagpapaiyak sa ‘tin. Once maging adult tayo, rito na rin pumapasok ‘yung napakarami nating insecurities at responsibilities na hindi puwedeng takasan.

2. PAGDYO-DYOWA. Kahit saan tumingin, ultimo elementary students ay may ka-holding hands while walking. Sakit sa mata, ‘di ba, beshie?! Hindi naman masamang magmahal, ngunit bilang respeto sa mga magulang na nagkakanda-kuba kakakayod, mairaos lang ang pag-aaral mo ay kaunting konsiderasyon naman.

As a teenager, ‘di ba, mas masarap sa feeling ‘yung pasulyap-sulyap ka lang muna kay crush? ‘Yung inspired kang pumasok sa school dahil hoping kang maka-groupings siya sa class activity. ‘Yung kulang na lang ay ipa-laminate mo lahat ng answer sheets mong may corrected by his/her name tuwing nate-tsekan niya ‘yung papel mo. Higit sa lahat, ‘yung in denial ka, pero kilig to the bones naman kapag inaasar ka ng friends mo kay crush. Napakasayang bumalik sa ganyang stage ‘di ba?

3. PANLILIGAW. Para sa mga kalalakihan, ‘wag na ‘wag n’yong mamadaliin si girl na sagutin kayo. Kung totoo ang intensiyon n’yo sa panliligaw, dapat n’yong respetuhin ang kagustuhan ni girl na magpa-hard to get. As for the girls, ‘wag basta sagot nang sagot. Okie?

Mahirap kung hinog sa pilit ang relasyon. Paano kung may makilala kayong iba in the middle of your relationship? Ipagpalagay nating hindi pa ganu’n katibay ‘yung relasyon n’yo dahil ang tendency, matutukso kayo sa iba at mapapakanta nang ‘Bakit ngayon ka lang?’ at ‘Ikaw Sana’ ni Ogie Alcasid. Dito na nga magsisimula ang cheating. Kung hindi kayo nagmadali, eh ‘di sana, hindi kayo napunta sa maling tao.

4. PAGMU-MOVE ON. Kung nag-break kayo ng dyowa mo ay i-enjoy mo lang ‘yung pain. Tandaang the more pain, the better person you become. ‘Wag mong madaliin ang pagmu-move on ‘coz moving on is a long process. It takes time to heal wounds, ‘ika nga. Puwede mo rin basahin ang nauna kong ‘Tips para maka-get over sa break-up’ bilang gabay sa ‘yong pagmu-move on.

Sabi nga nila, happiness is a choice. If you will never be happy being single right now, you will never be happy when you get married. Oh, ha! English ‘yan! Kaya kung single ka ngayon, dapat mo ‘yang ipagdiwang, sapagkat mayroong “14 perks of being single”. Isipin mo na lang na blessing in disguise ang breakup n’yo, dahil inilayo ka ni Lord sa maling tao.

5. PAG-AASAWA. Kahit na sabihing may divorce o annulment naman, hindi pa rin dapat ginagawang training ground ng relationship ang marriage. ‘Ika nga, hindi ito parang kanin na isinubo at ‘pag napaso’y iluluwa. ‘Wag puro, “Mahal kita, mahal mo ‘ko, tara, pakasal tayo!” Tandaan, hinding-hindi kayo mapapakain ng pagmamahal. Bago mag-I do, siguraduhin munang spiritually, mentally, physically and financially ready kayong mag-partner.

Kalakip ng pagpapakasal ang pagkakaroon ng responsibilidad sa iyong asawa’t magiging anak. ‘Wag pasukin ang panibagong chapter ng buhay kung hindi ka pa handang manindigan sa buhay may pamilya, sapagkat mga bata lamang ang magiging kawawa sa huli. As if namang puwede silang ibalik sa sinapupunan ‘pag sawa na kayo sa buhay may asawa, ‘di ba?!

You know what, beshie, papunta ka pa lang sa exciting part kaya ‘wag mo masyadong habulin ang future. Ang buhay ay punumpuno ng surprising plot twist at walang shortcut sa kani-kanya nating timeline of success. ‘Wag magmadali sa pagtanda, pagdyo-dyowa, panliligaw, pagmu-move on at pag-aasawa dahil lahat naman tayo’y aasenso, ikakasal at mamamatay.

Sa ngayon ay sundin mo muna ang bilin nina nanay at tatay, sapagkat para sa ‘yo rin naman ang mga ginagawa nila. Dapat kang maging thankful sa presence ng iyong parents dahil kapag nawala sila, paniguradong hahanap-hanapin mo rin ang pagkalinga nila. ‘Wag mo hintaying mahuli ang lahat bago mo ‘yan ma-realize, dahil hinding-hindi sila babangon sa hukay para lang i-comfort ka.

Okie?

Iba’t ibang paraan para magkaroon ng magandang komunidad

ni Jersy L. Sanchez - @Life & Style| April 25, 2022

‘Pag sinabing kapitbahay, unang pumapasok sa isip natin ang mga “Marites”… agree?

Well, hindi naman lahat ay ganito ang pananaw, dahil para sa kanila, ang mga kapitbahay ay puwede ring katuwang sa mga problema, ka-share ng ulam at kung anu-ano pa, in short, nagiging kaibigan na rin natin sila.

Pero para maalis ang negative interpretation sa kapitbahay at ‘ika nga, para good vibes lang, paano nga ba tayo magkakaroon ng magandang koneksiyon sa ating mga kapitbahay?

1. COMMUNITY PANTRY. Matatandaang nauso ang community pantry noong nakaraang taon. Nagsimula ito sa isang komunidad kung saan nagtayo ng ‘pantry’ ang isang concerned citizen sa kanilang lugar. Dahil maraming nakatulong at natulungan, nagsilbi itong inspirasyon sa iba pa nating mga kababayan, kaya nagkaroon din ng community pantry sa iba’t ibang bahagi ng bansa. Well, hindi pa naman huli para magtayo ka rin nito sa inyong lugar dahil for sure, makakatulong ka, gayundin, makakahikayat ka ng ibang tao na tumulong din.

2. TUMULONG SA CHARITIES. Mahalagang tumulong sa ating komunidad, lalo na sa mga higit na nangangailangan at iba pa. Ilan sa mga paraan upang makatulong ay ang pagdo-donate ng mga damit, pagbibigay ng relief goods o simpleng pagbibigay ng financial aid.

3. CLEAN UP SCHEDULE. Sino ba namang may ayaw ng malinis na lugar, ‘di ba? Para mapanatiling malinis at ligtas ang inyong lugar, oks ding mag-organize ng cleanup drive kasama ang iyong mga kapitbahay. Umpisahan sa paghahanap ng volunteers at saka pag-usapan ang magiging hatian ng duties. Halimbawa, sinu-sinong pamilya ang nakatoka para sa isang linggo, at sinu-sinong mga kalugar ang magmo-monitor kung nasusunod ang proper waste management. Parang nakakapagod ito, pero for sure, worth it.

4. COMMUNITY GARDEN. Sabi nga, sobrang rewarding ‘pag ikaw ang nagtanim ng iyong aanihin, kaya bakit hindi mo ito simulan sa inyong lugar? Ang pagkakaroon ng community garden ay magandang bonding para sa magkakapitbahay, gayundin, makasisiguro kayong organic ang pagkain na inyong aanihin. Imbes na magsiraan ang magkakapitbahay, why not build a hobby na pakikinabangan ng lahat, ‘di ba?

Beshies, it’s time para mag-level up sa ating komunidad. Kumbaga, no more nega vibes, du’n tayo sa healthy community kasi talagang nakaka-good vibes.

Kaya kung gusto mo ng pagbabago, dapat itong magsimula sa iyo. Pero tandaan, ‘di kailangang bongga agad ang pagbabago dahil mas mabuting magsimula sa maliliit na hakbang, ‘ika nga, baby steps.

Make sure na susubukan n’yo ang mga ideyang ito para magkaroon ng matibay at magandang koneksiyon sa inyong mga kapitbahay. Keri?