10 Pinoy sa Gaza, tatawid sa Egypt border

ni Eli San Miguel - Trainee @News | November 24, 2023

Nakatakdang tawirin ng sampu sa 26 na Pinoy na nasa Gaza ang border patungong Egypt sa kasagsagan ng alitan ng Israel at Palestine, ayon sa Department of Foreign Affairs (DFA) ngayong Biyernes.

Ipinahayag ni DFA Undersecretary Eduardo de Vega ang pagiging positibo na makakalabas ang mga Pilipino sa Gaza sa pamamagitan ng Rafah Border Crossing kasama ang kanilang mga Palestinian na asawa.

Sa kasalukuyan, 111 Pinoy na ang umalis sa Gaza, ngunit 108 lamang ang nakauwi sa Pilipinas dahil nagpasya ang tatlo na manirahan sa Cairo, Egypt.

Nasa 109 na ang kabuuang bilang ng mga Pilipino na nakauwi, kabilang ang isang sanggol na ipinanganak sa Cairo 12 araw na ang nakalilipas.

8th batch ng mga 'Pinoy mula Gaza, inaasahang darating ng Biyernes

ni Angela Fernando - Trainee @News | November 17, 2023

Nag-anunsyo ang Department of Migrant Workers (DMW) na inaasahang darating ngayong Biyernes ang isa pang batch ng mga Filipino repatriates mula sa Israel.

Ito ay ang ika-8 batch na mga repatriate mula sa Israel na binubuo ng 32 Pinoy.

Ayon kay DMW officer-in-charge Hans Leo Cacdac, umaabot na sa 264 ang kabuuang bilang ng mga Pilipinong matagumpay na nauwi sa bansa.

Samantala, tatlong karagdagang repatriates ang darating mula sa Lebanon, na may bilang na 31.

Umabot naman sa 150 Pinoy sa Lebanon ang naghihintay pang maproseso ang mga dokumento upang tuluyang makauwi na ng 'Pinas.

Tigil-putukan sa Gaza, inihirit

ni Angela Fernando - Trainee @News | November 16, 2023

Nanawagan ang United Nations Security Council ng agaran at mahaba-habang tigil-putukan sa nagaganap na pag-atake ng Israel sa Gaza para magkaroon ng sapat na panahong makapagpasok ng tulong sa bansa.

Napagtanto ng konsehong binubuo ng 15 na bansa ang mga hakbang na hindi nila napagtagumpayan nu'ng nagdaang buwan, at nakakita ng daan para sa isang resolusyong naglalaman ng panawagang agaran at walang kondisyong pagpapalaya sa lahat ng bihag ng Hamas.

Nag-abstain ang Britain, Russia, at US sa botohan at pabor naman ang 12 na bansa para sa resolusyong isinulat ng Malta nitong Miyerkules.

Nakatuon ang naganap na pagdinig sa panandaliang paghinto o tuluyang tigil-putukan sa gitna ng Israel at Gaza na kailangan ding dumaan sa kanila upang maaprubahan.

Napagdesisyunan naman ng konsehong agarin at mas pahabain ang hiling na paghinto sa pag-atake ng Israel upang masigurong ligtas at maayos na makapasok ang mga tulong.

Sa kasalukuyan, ito ang panlimang subok ng UNSC mula nang sumalakay ang Hamas nu'ng Oktubre 7.