ni Janiz Navida @Showbiz Special | March 16, 2026
Photo: Gov. VIlma Santos-Recto at Bong Suntay - Interview - RTVM
Nagmistulang fans’ day na naman ang ginanap na Cine Filipina Women’s Month Screening ng Film Development Council of the Phils. (FDCP) kahapon sa The Metropolitan Theater dahil sa presensiya ng nag-iisang Star for All Seasons na si Batangas Gov. Vilma Santos-Recto.
Bilang selebrasyon ng National Women’s Month, naimbitahan si Gov. Vilma para sa special screening at talkback session ng first and last indie film niyang Ekstra na ipinalabas noong 2013.
Kahit marami nang nakapanood noon sa Ekstra at paulit-ulit pa ngang pinanood lalo na ng mga diehard Vilmanians na tulad namin, ilang beses pa ring pinalakpakan ang mga eksena ni Ate Vi at marami pa rin ang pinaiyak niya dahil sa awa sa kanya bilang si Loida Malabanan na isang dakilang ‘ekstra’ ang role.
Puring-puri naman ni Ate Vi ang kanyang direktor sa pelikula na si Direk Jeffrey Jeturian dahil naipakita raw nito sa Ekstra ang totoong kalagayan at nararanasan ng mga ekstra sa pelikula tulad ng walang sariling stand-by area sa taping o shooting, nauubusan ng pagkain kung minsan at halos magdamagan ang trabaho pero kakarampot ang talent fee.
Ang matinding malasakit sa mga tinatawag na ‘ekstra’ sa pelikula ang dahilan kaya agad napapayag si Ate Vi nang i-offer sa kanya ng Quantum Films noon ang Ekstra. Kahit nga raw wala pang script, nu’ng marinig pa lang niya ang kanyang role ay ‘go’ na siya agad.
Gusto niya kasing mabigyang-pansin ng mga producers ang mga ‘ekstra’ na sabi nga ni Ate Vi, malaking bahagi sa isang pelikula o serye, dahil kung wala ang mga ito, walang magbibigay-suporta sa mga bida.
At nagbunga naman ito dahil ngayon ay na-elevate na ang tingin sa mga ekstra na bukod sa ‘talents’ na ang tawag sa kanila, nag-level-up na rin ang mga benefits na kanilang nakukuha at mas may pagpapahalaga na rin sa kanila ang produksiyon.
Kaya naman, malaki ang pasasalamat ni Ate Vi kay Direk Jeffrey Jeturian at sabi nga niya, malaki ang tiwala niya rito kaya kahit pa governor na siya ng Batangas noong 2013 nang ginawa nila ang Ekstra, pumayag siyang maghubad sa ilang eksena at magpakita ng kanyang skin dahil kailangan talagang ipakita para mabigyang-bigat ang naranasan ng kanyang karakter sa movie.
Samantala, pinuri rin ni Ate Vi ang kanyang co-star sa Ekstra na si Ms. Rubi Ruiz na isa rin sa mga may malalaking roles sa movie bukod kay Tart Carlos na gumanap na kapwa niya ekstra.
SA talkback session after ng screening ng Ekstra, diretsahan naming hiningi ang opinyon ng Star for All Seasons sa controversial issue ng pambabastos kay Anne Curtis ni QC 4th District Cong. Bong Suntay.
Bilang isang babae at boses ng kababaihan, bilang artistang inirerespeto ng mga kapwa niya aktor sa industriya at bilang public servant, inamin ni Gov. Vilma Santos-Recto na hindi niya ikinatuwa ang ginawa ni Cong. Suntay kay Anne.
Diretsong sagot ni Ate Vi, “Definitely I’m not happy. That’s why we’ve been talking about women empowerment, it’s about time you should treat women with respect,” na pinalakpakan ng lahat ng nasa The Metropolitan Theater.
Dugtong ng gobernadora, “Nu’ng araw, sinasabi nila, ang babae, nakasunod lang sa lalaki, not anymore. We truly respect our men, but remember, marami kaming kayang gawin. At bigyan n’yo ng respeto ang kakayahan ng isang babae. Hindi ka babae lang. Babae kami.
“So don’t underestimate us. Don’t say bad words against us, kasi kahit paano, aalma kami. Bago ka magsalita nang hindi maganda, tingnan mo muna ang sarili mo,” ani Ate Vi na pinalakpakan uli ng lahat.
Hiningi na rin namin ang opinyon ng aming No. 1 idol tungkol sa sinasabi ng ilang kababayan natin na hindi karapat-dapat humingi ng respeto ang mga babaeng todo-displey ng kanilang katawan at sobrang sexy kung manamit dahil pang-aakit sa kalalakihan ang ginagawa ng mga ito.
Paliwanag ni Ate Vi, “‘Wag naman nilang lahatin ang mga kababaihan. Meron tayong mga kababaihan na hindi nagsusuot ng masasabi nating maayos na pananamit, pero still, wala tayong karapatan para husgahan sila. And these artists na sinasabihan nila ng hindi maganda, ikaw din naman, nagdadamit ka ng sexy, parte ‘yan ng trabaho nila, eh.
“I’m sorry to use the word, hindi sila nagpi-flirt in front of you. You get me? Iba ‘yun. Iba ‘yung nagpi-flirt sila in front of you. Dumadaan lang ‘yan sa ‘yo. Eh, kung parte ng trabaho nila, wala kang karapatang manghusga. Again if I may, tingnan mo muna ang sarili mo bago ka manghusga sa iba, lalo na sa kababaihan,” ang mariin at makabuluhang pahayag ng nag-iisang Star for All Seasons.
So, klaro na ba sa lahat?!
ANYWAY, mga Ka-BULGAR, kung gusto mo ng mas mabilis at fresh na fresh na chikang showbiz nang hindi ka mahuli sa tsismisan, tara, samahan mo ako sa BULGARAN NA online show, Monday to Friday, 3 PM sa BULGAR FB page.
Updated ka na, may libreng shout-out ka pa. Kaya kitakits tayo ngayong Lunes, mga Ka-BULGAR!
