Kapag wala na ang marka ng pambubugbog… NETIZENS, NANINIWALANG BABALIKAN NI JELLIE SI JAM

ni Melba R. Llanera @Insider | Feb. 28, 2025

Photo: Jellie Aw at Jam Ignacio - IG

Sa kabila ng binitawang salita ni Jellie Aw na hindi na matutuloy ang kasal nila ng dating fiancé na si Jam Ignacio na ex-boyfriend ni Karla Estrada, marami pa ring mga netizens ang naniniwala na lumipas lang ang panahon na maghilom ang pisikal at emosyonal na sugat dala ng pisikal na pananakit at lumamig lang ang isyu ay malaki ang tsansa na sa huli ay magkabalikan pa rin ang dalawa. 

Sa ngayon nga ay lumipad na pa-Japan si Jam pagkatapos na personal itong humarap sa tanggapan ng NBI upang kausapin si NBI Director Jaime Santiago at ilang opisyal nu’ng February 21 pagkatapos na hindi nito siputin ang itinakdang araw na dapat ay magtungo siya sa tanggapan noong February 20 kaugnay ng physical abuse case na isinampa sa kanya ni Jellie. 

Sa kanyang social media account naman ay nagbigay ng update si Jellie na kasalukuyang naghihilom na ang kanyang sugat. May pasa pa siya sa mata at basag pa ang ngipin pero may schedule na siya para maayos ito ng kanyang dentista.

Masalimuot at masakit ang itinakbo ng relasyong Jam at Jellie pero marami ang naniniwala na sa lalim ng pagmamahal na nararamdaman ng DJ-social media influencer sa mapapangasawa ay hindi ganoon kabilis at kadali para mamatay ang damdamin nito kay Jam sa kabila ng pisikal na pananakit sa kanya. 

‘Ika nga, abangan na lang ang susunod na kabanata kung may balikan bang magaganap o wala, lalo’t may sarili nga raw batas ang puso na tanging mga taong nagmamahal lang ang nakakaunawa.

---

BUKOD sa parehong mahuhusay at de-kalibreng mga aktres, kapansin-pansin din na walang sapawang naganap sa mga eksena nina Dimples Romana at Iza Calzado sa pelikulang The Caretakers (TC) ng Regal Films at Rein Entertainment. 

Parehong giving o mapagbigay bilang mga aktres, wala sa bokabularyo ng dalawa ang manapaw ng mga nakakaeksena, sa kabila ng katotohanang sa husay nila ay kayang-kaya nilang gawin ito.  

Masaya rin dahil ang pelikulang TC ang nagbukas ng pagkakaibigan sa kanilang dalawa. Papuri nga ni Dimples kay Iza ay mabait itong tao onscreen at offscreen man at nakita niya ito lalo na nang maging isa na itong ina. 

Sa presscon proper ay nabanggit nga ng Kapamilya actress na nadagdagan ang mga superstars niyang kaibigan sa katauhan ni Iza. Dalawa kasi sa malalapit na kaibigan ni

Dimples sa industriya ay sina Angel Locsin at Bea Alonzo. 

Kinumusta namin kay Dimples si Angel kung may balak na ba itong bumalik sa show business gaya ng hiling ng mga tagahanga nito, at ayon sa aktres ay wala siya sa posisyon para magsalita tungkol dito at binibiro niya nga sina Neil at Angel na siya na ang tumatayong spokesperson ng mag-asawa dahil hindi nagpapakita sa publiko ang mga ito. Para lang sa Kapamilya actress, anuman ang maging desisyon ng mga kaibigan niya ay lagi niyang susuportahan ang mga ito at kung saka-sakali ngang magbalik sa show business si Angel ay tiyak ang suporta niya sa kaibigan.  

Samantala, isa sa mga pinakamahuhusay na supporting actress natin sa ngayon sina Dimples at Iza at kung mapapanood lang ang TC ay masasabi nating sa kahit na anong roles o genre ng isang proyekto ay lalabas at lalabas talaga ang galing at brilyo ng isang artista. 

Nagsimula nang mag-showing kahapon, February 26, masasabi naming sulit ang ibabayad ng sinumang manonood ng TC dahil bukod sa husay ng mga gumanap at pagkakadirek ng pelikula ay maganda ang mensahe na gustong ipaabot ng The Caretakers na matuto nating mahalin at alagaan ang ating kalikasan.

Ibinulgar ng BFF na si Neil, nangangamoy-balikan… KATHRYN AT DANIEL, NAG-UUSAP NA ULI

ni Melba R. Llanera @Insider | Feb. 22, 2025

Photo: Kathryn Bernardo at Daniel Padilla - Instagram

Sa kabila ng pisikal na pananakit ni Jam Ignacio sa fiancée na si Jellie Aw, isa naman sa mga makakapagpatunay na hindi nakaranas ng physical abuse si Karla Estrada na dating kasintahan ni Jam, ay si Neil Coleta. 

Malapit na kaibigan at ninong ng bunsong anak nina Neil at Chinkee Brice si Daniel Padilla. Kaya naman, hiningan namin ng reaksiyon si Neil — na ngayon ay tumatakbong konsehal sa bayan ng Dasmariñas, Cavite — sa balitang pambubugbog ng ex ni Karla na si Jam, kay Jellie.

Ayaw magsalita ng aktor tungkol sa nabalitang pambubugbog ni Jam sa fiancée nito dahil baka mabigyan ng ibang interpretasyon kung anuman ang magiging komento niya at bumalik sa kanya. Pero aminado siya na ikinagulat niya nu’ng lumabas ang balita. 

Ayon kay Neil, ang gusto niya ay maging balanse sa panig nina Jam at Jellie. Pero bilang isang lalaki, hindi raw niya nagawa at magagawang manakit ng kahit na sinong babae, at mali talaga ito. 

Siniguro rin ni Neil na hindi nasaktan ni Jam si Karla dahil bukod sa sanay na sa buhay ang aktres ay alam niyang hindi papayag ang mga anak nito — lalo na si Daniel na isang Padilla na may mataas na respeto sa mga babae — na masaktan ang ina.

Si Neil ang nagkumpirma noon na mukhang may problemang pinagdaraanan ang relasyon nina Daniel Padilla at Kathryn Bernardo, bago pa man kinumpirma ng dalawa ang kanilang breakup. 

Hindi man nila napag-usapan ni Daniel ang tungkol dito dahil ayaw niyang magtanong ng personal sa kaibigan, ramdam niya na dinamdam at nasaktan si Daniel sa paghihiwalay nito at ni Kathryn dahil hindi rin naman biru-biro ang siyam na taon na pinagsamahan ng dalawa.

“Move on’ ang tanging nasabi ni Neil sa kaibigan na alam niyang ginagawa naman nito sa ngayon dahil pokus ito sa kanyang career, lalo na sa taping ng Incognito. 

Sa balita namang nagkakausap na raw sa ngayon sina Kathryn at Daniel at naniniwala ang iba na malaki ang tsansa na magkabalikan ang dalawa, “Mukha nga” ang isinagot sa amin ni Neil, at kung mabibigyan ng pagkakataon at gugustuhin ng dalawa na magkabalikan ay magiging masaya siya.

Samantala, tumatakbo bilang konsehal ng Dasmariñas, Cavite, at kabilang sa tinatawag na “F4 ng Dasmariñas” na kinabibilangan din nina Arnel del Rosario, Kagawad Vlad Maliksi at Tutuy Perez, pare-parehong tumatakbong independent ang apat na ang plataporma ay para sa ikauunlad at ikabubuti ng mga kababayan nila tulad ng livelihood, edukasyon, sports, at mental health awareness. 

Sa tanong kung bakit nagdesisyon si Neil na pasukin ang pulitika, ikinuwento ng aktor na noon pa man ay naging ugali na niya ang magbigay ng tulong sa mga nangangailangan at ilang charitable institutions, at naniniwala siya na mas magkakaroon siya ng mas malaking oportunidad na mas gawin ito kapag nakapasok siya sa public service.

---

NAPAKAKULAY ng buhay ni Jojo Mendrez, kung saan dumaan pala ito sa isang mahirap at malungkot na kabataan. 

Nanggaling sa isang mahirap na pamilya, naranasan ni Jojo ang gumawa ng walis-tingting at magbenta nito para makatulong sa pinansiyal na pangangailangan ng kanilang pamilya. 

Sinuwerte sa pagnenegosyo, unang napakinggan ang singer ding si Jojo sa revival ng kantang Handog na nanalong Revival Recording of the Year sa 11th Star Awards for Music, at sumunod niyang ini-revive ang kantang Somewhere In My Past ni Julie Vega na ngayon ay mayroon nang 45 million views. 

Pumirma ng kontrata sa Star Music ng ABS-CBN, sigurado kami na ang isa sa magko-compose ng mga susunod na aawitin ni Jojo ay ang mahusay na composer ng Star Music na si Jonathan Manalo.

Sa interbyu noon ng mga hosts ng radio station na Easy Rock (ER), natanong si Jojo kung ano kaya ang sasabihin o ipapayo niya sa dating Jojo Mendrez. 

Ayon sa Revival King, sasabihin niya sa sarili na huwag mawalan ng pag-asa sa iyong pangarap at ang mga ito ay mangyayari sa tamang panahon na itinakda ng tadhana at ng Nasa Itaas para sa iyo.

Misis, 3 beses nang nakunan sa pagbubuntis… MIKEE, TANGGAP KAHIT ‘DI NA SILA MAGKAANAK NI ALEX

ni Melba R. Llanera @Insider | Feb. 19, 2025

Photo: Mikee at Alex - Alex Gonzaga Official

Saludo kami sa lalim at kadalisayan ng pagmamahal ni Konsehal Mikee Morada sa asawang si Alex Gonzaga. 

Sa nakaraang interbyu nito sa Toni Talks (TT), napag-usapan ang pangatlong beses na pagkakalaglag ng anak nila ng asawa at kung paano nila ito hinarap ni Alex. 

Nabanggit doon ni Mikee na kung saka-sakaling hindi sila biyayaan ng Panginoon ng anak ay matatanggap niya na silang dalawa lang ni Alex ang nakatakdang magsama habambuhay. 

Sa panayam namin sa konsehal sa nakaraang Barako Festival 2025 na ginanap sa Manila-Batangas Road Inauguration nu’ng nakaraang February 13, inamin ni Mikee na mas lalong tumatag ang samahan nila ni Alex bilang mag-asawa at lalong lumalim ang pagmamahal at pag-aalala niya rito. 

Siniguro niyang muli na kung hindi nga sila bibiyayaan ng anak ng nasa Itaas ay matatanggap nilang mag-asawa. 

Lagi nilang ipinagdarasal na mangyari kung ano talaga ang dapat na mangyari at kung anuman ang sinabi niya ay galing sa puso niya. Ipinagpapasalamat din niya na matapang at matatag si Alex at sa magandang pagpapalaki at matibay na pananampalataya nito sa Panginoon ay hindi naging mahirap para sa kanila na tanggapin ang mga nangyari. 

Positibo at marami sa mga netizens ang nagkomento na sana ay makatagpo sila ng isang Mikee Morada sa buhay nila. Ayon kay Mikee ay nakakataba ng puso at nakaka-humble ang sinasabi na ito ng ibang tao at iniaalay niya sa nasa Itaas ang lahat ng papuring ito.

Tinanong din kung magha-honeymoon ba silang muli ni Alex. Pahayag ni Mikee ay honeymoon days naman daw ‘pag magkasama silang dalawa ng asawa.  

Tumatakbo ngayon si Mikee bilang vice-mayor ng Lipa, Batangas sa ticket ng pamilya Recto. Mula nang pumasok sa mundo ng pulitika ay nasa ticket na si Mikee ng Star for All Seasons at ni Sen. Ralph Recto at ipinagmamalaki niya ang nakita niyang magagandang pagbabago at pag-unlad sa ilalim ng termino ng mga ito.

---

ISINASANTABI na muna ni Jessy Mendiola ang balak niyang maging aktibo sa showbizness kung saan nabalita na isa sa mga nakalinya niyang gagawin ay ang seryeng balik-tambalan nila ni Gerald Anderson, kung saan una silang nagkapareha noon sa seryeng Budoy ng ABS-CBN. 

Ang dahilan ay para sumuporta sa kandidatura ng asawang si Luis Manzano bilang vice-governor ng Batangas, kung saan kasa-kasama si Jessy sa pangangampanya ni Luis sa mga kababayan nilang Batangueño. 

Tinanong din namin sina Luis at Jessy kung hindi ba magiging isyu sa kanilang mag-asawa kung saka-sakaling may kissing scene ang Kapamilya actress sa eksenang gagawin. Ayon kay Luis ay walang magiging problema sa kanya basta kakailanganin talaga ito sa eksena, bagay na sinang-ayunan naman ni Jessy. 

Pahayag naman sa amin ng aktres, alam niya na hindi ito magiging problema sa asawa dahil lumaki ito na isang aktres ang inang si Vilma Santos.  

Nang kumustahin namin kung papayag ba siya na mag-showbiz si Baby Peanut, walang pagdadalawang-isip na sinagot agad kami ng aktres na susuportahan niya ang anak sa kung ano ang gusto nito at ‘di siya hahadlang kung saan sasaya ang mga mahal niya sa buhay.