Tips para sa mahimbing na pagtulog sa gabi

ni Carlos S. Corpuz - OJT @Life & Style | April 10, 2023

Isa ka rin ba sa mga hirap matulog sa gabi? Hindi mapakali o maraming iniisip bago makatulog? Sabi nga nila, ang pagtulog ay nagbibigay ng iba’t ibang benepisyo sa katawan at isip ng isang tao. Pero paano kung ang pagtulog mo tuwing gabi ay hindi sapat at maayos? Ano kaya ang posibleng mangyari sa ‘yo?

Ayon sa isang pag-aaral, kung madalas ay kulang sa tulog ang isang tao, maaari itong magresulta ng maraming malalang problema sa kalusugan, tulad ng sakit sa puso, mataas na presyon ng dugo, diabetes, stroke, labis na katabaan, depresyon at marami pang iba.

Narito ang ilang puwedeng gawin para makatulog nang payapa at mahimbing tuwing gabi:

1. IWASAN ANG PAG-IISIP. Ikalma mo ang iyong isipan. Isa sa mga dahilan kaya hindi makatulog nang maayos ang isang tao ay dahil sa labis na pag-iisip. Kung ikaw ay may inaala o ikinakabahala, puwes, hindi sa oras ng pagtulog ‘yan ginagawa dahil imbes na ikaw ay antukin, ito ay magreresulta lamang ng iyong pag-o-overthink sa mga bagay.

2. IRELAKS ANG SARILI BAGO MATULOG. Maraming paraan para marelaks ang sarili bago matulog. Una, maligo para presko ang katawan. Pangalawa, magbasa ng libro habang umiinom ng gatas, at pangatlo, makinig ng mga relaxing music.

3. PATAYIN ANG ILAW. Ang madilim na paligid o kuwarto ay makakatulong sa pagkakaroon ng mahimbing na pagtulog. Ito ay dahil natutulungan nitong marelaks ang ating mga mata mula sa mga liwanag na nakikita sa mga ginagamit na gadgets.

4. IWASAN ANG PAG-INOM NG KAPE. Aminin natin, tayong mga Pinoy ay walang pinipiling oras o panahon sa pag-inom ng kape. Kaya kung nais mo na makatulog agad nang maayos, iwasan ang pag-inom ng kape sa hapon at gabi.

5. ‘WAG TINGIN NANG TINGIN SA ORAS. Iwasang tumingin sa orasan at itago ang cellphone. Sinasabing kapag tingin nang tingin sa oras, ikaw ay lalong mahihirapan makatulog dahil magdudulot ito ng stress sa iyo.

6. IWASAN ANG PAG-IDLIP SA HAPON. Ang pag-idlip sa hapon o tanghali ay maaaring makaapekto sa iyong pagtulog sa gabi, kaya ang pag-iwas sa gawaing ito ay makakatulong upang antukin nang maaga at makatulog sa tamang oras.

7. MAGDASAL BAGO MATULOG. ‘Ika nga, walang mas ikakapanatag ang loob mo kapag ikaw ay nagdadasal. Sa spiritual na paniniwala, ang pagdarasal ay nakakatulong sa pagkakaroon ng payapa at mahimbing na tulog sa gabi, dahil alam mo sa iyong sarili na mayroong gumagabay sa iyo sa oras ng iyong pagpapahinga.

Ang pagtulog ay paraan ng isang tao para makapagpahinga mula sa nakakapagod na araw ng kanyang buhay. Kaya ‘wag mong hahayaan na pati ang pagtulog ay maaabala pa ng kung anu-anong isipin, problema at distrakyon.

Ang mga nabanggit sa itaas ay pawang tips o paraan lamang sa pagkakaroon ng maayos at mahimbing na pagtulog. Ngunit nasa iyo pa rin kung paano mo didisiplinahin ang sarili sa tamang oras ng pag tulog. Gets mo?

Tips para iwas-heatstroke

ni Mabel G. Vieron - OJT @Life & Style | April 6, 2023

Summer na, kaya uso na naman ang mga sakit na maaari nating makuha ngayong tag-init, tulad ng bungang araw, sunburn, dehydration, pagkahilo, fungi at heatstroke.

Ngunit, madalas ay maraming nabibiktima ng heatstroke tuwing tag-init, at ito rin ang pinakaseryosong nangyayari kapag tumaas ng 40°C ang temperatura ng ating katawan, at nangangailangan ito ng agarang atensyon dahil kung 'di natin ito maaagapan ay maaari itong mauwi sa kamatayan.

Bakit nga ba natin nararanasan ang heatstroke? Simple lang, nakukuha natin ito ‘pag matagal tayong na-e-expose sa init o labis na physical activity. Walang pinipiling edad ang heatstroke, mas prone rin dito ang mga taong may iniindang karamdaman tulad ng diabetes, heart problem, obesity at iba pang sakit.

Ang heat stroke ay maaaring maiwasan. Kailangan lang sundin ang mga sumusunod na paraan upang hindi malagay sa peligro ang sinumang miyembro ng pamilya n’yo, lalo na ngayon na mainit ang panahon:

• Magsuot ng maluwag o magagaan na damit.

• Uminom ng maraming tubig para manatiling hydrated at ma-maintain ang normal body temperature.

• Iwasang pumunta sa mainit na lugar at mamalagi lang sa mahangin na lugar.

• Kung may ginagawang physical activities, bigyan din ang sarili ng oras para magpahinga upang mabawasan ang init sa katawan.

• Gumamit ng spray bottle, lagyan ito ng tubig at i-spray sa katawan upang maginhawahan.

Kaya iligtas natin sa peligro ng heat stroke ang bawat miyembro ng ating pamilya. Stay safe and hydrated, mga ka-BULGAR! Okie?

Budgeting tips para ‘di mabaon sa utang

ni Mabel G. Vieron - OJT @Life & Style | March 29, 2023

Nakakapanghina ‘pag may pinagkakautangan ka. ‘Yung tipong, diretso sa mga pinagkakautangan mo ‘yung sinusuweldo mo. Ang masaklap pa, ‘yung nangungutang ka pa sa iba para lang ipambayad sa mga nauna mong utang.

Narito ang mga tips upang maiwasan ang pagkabaon sa utang:

1. MAGKAROON NG EMERGENCY FUND. Isa sa dahilan kung bakit nangungutang tayo ay dahil sa hindi inaasahang pagkakagastusan na wala naman sa budget. Kaya mabuting maglaan at mag-ipon para magkaroon ng emergency fund dahil sa ganu’ng paraan, sakaling magkaroon ng emergency ay mayroon kang nakahandang pera.

2. MAG-SET NG FINANCIAL GOALS. Kailangan mo ito gamitan ng diskarte upang makapag-ipon para sa future at pamilya mo, dahil ‘pag may maayos kang plano, magiging mas madali ang pag-iipon para sa iyo. Maaari ka ring mag-isip ng ibang paraan kung paano mapapaikot ang pera, tulad ng pag-iinvest para naman hindi lang natutulog ang savings mo sa bangko.

3. I-TRACK ANG EXPENSES. Sa pamamagitan nito, malalaman mo kung gaano kalaki ang iyong nagagastos, at masusuri mo rin ang mga gastusin mo kada buwan.

4. BE WILLING TO MAKE SACRIFICES. Kung nais mong magtipid ay kailangan mo rin magsakripsyo tulad ng pagbabawas ng monthly online subscriptions gaya ng Spotify at Netflix upang mabawasan ang iyong credit card bills. Maganda rin kung idi-discuss mo sa iyong pamilya ang mga ginagawa mong money sacrifices. Kapag ginawa mo ito, maaari mo rin silang ma-inspire para isakripisyo ang kanilang mga luho upang mas makatipid kayo. Sa ganu’ng paraan, makakapagtulungan pa kayo para makaahon mula sa utang.

5. MAGKAROON NG EXTRA SOURCE OF INCOME. May mga panahon talagang kapos ang suweldo mo, tapos may mga debt collector pang nangungulit sa ‘yo, kaya dapat ay magkaroon ka ng extra source of income.

6. ‘WAG MANGUTANG KUNG HINDI KAILANGAN. Sa hirap ng buhay ngayon, dapat mong pag-isipan kung kailangan mo ba talagang mangutang. Kung walang-wala ka na talaga, saka mo lang ikonsidera ang pangungutang ng pera sa iba.

7. ‘WAG MAGPAPADALA SA ‘PAMBUBUDOL’ NG IBA. Patunayan mong ikaw ay certified wais sa pamamagitan ng ‘di pagpapa-impluwensya sa pambubuyo ng iba na sumunod sa uso. Tandaan, hindi ka magiging tunay na maligaya kahit pa mayroon kang latest phone every time na may bagong release kung ang kapalit naman nito ay ang pagkalubog mo sa utang na hindi mo mabayad-bayaran.

8. MAGING KUNTENTO SA KUNG ANO ANG MAYROON KA. Ang pinakasimpleng paraan para makaiwas sa utang at makapag-ipon ng pera, ay ang makuntento sa kung ano ang mayroon ka. Hindi naman masamang maghangad ng mga magagandang bagay para sarili at pamilya, kailangan n’yo lang makuntento sa mga simpleng bagay.

Maraming dahilan kung bakit nangungutang ang mga tao at hindi naman masamang mangutang, lalo na kung kinakailangan. Kaya mga ka-BULGAR bago kayo mangutang, maging wais para hindi kayo mabaon sa utang. Okie?