Iba’t ibang sanhi at solusyon sa pananakit ng tiyan

ni Jersy L. Sanchez - @Life & Style| February 14, 2022

Isa sa pinakaayaw nating feeling ay ‘yung masakit ang tiyan. Bukod sa hindi natin alam kung ano’ng nagti-trigger dito, pahirapan ang pagkain dahil tila ‘di natin malaman kung ano ang gusto ng tiyan natin.

Marahil, ‘yung iba ay may kaalaman na kung ano ang dahilan ng pananakit ng kanilang tiyan, for sure, marami pa sa atin ang walang kaalam-alam kung bakit tayo nakakaramdam nito at kung ano ang dapat gawin para maibsan ito.

Kaya naman, kung isa ka sa mga taong ‘di mapakali ang tiyan, read mo ‘to dahil narito ang iba’t ibang sanhi ng pananakit ng tiyan at paraan upang solusyunan ito:

1. GAS. Bagama’t normal ang ‘gas’ o utot dahil parte ito ng digestive process, ang sobrang gas ay maaaring maging sanhi ng pananakit ng tiyan, cramping at bloating. Gayunman, ang “excess gas” ay posibleng resulta ng pagkonsumo ng mga pagkaing nagpo-produce ng gas tulad ng beans, cruciferous vegetables tulad ng broccoli, repolyo, cauliflower, collard greens, kale atbp. Samantala, may mga medical conditions din tulad ng celiac disease, irritable bowel syndrome (IBS), o small intestine bacterial overgrowth.

2. CONSTIPATION. Ito ‘yung hirap ka sa pag-“poop” at sa ibang salita, bihira kang dumumi sa isang linggo. Sey ng experts, posibleng ito ay dahil sa hindi magandang diyeta, kakulangan ng pag-e-ehersisyo o ibang kondisyon tulad ng IBS. Kapag may constipation ka, posible kang makaramdam ng paninikip, cramping o “sharp pain” sa iyong abdomen, gayundin ang pagkahilo. Inirerekomenda ng mga eksperto ang pagdaragdag ng fiber sa diet, regular na pag-e-ehersisyo at pag-inom ng mas marami pang tubig. Gayundin, puwedeng mag-take ng over the counter laxative. Ngunit kung matagal-tagal ka nang nakararanas ng chronic constipation, mas mabuting kumonsulta sa doktor upang magkaroon ng mas angkop at mabisang treatment.

3. GASTRITIS. Ang gastritis ay pamamaga ng stomach lining, na nagreresulta sa pagkahilo at pagsusuka pagkatapos kumain. Ito ay kadalasang resulta ng pag-inom ng alak, helicobacter pylori bacteria, ang karaniwang sanhi ng peptic ulcer disease. Para naman mabawasan ang gastritis symptoms, bawasan ang pag-inom ng alak, iwasan ang acidic at maanghang na pagkain at bawasan ang portion ng pagkain. Ngunit kung hindi nabawasan ang mga sintomas kahit ginawa na ang mga nabanggit, mas oks na magpa-check up na.

4. LACTOSE INTOLERANCE. Ibig sabihin, hindi nada-digest ang lactose o ang sugar na nasa gatas. Kung ikaw ay lactose intolerant, ang pagkonsumo ng gatas ay maaaring mauwi sa abdominal pain o cramping, diarrhea, bloating at pagkahilo.

5. FOOD POISONING. Nangyayari ito kapag nakakain ka ng pagkaing contaminated ng bacteria, parasites, virus o iba pang toxins. Ayon sa mga eksperto, ang karaniwang sintomas ng food poisoning ay pagkahilo at pagsusuka, abdominal pain at cramping, at pagtatae. Gayunman, ang ilang kaso ng food poisoning ay puwedeng magamot ng antibiotics o anti-parasitics, pero kadalasan, kusang nakakarekober ang nabiktima ng food poisoning at habang nagpapagaling, inirerekomenda ng mga eksperto ang pag-inom ng tubig kahit pakonti-konti. Gayundin, para ma-replenish ang nawalang electrolytes dahil sa pagsusuka at pagtatae, uminom ng sports drinks, sabaw at fruit juice.

Ayan, mga besh, no more hulaan kung bakit masakit ang inyong tiyan at mas malinaw na ang mga dapat at ‘di dapat gawin ‘pag nakaramdam ng pananakit nito.

Pero tandaan, kung paulit-ulit ang nararamdaman, tiyaking kumonsulta sa doktor para sa mas angkop na treatment. Okie?

Kalmahan mo lang, besh! 5 tips para sa successful career

ni Jersy L. Sanchez - @Life & Style| February 7, 2022

Sino ba naman ang may ayaw ng successful career? Siyempre, wala! Marahil, ito ang dahilan kaya marami sa atin — millennial man o hindi— ang nagsisikap upang magkaroon ng maunlad na career.

‘Yung iba, bumubuo muna ng career plan para magkaroon ng direksiyon ang kanilang professional growth. Well, malaking hakbang ito at magandang simula, lalo na para sa mga pursigidong ma-establish ang kanilang sarili. Pero bukod sa pagkakaroon ng career plan, anu-ano pa nga ba ang mga hakbang para magkaroon ng successful career?

1. IMPROVE SKILLS. Bago ang lahat, kailangang “skilled” o hasang-hasa ka sa ginagawa mo. ‘Ika nga, kailangan mong ma-master sa industriyang pinasok mo at para magawa ito, kinakailangang maglaan ng effort at oras para hasain ang iyong skills. Gayunman, advantage para sa iyo kapag sumubok ka ng mga bagong skills kaya naman, ‘wag matakot na gamitin ang iyong strengths nang sa gayun ay maging asset ka ng kumpanya.

2. TIYAGA PA MORE. Kailangan mong maging matiyaga dahil bago ka magtagumpay, tiyak na mahaharap ka sa maraming pagsubok. Gayunman, isapuso ang mga iyong mga gagawin — matagumpay man ito o hindi — at tiyak na makikita mo ang resulta ng iyong pinaghirapan. Okie?

3. MAG-ADJUST SA MGA PAGBABAGO. ‘Ika nga, “Change is constant,” at hinding-hindi natin ito maiiwasan, kaya naman kailangan nating matutong mag-adapt. Ang isang taong magaling mag-adapt, kayang mag-handle ng mga gawain at magtrabaho sa kabila ng pressure ay ang hinahanap ng mga kumpanya. Ang mabilis na pag-adapt o pag-a-adjust sa mga pagbabago ay isang mahalagang skill para magkaroon ng successful career, lalo na ngayong nahaharap tayo sa pandemic.

4. WORK-LIFE BALANCE. Tandaan, ang pagkakaroon ng career ay hindi nangangahulugan na hindi ka na puwedeng magpahinga. Bagkus, ang indikasyon ng successful career ay ang pagkakaroon ng work-life balance. Kaya sa kabila ng hectic schedule, huwag mong kalimutan ang boundary sa pagitan ng trabaho at personal na buhay.

5. REWARD. Huwag mo ring kalimutang i-celebrate ang mga ‘victories’ o mga successes mo sa trabaho dahil deserve mong i-reward ang iyong sarili dahil sa pagiging masipag mo sa trabaho. Okie?

‘Ika nga, bago natin marating ang tagumpay, katakot-takot na mga pagsubok ang kakaharapin natin. Kaya upang malampasan ang mga ito, ‘wag kalimutan ang limang tips na nasa itaas para sa magaan na journey ng inyong successful career. Gets mo?

Wastong pagdi-disinfect ng bahay pagkatapos magka-COVID

ni Jersy L. Sanchez - @Life & Style| January 27, 2022

Kamakailan, nakapagtala tayo ng libu-libong bagong kaso ng COVID-19 sa bawat araw.

Sa dami ng naitatalang kaso, karamihan dito ay pami-pamilya ang tinamaan, kaya naman ang ending, sama-samang nag-isolate sa bahay.

Kadalasang mild ang sintomas ng mga tinamaan ng sakit, kaya naman keri nang sa bahay na lamang magpagaling at magpalakas. Pero ang tanong, pagkatapos makarekober sa COVID-19, anu-ano ang dapat gawin? Beshies, narito ang ilang tips para sa wastong pagdi-disinfect ng bahay:

1. GLOVES & MASK. Bago sumabak sa pangmalakasang paglilinis ng bahay, siguraduhing protektado ka sa pamamagitan ng pagsusuot ng gloves at mask. Mahalagang hakbang ito nang sa gayun ay hindi direktang dumikit sa iyong mga kamay ang gagamiting disinfectant, gayundin upang hindi ito malanghap.

2. BUKSAN ANG MGA BINTANA. Para matiyak na may sapat na airflow, buksan ang mga bintana habang naglilinis.

3. PALITAN ANG BED SHEETS. Bukod sa mga nagamit na damit, labhan din ang nagamit na bed sheet at ilagay sa “warm” ang water setting ng inyong washer at tiyaking matutuyo ito nang maayos. Gayunman, kung mano-mano ang paglalaba, gumamit lamang ng maligamgam na tubig na pangbanlaw sa mga labahan.

4. BATHROOM & TOILETS. Siyempre, isama na rin natin ang CR, lalo pa’t madalas itong ginagamit ng pamilya. Tiyaking na-disinfect nang tama ang toilet, lababo atbp.

5. BLEACH-WATER SOLUTION. Ayon sa Philippine Hospital Infection Control Society, maaaring gumamit ng tatlo hanggang apat na kutsaritang bleach sa isang galong tubig. Gumamit lamang ng basahan na may kaunting bleach water solution at punasan ang mga surface na madalas mahawakan tulad ng switch ng ilaw, door knob, lamesa at upuan.

Napakahalaga ng wastong pagdi-disinfect ng bahay, nagka-COVID-19 man tayo o hindi.

Tandaan na kailangang maging ligtas ng ating tahanan sa lahat ng pagkakataon kaya tiyaking tama ang paglilinis nito, lalo na kung may mga miyembro ng pamilya na posibleng makapagdala ng virus dahil palaging nasa labas. Stay safe, ka-BULGAR! Okie?