Magulang, dapat protektor ng anak, hindi bugaw!

ni Leonida Bonifacio Sison - @Boses | January 24, 2021

Hindi pa rin tapos ang isyu ng bentahan ng malalaswang larawan at video ng kabataan online.

Kamakailan, 16 menor-de-edad ang nailigtas ng pulisya sa Bulacan, matapos mapag-alamang ginagamit ang mga ito sa kalaswaan sa internet.

Gayundin, arestado ang ilang suspek na napag-alamang magulang pa mismo ng mga biktima.

Kinumpirma rin sa mga pulis ng lima sa mga biktima ang online sexual exploitation na pinagagawa sa kanila kung saan napag-alaman ding inaalok sa ilang parukyano sa UK ang hubad na video at larawan ng mga bata sa halagang P2,000 hanggang P3,000.

Ayon sa isang opisyal ng PNP-Women and Children’s Protection Center, ni-refer ng UK National Crime Agency na mayroong facilitator sa Pilipinas na nagpapakalat ng mahahalay na larawan at video ng mga bata.

Sa totoo lang, nakalulungkot dahil matagal nang isyu ang child pornography, pero hanggang ngayon ay hindi pa rin natutuldukan. Ang masaklap pa, mismong mga magulang ang nagtutulak sa bata para gawin ang ganitong bagay.

Matatandaang kamakailan, naging usapan din ang umano’y pagbebenta ng malalaswang litrato at video ng ilang estudyante para maitaguyod ang kanilang pag-aaral.

Sa isyung ito, mauunawaan pa natin kung bakit may kumakapit sa patalim, pero ngayong may sangkot na mga magulang, sobrang nakadidismaya. Paano n’yo nasisikmura ‘yan?!

Panawagan sa mga kinauukulan, patuloy na sagipin ang mga batang ito at panagutin ang dapat managot.

At kayong mga walang tigil sa panggagamit sa mga walang muwang na batang ito, makonsensiya naman kayo! Kung gusto ninyong kumita, magtrabaho kayo nang patas.

Sa panahon ngayong halos lahat ay nakadepende sa internet, dapat nating matiyak na hindi nagagamit sa kalaswaan ang mga batang ito.

Bilang mga magulang, tayo ang dapat nagpoprotekta sa ating mga anak laban sa anumang uri ng pang-aabuso.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni LEONIDA BONIFACIO SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Pinaalis na street vendors dahil sa clearing ops, back to business

ni Leonida Bonifacio Sison - @Boses | January 23, 2021

Tila wa’ epek ang mga sermon at babala sa mga barangay matapos ang naunang mga road clearing operations sa Metro Manila.

Ang ending, balik sa dating puwesto ang mga sidewalk vendor tulad ng mga nagtitinda ng pagkain, facemask at face shield sa Roxas Boulevard Service Road kung saan magkakatabi na naman ang mga ito.

Sa Barangay 76 naman, ginawang parking area ang isang linya ng kalsada at ginagamit pa ang orange yellow plastic barrier ng MMDA bilang pangharang sa kalsada ng mga nakaparadang sasakyan.

Sa kahabaan naman ng Taft Avenue Extension sa ilalim ng LRT, balik din ang tindahan sa mga bangketa at may mga nakaparada ring pedicab sa kalsada.

Samantala, sa Barangay 145 kung saan nagkaroon pa ng tensiyon ang clearing operations noong nakaraang linggo, balik-operasyon ang mga nagtitinda ng pagkain.

Una nang iginiit ng mga barangay officials sa lungsod na hirap silang panatilihing malinis at maayos ang kanilang lugar dahil idinadahilan umano ng mga vendor ang kanilang kabuhayan.

Hindi maitatangging marami pa ring hirap sa kabuhayan dahil sa pandemya, pero kung tutuusin, kailangan talagang sumunod sa kautusan.

Gayunman, panawagan sa mga lokal na pamahalaan, baka puwedeng hanapan ng malilipatan ang mga apektadong street vendors.

Kaya lang naman pabalik-balik ang mga ito, hindi dahil pasaway sila kundi dahil wala silang choice. Kumbaga, no choice kundi kumapit sa patalim para lang maibsan ang kumakalam na sikmura.

Pero sa kabilang banda, nakadidismaya pa rin dahil ang lalakas nating mag-demand ng maayos at malinis na kalsada, pero wala rin naman tayong ginagawa para makatulong. Ang ending, sayang ang pagsisikap ng nasyonal at lokal na pamahalaan.

Ngunit kung magagawan ng paraan o mabibigyan ng bagong malilipatan ang mga apektadong street vendors, mas malamang na maiiwasan ang pagbalik ng mga ito sa mga nilinis na kalsada.

‘Ika nga, tulungan at disiplina lang para maibalik ang kaayusan at kalinisan ng mga kalsada.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni LEONIDA BONIFACIO SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Taas-sahod at price control sa gitna ng pandemya, pag-aralan!

ni Leonida Bonifacio Sison - @Boses | January 22, 2021

Alam naman nating ang kawalan ng matatag na suplay ng pagkain ang dahilan kaya nananatiling mataas ang presyo sa ilang pamilihan.

Ito ay dahil apektado ng malamig na panahon ang suplay ng gulay sa ilang probinsiya tulad ng Benguet, Laguna, Nueva Ecija, Pangasinan, La Union at Bicol Region.

Dahil dito, patuloy na umaaray ang maraming mamimili dahil habang pataas nang pataas ang presyo ng bilihin, nananatiling mababa ang sahod. Ang masaklap, ‘yung ibang kababayan natin ay nawalan ng hanapbuhay, kaya ang tanong, saan pa kukuha ng pangkain?

Kaugnay nito, ilang grupo ng manggagawa ang nananawagan ng agarang umento sa sahod at pagkokontrol ng presyo ng mga bilihin sa gitna ng COVID-19 pandemic.

Giit ng grupo, halos magkandalula na ang maraming Pilipino sa mga gastusin, lalo na’t tumitindi ang pandemya at krisis pang-ekonomiya.

Base sa price monitoring ng Department of Agriculture (DA) noong Martes, Enero 19, 2021, ang kilo ng liempo ay nasa P400, beef rump sa P400, buong manok sa P170, repolyo sa P200, Baguio pechay sa P150, pulang sibuyas at imported bawang sa P100 at siling labuyo na aabot ng hanggang P1,000.

Matatandaang Nobyembre 2018 nang huling nagkaroon ng wage hike sa National Capital Region (NCR) at sa kabila ng paghain ng wage hike petition noong 2019, ibinasura lamang ito.

Samantala, mas mababa naman ang minimum wage sa probinsiya.

Giit ng isang grupo, maaari ring ipatupad ang pagpigil sa bara-barang pagtataas ng bilihin.

Sa totoo lang, kung mananatiling mataas ang presyo ng bilihin at mababa ang sahod, paano pa mabubuhay ang mga ordinaryong manggagawa, lalo na ang mga nawalan ng trabaho dahil sa pandemya?

Bagama’t may mga natanggap tayong tulong mula sa gobyerno, aminin natin na hindi ito sapat dahil ito’y pansamantalang solusyon lang.

Kaya panawagan sa mga kinauukulan, habang tinutugnan natin ang pandemya, tutukan din ang ganitong mga problema.

Baka kasi natutugunan nga natin ang mga problemang dala ng pandemya, kung kumakalam ang sikmura ng taumbayan ay wala rin.

Napakalaking hamon nito para sa ating lahat, kaya utang na loob, ‘wag nating ipagsawalambahala ang mga bagay na ito.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni LEONIDA BONIFACIO SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com