Baha at landslide sa Davao del Sur

ni Mai Ancheta | June 22, 2023

Nagpatupad ng mabilisang paglilikas ang mga operatiba ng Digos City Disaster Risk Reduction and Management Office sa mga residente ng 12 barangay dahil sa pagbaha at landslide nitong Martes ng gabi sa Digos City, Davao del Sur.

Ang pagbaha ay epekto umano ng mga pag-ulan dulot ng Inter-Tropical Convergence Zone o ITCZ na nagdulot ng pagbaha sa ilang mga barangay sa bayan ng Sta. Cruz at Digos City.

Batay sa report, naapektuhan ng landslide ang tatlong bahay sa Bgy. Kapatagan at nakaiwas sa peligro ang mga nakatirang pamilya dahil sa maagap na pagpapalikas sa mga ito bago pa man gumuho ang lupang kinatayuan ng tatlong bahay.

Tumaas din ang tubig sa mga kalsada sa bayan ng Sta. Cruz kung saan maraming mga motorista ang na-stranded sa highway, habang nagmistulang ilog naman ang mga kalsada sa isang barangay sa bayan ng Bansalan dahil sa mataas na tubig-baha.

Maging sa bayan ng Matanao ay umapaw din ang tubig-baha at marami ring mga motorista ang na-stranded.

Inaalam na ngayon ng Provincial Disaster Risk Reduction and Management Office ang lawak ng pinsalang idinulot ng baha at landslide sa nabanggit na mga lugar.

5 anak patay sa landslide, mag-asawa, nadale rin

ni Lolet Abania | November 14, 2021

Patay ang limang bata habang dalawa pa sa isang pamilya ang nasugatan matapos ang naganap na landslide sa Illigan City, Lanao del Norte ngayong Linggo.

Sa inisyal na imbestigasyon ng pulisya, naganap ang pagguho bandang alas-6:00 ng umaga sa Purok 2, Sitio Sawsaw, Taparak, Barangay Mandulog, kung saan walong bahay malapit sa ilog ang naapektuhan.

Kinilala ni Mandulog Barangay Captain Abungal Pagsidan Cauntongan ang mga biktima, lahat sila ay pamilya Barulan na sina Shemabel, 7-buwan-gulang; Trishamae, 3; John Kent, 6; Sean, 4 at CJ Barulan, 8-anyos.

Sugatan naman ang mag-asawang sina Sheila Mae Barulan, 26 at Jessie Barulan 24 dahil sa landslide.

Sinabi ni Cauntongan, walong kabahayan ang nawasak habang ang tirahan ng mga Barulan ang natabunan nang husto ng lupa.

Ayon kay Iligan City Police Office spokesperson Police Major Zandrex Panolong, naganap ang landslide matapos ang walang humpay na malalakas na buhos ng ulan sa Iligan City, kung saan labis na naapektuhan ang mga bahay na malapit sa ilog.

Sinabi rin ni Panolong na maaga pa nang mangyari ang insidente, kaya nasa loob ng bahay at natutulog pa ang lahat ng miyembro ng pamilya Barulan.

Agad na humingi si Cauntongan ng assistance mula sa lokal na pamahalaan para sa clearing operation at para na rin sa pagbabalik ng power supply sa naturang lugar.

23 patay sa gumuhong pader at landslide sa India

ni Lolet Abania | July 18, 2021

Tinatayang nasa 23 katao ang namatay matapos na maraming tirahan ang nawasak sanhi ng gumuhong pader kasabay din ng landslide dahil sa malakas na Monsoon rains sa capital ng Mumbai, India ngayong Linggo.

Ayon sa National Disaster Response Force (NDRF), ang bumagsak na puno ang nakasira ng pader sa eastern suburb ng Chembur nitong Linggo nang umaga, kung saan may mga residente na nalibing nang buhay.

Umabot sa 17 bangkay ang narekober ng mga awtoridad mula sa pagguho, habang patuloy ang mga rescuers sa paghahanap sa iba pang labi at sa posibleng survivors sa insidente.

Batay din sa NDRF, sa suburb ng Vikhroli sa hilagang-silangan ng lungsod, 6 katao ang nasawi matapos ang landslide habang limang kabahayan ang matinding tinamaan nito ngayong umaga rin ng Linggo.

Karaniwan na ang mga pagguho ng mga gusali sa India sa tuwing Monsoon season mula Hunyo-Setyembre kung saan maraming mga lumang istruktura ang nanganganib na gumuho dahil sa walang tigil na mga pag-ulan.

Una nang iniulat nitong Sabado na ang Mumbai na tirahan ng 20 milyon indibidwal ay labis na naapektuhan dahil sa walang tigil na pagbuhos ng ulan, habang apektado rin ang kanilang local transport services.

“There will be moderate to heavy rains or thundershowers for the next two days,” ayon sa forecast ng Indian Meteorological Department ngayong Linggo. Naghayag naman ng pakikiramay si Prime Minister Narendra Modi sa kanyang tweet at sinabing magbibigay sila ng financial compensation para sa pamilya ng mga biktima.