Nakapagpundar ng mga bahay at negosyo… Pinaka-rich na pulubi sa buong mundo, may P50M

ni Jenny Rose Albason G. Vieron @Life & Style | June 17, 2023

Magkano pa ang laman ng wallet mo? May natira pa ba sa suweldo o literal na dumaan lang sa kamay dahil napunta na sa mga bayarin at pinagkakautangan?

Well, kung ang iba ay nagkakandakuba na sa pagtatrabaho pero mahirap pa rin, iba naman ang diskarte ng isang mister sa bansang India.

Sino'ng mag-aakala na sa kanyang pamamalimos ay puwede siyang maging milyonaryo at makapagpundar ng mga bahay, negosyo, at makapagpaaral ng mga anak?

Ang ating tinutukoy ay si Bharat Jain, naninirahan sa Mumbai, India, na ayon sa report ng Economic Times ay tinaguriang "World's Richest Beggar".

Si Jain ay hindi pormal na nakapag-aral dahil sa kahirapan, at sa ngayon ay mayroon siyang asawa at dalawang anak na lalaki. Kasama rin niya ang kanyang ama at kapatid.

Sa pamamagitan ng pamamalimos sa lansangan ng Mumbai, si Jain ay kumikita ng 60,000 hanggang 75,000 rupees o katumbas ng P39,000 hanggang P49,000 buwan-buwan o mahigit P1,500 kada araw.

Ang kanyang 10 hanggang 12 oras na pamamalimos araw-araw ay nagbunga ng two-bedroom flat na nagkakahalaga ng P7.9 million at dalawang stationary store na inuupahan niya nang P19,900 kada buwan.

Sa kabila ng yaman, patuloy na namamalimos si Jain, kahit pa pinatitigil na siya ng pamilya. Kaya kinikilala ngayon si Jain na pinakamayamang pulubi sa buong mundo. Kung saan, tinatayang nasa halos P50 milyon na ang net worth nito.

Masasabing kakaiba o nakakagulat ang istilo ni Jain para kumita ng pera, malamang may mapapa-"sana all" pa, pero tiyak may mga magtataas din ng kilay.

Babala naman sa mga nagbabalak na mamalimos dahil na-inspire kay Jain, labag 'yan sa batas ng 'Pinas. Mayroon tayong "Presidential Decree No. 1563 o Anti-Mendicancy Law", na mahigpit na ipinagbabawal ang pamamalimos at magpalimos, puwedeng makulong.

Health Tips: Mga pagkaing mabilis magpahilom ng sugat

ni Mabel G. Vieron @Life & Style | May 30, 2023

Ang sugat ay ang karaniwang problema na maaaring makaapekto sa ating kalusugan. Mahalaga na alagaan natin ito at sundin ang payo ng doktor upang maiwasan ang komplikasyon.

Bukod sa mga gamot, alam niyo bang mayroon ding ilang pagkain na maaaring makatulong upang mabilis na humilom ang mga sugat, impeksyon, at iba pang sakit?

Narito ang ilan sa kanila:

∙ VITAMIN C. Ito ay makukuha sa mga prutas tulad ng kalamansi, dalandan, suha, bayabas, at strawberries. Maaari rin itong makita sa mga gulay tulad ng repolyo, broccoli, at kamote. Puwede mo ring gawing salad ang bayabas at kamote na may kasamang yogurt o keso.

∙ PROTEIN. Ito ay isang mahalagang nutrisyon na kailangan upang mapabilis ang paggaling ng mga sugat. Nakukuha ito sa mga karne tulad ng manok, baboy, baka, at isda. Maaari rin itong makita sa itlog, gatas, keso, yogurt, tofu, beans, at nuts. Puwede mong lutuin ang manok o baboy na may kasamang bawang at sibuyas para sa isang masarap na ulam na mayaman sa protina.

∙ ZINC. Ang zinc ay nakakatulong upang mapalakas ang ating immune system. Nakukuha ito sa mga seafood tulad ng tahong, hipon, alimango, at talaba. Ang iba pang mga pinagkukunan ng zinc ay ang mga butil tulad ng oatmeal, quinoa, at brown rice.

∙ HONEY. Ito ay isang natural na sweetener na may antimicrobial properties. Ito ay nakakapatay ng ilang uri ng bacteria na maaaring maging sanhi ng impeksyon sa sugat. Ang honey ay maaari ring magbigay ng nutrients sa sugat upang mapabilis ang paggaling nito. Maaari itong ipahid ng direkta sa sugat o ihalo sa tubig at tsaa upang inumin. Puwede mo rin itong ipahid sa iyong sugat bago mo ito takpan ng bandage para sa karagdagang proteksyon.

∙ GARLIC. Ito ay may antibacterial, antifungal, at anti-inflammatory properties. Makakatulong ito upang mapababa ang ating blood pressure at cholesterol levels. Maaari itong kainin ng hilaw o lutuin kasama ang iba pang mga pagkain upang mapakinabangan ang mga benepisyo nito.

Ilan lamang ito sa mga maaaring makatulong upang mas mapadali gumaling ang ating mga sugat, impeksyon, at iba pang sakit. Ngunit hindi sapat ang mga ito para malunasan ang lahat ng mga problema sa ating kalusugan.

Kailangan pa rin natin kumonsulta sa doktor lalo na’t kung mayroon tayong malubhang kondisyon. Kailangan nating sundin ang tamang paraan ng pag-aalaga sa sugat tulad ng paghuhugas gamit ang malinis na tubig at sabon, pagtatakip gamit ang malinis na bandage, pagpapalit nito araw-araw. Sa pamamagitan nito, mas mapabilis natin ang proseso ng paghilom at mas maiiwasan natin ang mga komplikasyon.

Kaya mga beshie, alagaan pa rin natin ang ating katawan, upang wala tayong pagsisihan sa huli. Okie?

Knows n’yo ba ‘yun, mga besh?! Buto ng kamatis, epektib na panlaban sa varicose veins

ni Mabel G. Vieron @Life & Style | May 23, 2023

Ang varicose veins ay isang kondisyon kung saan ang mga valves ng ating ugat ay humihina. Kaya imbes na makabalik nang maayos ang ating dugo patungo sa puso, naiiwanan ito sa mga ugat na nagdudulot ng paglaki nito. Ang varicose veins ay ang naglalakihang ugat sa likod ng binti, kamay at paa.

Narito ang mga tips kung paano maiiwasan ang varicose veins:

1. IWASAN ANG MATAGAL NA PAGTAYO O PAG-UPO. Kung madalas kang nakatayo, mahihirapan ang iyong dugo na makabalik paitaas. Dahil dito, mas lumalakas ang presyon s a mga ugat sa binti na maaaring pagsimulan ng varicose veins. Kung hindi maiiwasan ang matagal na pagtayo o pag-upo, gumalaw-galaw kada 30 minuto upang maibsan at gumanda ang sirkulasyon ng dugo.

2. BANTAYAN ANG IYONG TIMBANG. Ang mga obese ay madalas magkaroon ng namamagang ugat dahil na rin sa sobrang bigat na pangangatawan. Mas nadaragdagan din ang presyon sa mga ugat na maaaring makasira nito. Kaya ugaliin nating kumain nang wasto at masustansyang pagkain. Iwasan din ang masyadong matatamis, matataba at processed foods na nagiging sanhi ng altapresyon.

3. MAG-EHERSISYO. Ang regular na ehersisyo gaya ng jogging, zumba, yoga, at maging ang paglalakad at stretching ay nakakatulong sa magandang sirkulasyon ng dugo sa ating katawan. Ito rin ay nagpapalakas ng mga ugat upang makaiwas sa varicose veins

Kung ikaw ay nagsisimulang magkaroon ng varicose veins at gusto mong maibsan ang mga sintomas nito, halina't alamin natin ito:

1. PAGSUSUOT NG COMPRESSION STOCKING. Ito ay masikip na medyas na madalas aabot hanggang hita kapag isinuot. Ang stockings na ito ay umiipit sa muscle at ugat ng binti upang ‘di ito mamaga. Kinakailangan itong suotin mula paggising at tangalin lamang bago matulog.

2. PAGTATAAS NG BINTI. Ang pagtataas ng binti ay makakatulong upang maibsan ang mga sintomas ng varicose veins. Mas mainam na itaas ang binti nang mas mataas pa sa ating puso. Maaari itong gawin nang 20 hanggang 30 minuto habang nakahiga at 3 hanggang 4 beses sa isang araw.

3. PAGPAPAMASAHE. Ito ay nakakatulong na pagandahin ang sirkulasyon ng dugo sa ating buong katawan. Tandaan lamang na huwag masyadong madiin ang masahe upang hindi mabugbog ang mga ugat.

4. PAGPAPAHID NG BUTO NG KAMATIS. Ang buo ng kamatis ay mayroong salicylic acid gaya ng gamot na aspirin, ito’y makakatulong upang maiwasan na mamuo ang dugo. Ipahid ang buto ng kamatis sa apektadong ugat nang 3 hanggang 4 beses sa isang araw. Gawin ito sa loob ng dalawang buwan.

Oh, mga besh, ‘wag na masyadong malungkot kung mayroon kang ganito sa iyong katawan, sundin lamang ang tips na nasa itaas at makakasigurado kang effective ito.

Gets mo?