Magaling na abogado, ama sa bahay-ampunan

ni Mabel G. Vieron @Special Article | December 2, 2023

Atorni, abogado, tagapagtanggol.

Sila ang tinatakbuhan natin kapag tayo ay may problemang legal. Sila ang nagtatanggol sa mga naaapi at nangangailangan ng hustisya. Sila ang tagapag-ayos ng mga kasong hindi kayang solusyunan sa simpleng usapan lang.

Pero nakarinig na ba kayo ng abogado na, pilantropo pa?

Ang aking tinutukoy ay walang iba kundi si Atty. Eric Mallonga, isang child rights advocate at nagmamay-ari ng isang bahay-ampunan.

Dahil sa tulong ng kanyang mga kaibigan, naipatayo ni Atty. Eric ang orphanage na mas kilala bilang “Meritxell Children's World Foundation” na 16 years nang tumutulong sa mga kabataang inabandona at inabuso.

Tiyak na marami sa inyo ang mapapaisip kung bakit nga ba ito ang kanyang ipinangalan dito.

Ayon kay Atty. Eric, hinango umano ito sa Patron Saint of Andorra. Ang istorya ng patron kung saan umusbong ang isang ligaw na rosas at du’n nila nakita ang statue ng isang birhen.

Lakas-loob na sumugal si Atty. Eric sa pagtatayo ng bahay-ampunan. Aniya, malaki rin ang naitulong ng pagkakaroon nila ng eskuwelahan.

“Nakapagpatayo ng paaralan ‘yung nanay ko, at ito 'yung Infant Jesus Academy. Lahat ng batang nakukuha at nare-rescue namin na mga inabandona, pinabayaan, inabuso at mga nawalan ng mga magulang, 'yun ang mga batang tinutulungan at pinapaaral namin dito.”

Ang naging inspirasyon niya upang gawin ito ay walang iba kundi ang kanyang ina. Bata pa lang diumano si Atty. Eric, na-expose na ito sa pag-aalaga ng mga bata.

“Ako ‘yung laging inaatasan ng aking ina na tulungan 'yung mga bata. Ang nanay ko ang nagturo sa akin ng tamang values, at tamang kaugalian na tumulong sa kapwa, lalung-lalo na sa mga batang nag-aaral du'n sa paaralan namin,” pagbabahagi pa ni Atty. Eric.

Bukod sa kanyang ina, malaki rin ang pasasalamat ni Atty. Eric sa kanyang mga kaibigan, dahil ‘di lang moral support ang ginawa ng mga ito kundi nagbigay din ito ng financial support.

“Siyempre, dahil ina-advocate ko ang karapatang pambata, naisip ko na maganda 'yung programa o proyekto, 'di lang feeding program kundi pagbibigay ng tahanan, kung saan may mga caregiver na magmamahal sa mga bata at long-term ang pangangalaga rito,” dagdag-kuwento ni Atty. Eric.

Bawat bata diumano sa bahay-ampunan ay may sari-sariling kuwento. Pero ang kuwentong pinaka-memorable para kay Atty. Eric ay ang batang ibinigay sa kanila nu’ng sila’y nasa Boracay at ‘yung sanggol na ‘yun ay na-rescue sa talahiban na may nakapaligid na mga aso.

Grabe, hindi ba? Imagine, ‘yung sanggol na kanilang natagpuan ay mayroon pang umbilical cord na nakakabit sa kanyang pusod.

Habang pinapakinggan namin ang kuwento ni Atty. Eric, halu-halong emosyon ang aming naramdaman.

‘Di niya lubos-akalain na may mga magulang pala talagang napagbubuntunan ng galit ang kanilang mga anak, at hindi lahat ng magulang, kayang mahalin ang kanilang mga anak.

“Na-realize ko, suwerte ‘yung mga anak ko kasi habang itinatayo ko ito, [ipinaramdam] ko sa kanila ang unconditional love. Kailangang walang limitasyon, at kondisyon ‘yung pagmamahal na ibinibigay mo sa isang tao.

"Kahit ano pang sakit ang ibinigay nila sa iyo, kahit masakit na sa puso, tatanggapin mo ‘yun dahil mahal mo sila, at sa pagmamahal na ‘yun, mapapalitan ‘yun ang kaugalian nu’ng tao.

‘Yun ‘yung nalaman ko, that absolute and unconditional love can transform [a] person.”

Kahit na labis ang kanyang pagmamahal na ipinadarama at ipinapakita sa mga kabataan, dumating din si Atty. Eric sa puntong gusto niya na itong sukuan dahil hindi umano sa lahat ng panahon ay may sarili siyang pera o donasyong magagamit nila para sa mga pangangailangan ng bahay-ampunan.

Kung may tao man sa likod ng tagumpay ni Atty. Eric, ito ay walang iba kundi ang kanyang ina na si Mrs. Consolacion Mallonga. Malaki ang pasasalamat ni Atorni sa kanyang ina, dahil ito ang nagturo sa kanya kung paano mahalin at alagaan ang mga bata.

“Dati siyang madre sa Holy Spirit College sa Mendiola. Umalis siya sa pagka-madre para [makapag-isip-isip] kung tutuloy ba siya. [At] du’n niya na-meet ang tatay ko. Pero, hindi na siya madre nu’ng ako’y ipinanganak, ah,” paglilinaw pa ni Atty. Eric.

Bukod sa pagiging full-time lawyer, mayroon din siyang art gallery. Kinakaya niyang pagsabay-sabayin ito sa tulong ng kanyang 8 kapatid.

Ang pinoproblema na lamang niya ngayon ay ang susunod na hakbang na kanyang gagawin para sa mga bata.

Sa dami ng naitulong nina Atty. Eric sa mga kabataan, hindi umano sila naghahanap o naghihintay ng anumang kapalit.

“'Yung utang na loob na itinanim nila para sa amin, ibalik nila sa ibang tao, tulad ng pagtulong namin sa kanila. Tulungan nila 'yung pamilya nila. Pay it forward kumbaga.

“We make this world the better place to live in and for the children, they can pay it forward once they become adults and once they become professionals.”

Ito ang nais niyang gawin ng mga kabataang kanilang tinulungan. Tila nagsilbing liwanag si Atty. Eric sa mga batang may madilim na nakaraan at masakit na karanasan.

Magsilbi rin sanang inspirasyon ang kuwento ni Atty. Eric Mallonga na kahit hindi natin kadugo ay piliin pa rin nating tumulong sa mga taong nangangailangan.

Maraming salamat sa inyong walang sawang pagpapakita ng malasakit sa mga kabataan, Atty. Eric Mallonga. Nawa’y marami pang bata ang inyong matulungan.

Kaya mula sa BULGAR family, proud po kami sa inyo!!!

PUBLISHER’S NOTE 2023

ni Ryan Sison - @Publisher's Note | December 2, 2023

Malugod na pagbati sa ating lahat!

Isang taon na muli ang lumipas mula nang unti-unti tayong makabangon sa hagupit ng COVID-19 pandemic.

Napakarami nating pinagdaanang pagsubok at patuloy pang hinaharap tulad ng tila araw-araw na pagtaas ng presyo ng mga pangunahing bilihin at walang humpay na pagtaas ng presyo ng krudo na ang kasunod ay dagdag na mga bayarin sa kuryente, tubig, transportasyon at edukasyon gayundin ang krisis-pangkalusugan, kabilang na ang lumalalang problema sa mental health ng marami nating mga kababayan at kabataan.

Idagdag pa rito ang paglaganap ng iba’t ibang uri ng krimen sa maraming dako ng bansa na ikinababahala na ng marami sa atin.

Isama rin dito ang ilang report ng mga nagkalat na scammers na namamayagpag pa online.

Ilan lamang ito sa mga problemang madalas na naiuulat sa radyo, telebisyon, social media at pati na sa mga pahayagan. Sa tulong ng mass media, madaling naipaparating sa publiko, higit lalo sa pamahalaan, ang mga suliraning nagpapahirap sa ating mga kababayan.

Subalit, kung marami man sa atin ang halos padapain ng pandemya dahil lubhang naapektuhan ang pamilya, hanapbuhay, negosyo at ekonomiya, pinipilit nating maging matatag para makaahon sa pagkakalugmok na ito.

Marami mang negatibong nangyayari sa ating bansa, isaisip nating marapat lamang na tayo ay magpalakas at magpatibay dahil kailangan nating sumabay sa agos para mabuhay.

Hindi madaling humarap sa mga hamong ito subalit kapag sama-sama ay makukuha nating tumayo at magpatuloy.

Kaya naman kaisa ninyo ang BULGAR na hindi susuko sa mga laban na ito.

Bilang kolumnista at publisher ng ating pahayagan, naniniwala tayo na anuman ang ating katayuan sa buhay, sa biyaya at habag ng Poong Maykapal ay unti-unti nating magagawang magpakatatag at muling humakbang tungo sa pag-unlad.

Kaya sa pagdiriwang ng ika-32 taong anibersaryo ng BULGAR, labis-labis ang aming pasasalamat sa walang sawa ninyong pagsuporta sa aming pahayagan.

Bilang bahagi ng selebrasyon ng aming ika-32 taong anibersaryo, ihahatid namin sa inyo ang dalawang kuwento ng natatanging indibidwal na hinamon ng pagsubok subalit lumaban, pinatunayang sila ay maaasahan at ipinakita ang kanilang katatagan.

Una, ang guro na si Rosalina Nava mula sa Macario B. Asistio Sr. High School-Unit 1, na bukod sa pagtuturo ng Alternative Learning System (ALS) ay nakukuha pang magturo sa mga preso sa Caloocan City Jail.

At pangalawa, ang primary child rights advocate na si Atty. Eric Mallonga, na maliban sa pagiging abogado at founder ng paaralang Infant Jesus Academy ay nagtayo ng bahay-ampunan sa Marikina City — ang Meritxell Children’s World Foundation.

Malaking oportunidad din para sa atin ang mabigyan ng pagkakataon na magsagawa ng outreach program noong Nobyembre 24, 2023 sa Meritxell Children’s World Foundation, kung saan nagdaos ng medical mission, katuwang ang Public Attorney’s Office (PAO) at volunteers na mga pediatrician para bisitahin at ma-checkup ang mga batang inaaruga nila.

Gayundin, binisita natin ang mga estudyante ng ALS sa Macario B. Asistio Sr. High School habang sila ay nagkaklase.

Mahal naming mga ka-BULGAR, naging simple man ang naturang mga programa, pero nagdulot ito ng makabuluhang kasiyahan sa mga bata sa panahon na maaaring sila ay nanghihina dahil sa pangungulila sa kanilang mga mahal sa buhay.

Lubos ang aming pasasalamat sa inyo, dear readers ng BULGAR at maging sa mga viewers natin sa online, dahil KAYO ang tunay na nagpapatatag at nagbibigay ng inspirasyon para kami ay manatili sa larangang ito.

Asahan ninyong ipagpapatuloy ng BULGAR na maging BOSES NG MASA AT MATA NG BAYAN — kasabay ng pangakong bago at napapanahong mga balita, updated at makatotohanang showbiz at sports report ang ihahatid namin sa inyo.

Mas lalo rin naming pagbubutihin ang aming mga online shows — #Celebrity BTS, Tagapag-BULGAR, Date kay Maestro, BULGAR Sports Beat at ang Chika pa More! with Tres Marites. At sa papasok na taong 2024, asahan ninyong mas marami pa kaming bagong pasabog na ihahatid sa ating mga mahal na followers ng BULGAR.

Muli, maligayang ika-32 taong anibersaryo sa BULGAR at mabuhay tayong lahat!

Magdasal ka na, sister (24)

ni Maria Angela Gonzales @Kuwentong Pag-Ibig | November 25, 2023

“Kung mayroong Dissociative identity disorder (DID) si Tonette, Sister Maritoni o kung anuman ang kanyang pangalan, hindi kaya may kinalaman siya sa patayang nagaganap?”

Tanong ni Mark sa kanyang sarili.

Ipinilig niya ang kanyang ulo, ayaw niyang isipin na may kinalaman ito sa pagkamatay ng kanyang tunay na ina. Marahas na buntong hininga ang kanyang pinawalan dahil ang ina na kanyang tinutukoy ay walang iba kundi si Sister Luna.

Kapwa nila alam ‘yun, pero minabuti na lamang nilang itago para hindi maging kahiya-hiya sa panig ng kanyang ina. Wala na rin naman siyang magagawa para baguhin ang kanyang nakagisnang buhay. Naging masaya rin naman siya sa piling ng kanyang kinilalang mga magulang bago umalis ang mga ito patungong Japan para sana magbakasyon. ‘Yun nga lang ay hindi na ito nakabalik dahil ang sinasakyang eroplano nito ay nag-crash. Kaya, sinunod na lamang niya ang kagustuhan ng mga ito na makipag-ayos sa kanyang ina.

Nakalulungkot lang na kakaayos palang nila ay nawala na agad ito. Kahit na lumaki siyang may kinikimkim na sama ng loob sa tunay niyang ina, hindi rason ‘yun para pigilan niya ang kanyang sarili na maghanap ng katarungan para rito.

“Si Tonette ba? No!” Mariin niyang sabi sa kanyang sarili.

Kahit na mayroon itong DID, sigurado siyang wala itong kakayahang pumatay. Nakilala rin naman niya si Chelsea at hindi naman ito masama. Para ngang naghahanap lang ito ng atensyon. Kaya nga lang, baka mayroon pa itong ibang katauhan na ‘di niya pa nakikita.

“Bakit ba ganyan ka kung makatingin sa akin?” Naaasiwang tanong sa kanya ni Tonette.

“Ang ganda mo kasi eh,” hindi niya napigilang sabihin.

Bigla namang namula ang mukha nito kaya hindi niya rin napigilang matawa. “Huwag mo nga akong bolahin.”

“Hindi naman kita binobola.”

Tinitigan niya ito dahil nais niyang makita nito kung gaano siya kaseryoso sa kanyang sinabi.

Pagkaraan, hindi niya na napigilan ang kanyang sarili, hinalikan niya ito para ipadama kay Tonette ang kanyang damdamin.

Itutuloy…