Ayuda at bakuna, tugon sa pandemya

ni Leila De Lima - @Laban lang! | July 04, 2021

Mahigit isang taon na nating nararanasan ang krisis na dulot ng pandemya kaya patuloy ang pagdausdos ng ekonomiya. Nagsara ang maraming negosyo dahilan para mawalan ng trabaho ang maraming Pilipino.

Kaya sa simula pa lang, maigting na nating panawagan ang pagkakaloob at pagpapabilis ng ayuda, lalo na para sa matagal nang hikahos sa buhay. Marami sa ating mga kababayan ang bago pa man ang pandemya, pilit nang pinagkakasya ang kita sa kanilang pang-araw-araw na pangangailangan.

Paano pa kaya kung nawalan pa sila ng trabaho dahil nalugi ang kumpanya o kasama sila sa mga na-retrench o kinailangang mabawas na empleyado?

Kaya hindi maiwasan ang pag-asam ng marami sa agarang tulong at ayuda mula sa gobyerno. At ito rin ang dahilan kaya lubos ang pasasalamat at pagsuporta ng mga Pilipino sa community pantry.

Nauna na nating nabanggit ang halaga ng ayuda para maibsan ang pagkalam ng sikmura ng marami nating kababayan at mabigyan sila ng kakayahan na makatawid sa bawat araw. Hindi ibig sabihin nito ay gagawin na lang silang dependent, tamad o palaasa. Mayroon lang talagang pagkakataon o sitwasyong kahit anong sipag o kayod ang gawin ay wala silang maipantustos dahil sa labis na kahirapan, pagkakaroon ng karamdaman o pagdating ng biglaan at matinding trahedya o sakuna.

Ito ang prinsipyong itinaguyod natin ng ating isabatas, bilang Chairperson ng Senate Committee on Social Justice, Welfare and Rural Development, ang Pantawid Pamilyang Pilipino Program (4Ps) Act noong 2019. At kita naman natin, lalung-lalo na ngayong panahon ng pandemya, kung gaano kalaki ang naitutulong nito sa milyun-milyong pamilyang benepisaryo.

Kaya nang magkaroon ng mungkahi na huwag ipagkaloob ang cash grant ng 4Ps sa mga hindi pa nagpapabakuna, agad tayong tumutol dito. Ang 4Ps ay tulong sa mga nangangailangan. Hindi ito kasangkapan para pilitin ang mga tao na naghahanap ng paglilinaw at impormasyon tungkol sa bakuna.

Linawin lang natin: Dapat makapagpabakuna agad ang mga Pilipino dahil ito ang pinakamabisang panlaban sa mga direktang pinsalang dulot ng COVID-19. Pero hindi makatarungang ipagkait ang ayuda sa mga nag-aalinlangan pa. Kung walang ayuda at wala pang bakuna, nasaan ang hustisya?

Para sa atin, okay lang kung hindi na inaanunsiyo o walang prior announcement sa kung ano ang ibibigay na bakuna. Pero ang mahalaga at nararapat pa rin na pagdating sa lugar ng pagpapabakuna ay maipaalam sa babakunahan kung ano ang ituturok at kung ano ang posibleng side effect nito. Karapatan ‘yun ng bawat Pilipino.

Malinaw kung ano’ng klaseng bakuna ang gusto ng karamihan sa ating mga kababayan at hindi natin maiaalis sa kanila na magkaroon ng pagkiling at timbangin muna kung ano’ng nararapat sa kanila. Huwag nating ipagkait iyon sa kanila.

Patuloy ang ating panawagan para sa mabilis na pamamahagi ng bakuna at ayuda. Kaakibat ng ating pag-iingat, dasal natin ang kaligtasan ng bawat isa, ang pagbangon ng ekonomiya at ang tiyak na kabuhayan para sa mga Pilipino para maitaguyod ang pamilya at ang marangal na pamumuhay.

Ingat tayo palagi. Laban lang!

#LABANLANG

Tagumpay at pag-asang hatid ng 4Ps

ni Leila De Lima - @Laban lang | June 20, 2021

Sa nakaraang dalawang episodes ng ACRONYMS: Work from Prison (WFP), na napapanood tuwing Martes ng gabi, sa ating official Facebook page (leiladelimaofficial), naging tema ang 4Ps Act, o ‘yung “Institutionalization of Pantawid Pamilyang Pilipino Program.”

Sa pamumuno ng inyong lingkod bilang Chairperson ng Senate Committee on Social Justice, Welfare and Rural Development, naipasa bilang ganap nang batas ang pagpapatatag ng 4Ps. Ibig sabihin, kahit magpalit man ng administrasyon, mananatili ang implementasyon ng programa.

Sa ngayon, nasa 4.4 milyong pamilya na ang benepisaryo ng 4Ps, o halos ikalima ng ating populasyon. Ayon kay dating DSWD Secretary Dinky Soliman, na naging guest sa Episode 4 ng WFP, malaki ang naitutulong nito para makalampas sa poverty line o maiangat ang buhay ng mahihirap na pamilyang Pilipino.

Ayon sa datos ng DSWD, daan-daang libo nang mag-aaral na benepisaryo ng 4Ps ang nakapagtapos at nagkatrabaho, at sila na ngayon ay nakatutulong sa kani-kanilang pamilya.

Pero hindi natin inaasahan ang krisis na dulot ng COVID-19. Dahil sa pandemya, marami sa ating mga kababayan ang napasama sa tinatawag na “new poor” dahil nawalan ng trabaho at pagkakakitaan.

Sa mga ganitong panahon, nakikita ang halaga ng pagbibigay-suporta at ayuda sa mga nangangailangan tulad ng 4Ps. Malinaw na hindi ito limos o dole out lang, kundi investment at pagbibigay ng kakayahan sa mga kapus-palad na dumaraan sa mahigpit na pagsubok dahil sa labis na kahirapan o matinding sakuna.

Ito ang ibinahaging kuwento ni Jeana Catacio, Presidente ng Samahan ng Nagkakaisang Pamilya ng Pantawid (SNPP), na nagsilbing katuwang natin sa pagsasabatas ng 4Ps.

Ibinahagi niya sa Episode 5 ng WFP ang pinagdaanan nilang pagsubok nang nawalan ng trabaho ang kanyang asawa dahil nagsara ang pinapasukan nitong kumpanya. Nangamba siya kung paano na matutustusan ang pangangailangan ng pamilya, lalo na ng kanyang tatlong anak.

Laking pasasalamat ni Jeana nang natanggap siyang benepisaryo ng 4Ps, kung saan nakatanggap siya ng cash grant alinsunod sa mga kondisyon na inilatag ng programa tulad ng pagpapaaral at pagsiguro sa kalusugan ng mga anak, pati na ang pagdalo sa mga family development session tungkol sa pagiging aktibong mamamayan.

Ang kuwento ni Jeana ay isa lamang sa milyun-milyong kuwento ng tagumpay ng 4Ps. Taliwas ito sa sinasabi ng ilan na nagiging tamad ang mga benepisaryo dahil nag-aabang lang ng mga benepisyo, dahil mas nagiging masigasig pa sila na makaahon sa kahirapan dulot ng pag-asang hatid ng programa. Kuwento pa ni Jeana at ayon na rin sa datos ng DSWD, marami sa mga graduate na bahagi ng 4Ps ay honor students!

Ang mga tulad ni Jeana, at ng marami pa nating kababayang natutulungan ng 4Ps ang inspirasyon sa pagsusulong ng iba pang mahahalagang batas para makatulong sa mahihirap nating kababayan.

Kaya tuloy lang tayo sa pagtutulungan. Laban lang!

#leiladelima

Imbestigasyon ng Senado sa PhilHealth, cover up lang daw…

Sen. Gordon kay Leila De Lima: Bitter ka lang!

ni Twincle Esquierdo | September 2, 2020

Itinanggi ni Sen. Richard Gordon ngayong Miyerkules ang paratang na cover-up lang ang ginawang imbestigasyon ng Senate Blue Ribbon Committee sa Philippine Health Insurance Corporation (PhilHealth) noong 2019 para mapagtakpan ang mga kaalyado ni Pangulong Rodrigo Duterte sa mga alegasyong ibinabato sa kanila sa loob ng nasabing ahensiya.

Inirekomenda ni Sen. Richard Gordon na sampahan ng kaso sina dating Budget Secretary Florencio “Butch” Abad, dating Health Secretary Janette Garin at PhilHealth President at CEO Alexander Padilla dahil sa paglipat ng P10.6 bilyong pondo ng PhilHealth noong 2015 na mariing itinanggi ng tatlo.

Bago nito, matatandaang sinabi ni Sen. Leila De Lima na, “The Senate Blue Ribbon Committee’s report on a 2019 probe on the alleged fraud and corruption in the Philippine Health Insurance Corp. (PhilHealth) is nothing but a cover-up and an attempt at damage control in favor of President Duterte and his men in the agency.”

“One has to question the sincerity of this report; whether the real intent is to shield Mr. Duterte’s men in PhilHealth from accountability,” dagdag pa niya

“What can I expect from Senator De Lima? She is very bitter,” sagot ni Sen. Gordon sa pagbibintang umano na cover-up ang isinagawang imbestigasyon sa PhilHealth.

Ipinaliwanag ni Sen. Gordon na wala siyang hinihiling na pabor kay Pangulong Duterte bilang kapalit ng ibinibintang sa kanyang cover-up.

Aniya pa, “Wala naman akong hinihingi kay President Duterte. I have not seen him for the last two or three years. Second, we have not talked. Third I have been very tough on him on the extra-judicial killings, and I am against the death penalty.”

Ayon pa kay Sen. Gordon, hindi siya sang-ayon sa ilang pamantayan tungkol sa iba't ibang isyu ni Pangulong Duterte, maging ang pagkondena sa Simbahang Katoliko. Ipinapakita ni Sen. Gordon na ginagawa lamang niya ang kanyang trabaho at nagbabase sa mga ebidensiyang meron siya.