Dapat gawin kung dudang mangungutang ang nangamusta

ni Mharose Almirañez | May 15, 2022

Kumusta?

Maliban sa “Hi” at “Hello”, isa ang pangangamusta sa pangkaraniwang introduction sa tuwing mayroong gustong makipag-communicate sa ‘tin. Sa totoo lang, hindi naman lahat ng nangangamusta ay totoong concern sa ‘tin, sapagkat ang iba ay nangangamusta lamang para mangutang o kaya’y magpa-fall.

Hindi naman sa pinag-o-overthink kita, pero sana ay aware ka sa totoong motibo ng mga taong nangangamusta sa ‘yo. Lumang istayl na kasi ‘yung “It started with a ‘Hi’, or ‘Hello’,” dahil ang ending, “Inutangan ka na, iniwan ka pa!”

So paano nga ba ipa-fact check ang iba’t ibang intensyon ng mga taong nangangamusta sa ‘tin? Ayaw na kitang mag-overthink, kaya narito ang mga response na dapat gawin kapag may nangamusta sa ‘yo:

1. MAGING STRAIGHTFORWARD. Prangkahin mo na siya at sabihing, “Magkano ang kailangan mo?” o “May balak ka bang mag-stay?” Assuming and intimidating man pakinggan, pero mas mainam na ‘yun kesa magpaliguy-ligoy pa kayo at ma-misinterpret n’yo pa ang isa’t isa.

2. ‘WAG MAG-ASSUME. Ito na nga ‘yung sinasabi ko na hindi porke kinumusta ka niya ay iisipin mong interested na siya sa ‘yo. Beshie, mag-fact check ka muna bago mag-assume dahil baka naman bored lang siya at naghahanap ng makakausap at nagkataon lang na ikaw ‘yung unang nagreply sa dami ng kinumusta niya.

3. TAGALAN ANG REPLY. Kung sa chat siya nangamusta, huwag mo munang i-seen at reply-an ang chat niya. Hayaan mo lang siyang matabunan sa inbox mo dahil kung talagang importante ang purpose ng pangangamusta niya, magme-message ulit siya sa ‘yo.

4. MAGING HONEST. Ipagpalagay nating mangungutang talaga kaya siya biglang nangamusta, ang dapat mo maging tugon d’yan ay, “Sorry, naka-budget na kasi ‘yung pera ko.” Ngunit kung kailangang-kailangan talaga niya ng pera at medyo nakakaluwag ka naman, eh ‘di pautangin mo na. At least, hindi na humaba ‘yung conversation n’yo sa pagpapaliguy-ligoy.

Nakakalungkot isipin na naaalala lang tayo ng ibang tao kapag may kailangan sila sa atin. Hindi naman required na makausap sila araw-araw, pero gasino man lang ‘yung maramdaman natin ang presence nila paminsan-minsan, without hidden agenda, ‘di ba?

Matapos ang eleksyon, what’s next?

ni Lolet Abania | May 14, 2022

Hindi maikakaila na nagsisimula pa lang ang eleksyon, aktibo na ang mga Pinoy, kahit pa may COVID-19 pandemic. Mapa-bata o matanda, kani-kanyang pagdalo sa mga rally at miting de avance ng kanilang mga manok na sinusuportahan at talagang naipakita ng lahat ang pagiging makabayan. Subalit matapos ang botohan, tila nagkalamat ang dating magandang samahan ng bawat isa.

Umusbong ang pagkadismaya at kung iisipin ay unti-unting nabuo ang galit sa puso natin.

Kaya ang tanong, matapos ang halalan, paano nga ba maibabalik ang masayang samahan sa ating mga kaibigan o kapamilya? Narito ang ilang hakbang:

1. MAGPATAWAD AT GAMUTIN ANG MGA SUGAT. Labis na sakit sa pamilya, magkakaibigan, maging sa magkakatrabaho ang iniwan ng eleksyon. May naghiwalay na mag-asawa, nag-away na magpinsan, magkapatid at nagbangayan pang magkabitbahay sa dahilang magkaiba ang kanilang sinusuportahang kandidato. Tapos na ang batuhan ng masasakit na salita, ito na ang panahon ng paghingi ng tawad at pasensiya, para anumang sugat na idinulot ng binitawang salita ay magamot at maghilom nang tuluyan. Matuto na rin sana tayong magpatawad gaya ng pagpapatawad ng Diyos sa atin.

2. TANGGAPIN ANG RESULTA AT MAG-MOVE ON. Isang Latin phrase na nagsasabing, “Vox populi, vox Dei,” na ang ibig sabihin, “The voice of the people, (is) the voice of God”. Madalas, ang boses ng nakararami ang nagiging sagot at nananaig sa mga kompetisyon. Lumabas na ang resulta ng botohan, puwedeng ang napili nating kandidato ay nanalo o natalo. Alinman sa dalawa, matuto tayong tanggapin at ipagpatuloy ang ating buhay. Maaaring buong magdamag tayong umiyak, subalit dapat na maging masaya na rin pagdating naman ng bukas.

3. MAGTIWALA SA SOBERANYA NG DIYOS. Batid ng Diyos ang lahat ng nangyayari sa isang bayan o bansa at walang nalilingid sa Kanya. Hawak Niya ang lahat ng Kanyang nilikha, may buhay man ito o wala. Siya rin ang nagbibigay ng karunungan sa matatalino at kaalaman naman sa may pang-unawa. Dapat nating mabatid na ang Diyos ang naglalagay at nag-aalis ng mga hari o lider, kahit na iniluklok na ito ng taumbayan. Marami nang pagkakataon na nangyari ito sa ating bayan, naihalal na, saglit na namuno, subalit naalis din sa puwesto. Hindi Niya kailanman papayagan na malugmok ang bayan dahil sa hindi tamang namumuno. Kailangan nating magtiwala sa Kanyang kapangyarihan dahil hawak Niya ang puso ng isang pinuno.

4 PASAKOP SA NAIHALAL NA GOBYERNO. Bawat indibidwal ay dapat magpasakop sa mga lider ng pamahalaan, dahil walang pamahalaan na hindi nagmula sa Diyos. Siya ang nagtatag ng mga gobyernong umiiral, kaya ang lumalaban dito ay lumalaban na rin sa itinakda ng Panginoon.

Hindi madali, madalas pa na nabubuo ang pagrerebelde sa ating puso, lalo na kung sa tingin natin may anomalya na nangyari. Ang mga bagong lider ng bansa ay naitakda na dahil sila ang mga naihalal ng nakararami. Sakali mang may paglabag na ginawa ang mga lider na ito, hindi sila makakatakas sa batas dahil may parusang naghihintay sa kanila. Mas gugustuhin ba natin na mamuhay tayo na puno ng galit at pagrerebelde? Ipayapa natin ang ating puso at isip habang ginagawa natin ang tama at mas mabuti para maging masaya ang takbo ng ating buhay.

5. IPANALANGIN ANG MGA LIDER AT PAMAHALAAN. Sa pagkakaroon ng maunlad, tahimik at payapa, marangal at maayos na pamumuhay, mas mainam na ipanalangin natin ang ating mga bagong lider at lahat ng may mataas na tungkulin sa gobyerno. Sa halip na isumpa-sumpa natin sila, mas mabuting ipagdasal natin ang lahat ng ating lider at pamahalaan dahil kapag sila ay nagtagumpay, siguradong kasama rin tayong magtatagumpay at ang ating bayan.

Sa kabuuan, punuin natin ang ating puso ng pagmamahal. Isa lang ang ating bansa, anuman ang mangyari, magkakasama tayong mamumuhay dito. Piliin nating maging tahimik at may pagkakaisa, hindi tulad ng ibang mga bansa na watak-watak kahit pareho naman ang kanilang kulay, marahil dahil ito sa hindi nila pagkakaunawaan.

Tandaan, tayong lahat ay lahing Pilipino, may pagmamahal sa kapwa at sa bayan.

Gets mo?

Back to school na ba, besh? Mga paalala para sa ligtas na f2f classes

ni Mharose Almirañez | May 8, 2022

Handa ka na bang makita sa school si crush? The long wait is over, sapagkat balik-eskuwela na ang ilang mag-aaral sa bansa makalipas ang mahigit dalawang taong modular at online classes dahil sa COVID-19 pandemic.

Ayon kay Department of Education (DepEd) Secretary Leonor Briones, inaasahang makikilahok sa face-to-face classes ang 5,948,640 estudyante mula sa 25,668 o 56.89% pampublikong paaralan. Habang 226,991 mag-aaral naman mula sa 676 o 5.47% pribadong paaralan.

Napakaganda nitong balita, sapagkat mas matututukan na ng mga guro ang bawat mag-aaral. Gayunman, hindi pa rin tayo dapat maging kampante hangga’t hindi tuluyang nawawala ang banta ng COVID-19. Tulad ng paulit-ulit na paalala ng Inter-Agency Task Force (IATF), narito ang ilang safety protocols na ‘di dapat kalimutan:

1. MAGDALA NG HYGIENE KIT. Kalimutan mo na ang lahat, huwag lang ang alcohol. Isama mo na rin ang anti-bacterial soap at extra face masks. Iwasan din ang panghihiram ng gamit sa kamag-aral.

2. MAG-FACE MASK. Ito ang iyong magiging pananggala kung sakaling may bumahing o umubo malapit sa iyo. Tatanggalin lamang ang facemask tuwing kakain o iinom. Itapon ito nang maayos kung disposable at labhan kaagad kung reusable.

3. MAG-SOCIAL DISTANCING. Umiwas sa matataong lugar, partikular sa canteen tuwing recess o break time. Huwag ding makipagsiksikan sa hallway, corridor, hagdan at pampublikong transportasyon.

4. MAGHUGAS NG MGA KAMAY. Ugaliin ang paghuhugas ng mga kamay kada-oras upang hindi manatili ang mikrobyo sa bawat sulok ng iyong mga daliri at kuko.

5. MAG-DISINFECT. Bukod sa paghuhugas ng mga kamay at pag-a-alcohol, i-disinfect mo na rin ang iyong mga kagamitan na maaaring kapitan ng virus tulad ng mga sukli, silya, ballpen, bag, cellphone, atbp.

Batay sa pinakahuling tala ng Department of Health (DOH), 67,911,464 na ang mga nabakunahan kontra COVID-19 sa bansa. Bagama’t hindi mandatory ang pagpapabakuna at pagpapa-booster ay patuloy pa ring hinihikayat ang bawat isa, bilang proteksiyon laban sa virus.

Napakasarap isiping unti-unti na tayong nakakabalik sa normal. ‘Yung tipong, kaunti na lamang ang restrictions at mas maluwag na rin ang mga ipinatutupad na protocols sa bawat lokal na pamahalaan.

Imadyinin mo ba namang makakapag-bitaw ka sa dagat makalipas ang dalawang taong summer na puro lockdown. It’s indeed a long time, no sea!

Bukod d’yan, halos dalawang school year graduation rites na rin ang naisagawa virtually, kaya nakakalungkot isiping hindi ka manlang nakapag-martsa sa mismong araw na iyong pinakahihintay. Kaya naman sa taong ito’y maayos at ligtas na face-to-face graduation ang ipinakikiusap sa mga piling paaralan.

Bagama’t limitado ay isa pa rin itong magandang simula para sa tuluy-tuloy na “new normal”. Sana ay hindi lamang ito patikim sa nalalapit na halalan, kung saan balik-lockdown matapos ang eleksyon.

Nauunawaan naming excited ka sa outside world, pero plis lang, beshie, ‘wag magpasaway para maiwasan ang hawahan at hindi na magkaroon ng Season 3 ang enhanced community quarantine (ECQ). Okie?