Kung saan daw happy ang madir… MARTHENA, TANGGAP NA MAGPAKASAL SI AIKO KAY ONEMIG

ni Melba R. Llanera @Insider | May 7, 2026

Photo: FB Lotlot De Leon

Promising ang Star Worx Block 1 artists na ini-launch last May 5 ng TV5. 

Ang Star Worx ay ang dating MediaQuest Artists Agency o MQAA at ngayon ay hahawakan ito ng star maker na si Mr. Johnny Manahan o mas kilala bilang Mr. M sa industriya.

Ipinakilala ang unang batch na binubuo ng 16 baguhang aktor at aktres na nagpakita ng husay sa pagsasayaw at pagkanta. 

Kabilang sa kanila sina Adam Buck, Amo Wilding, Chan Martin, Nico Matugas, Patrick Ballesteros, Spencer Capistrano, Wayne Leonard, Carmela Lorzano, Celyn David, Kaitlyn King, Keisha Serna, Nathalie Apollo, Rahil Gatali, Selina Griffin, Steph Razon at Marthena Jickain.

Nang tanungin kung ano sa tingin nila ang rason kung bakit sa dinami-rami ng mga aspiring artists ay dapat silang hangaan, sinagot ng karamihan sa kanila na ang disiplina na itinuro sa kanila ng training na isinagawa ni Mr. M at ang pagiging bukas nilang matuto para maipakita ang kanilang mga kakayahan at talento ang gagamitin nilang pasaporte para tumagal sila sa industriya.

Ayon nga kay Mr. M, ang ganda, talento at kabataan ng mga ima-manage na Star Worx Block 1 artists ang nagsisilbing ningas kung bakit patuloy pa rin siya sa ginagawang paghubog sa mga baguhang artista na ang pangarap ay makagawa ng sariling tatak sa industriya.

Sa kabilang banda, ang kinausap at kinumusta ng mga press ay si Marthena, anak ng chef na si Martin Jickain at ng pulitiko-aktres na si Aiko Melendez, na present sa media launch para bigyang-suporta ang anak. 

Aminado si Marthena na may pressure kapag naikukumpara siya sa ina dahil kilala ito bilang mahusay na aktres, pero ang lahat ng ito ay tinitingnan niya bilang motibasyon para higit siyang magsikap upang maipakita ang sariling kakayahan.

Sa kabila ng bukas ito sa pagkakaroon ng ka-love team, hindi pa raw papayagan ni Aiko si Marthena sa mga kissing scenes. Hindi rin naman bukas dito ang baguhang aktres na hindi pa pala nagkaka-boyfriend dahil pokus sa kanyang pag-aaral. 

Gustong gumawa ni Marthena ng mga rom-com (romantic-comedy) lalo na ng mga action films. Kung titingnan ay mahinhin at pinong kumilos at magsalita, pero athlete pala si Marthena.

Samantala, nang kumustahin naman namin kung boto ba siya kay Onemig Bondoc para sa ina, agad siyang umoo at sinabing masaya siya kung saan ito magiging masaya. 

Ayon pa kay Marthena Jickain, siya ang nagsabi sa ina na piliin nito ang sarili nito at buo ang suporta niya sa inang si Aiko Melendez kung saka-sakaling i-level-up na ng mga ito ang kanilang relasyon at mauwi sa pagpapakasal.

---

‘Pag inaantok daw sa taping, walang arte… 

JOSHUA, SA UPUAN LANG NATUTULOG

Sa blue carpet at special screening ng Love Is Never Gone (LING) na pinagbibidahan nina Joshua Garcia at Ivana Alawi, puring-puri ng mga beteranang artista mula kina Epy Quizon, Michael de Mesa, Ara Mina at Dina Bonnevie ang husay at propesyonalismo ng mga kabataang artista, partikular na si Fyang Smith.

Ayon sa kanila, kung titingnan ay patawa-tawa at laging masaya ang aura ni Fyang, pero sa sandaling umarte na ito ay lumalabas ang husay nito bilang aktres.

Sa parte naman ni Joshua, dati pa pala ay nahuhusayan na si Dina sa galing niyang umarte lalo na nang mapanood ng aktres ang pelikulang Meet, Greet & Bye (MGB) na kasama si Joshua. 

At lalo pang napabilib si Dina sa husay ng aktor nang magkasama sila sa LING, kung saan sa unang napanood naming episode ay lutang na lutang ang husay ni Joshua.

Wala namang masasabi si Epy sa propesyonalismo ni Joshua, kung saan hindi niya ito kinakitaan ng attitude problem kahit pagod at puyat ito. 

Pagkukuwento nga ni Epy, na siyang gumaganap bilang ama ni Joshua sa istorya, alam niya kapag inaantok ang aktor dahil natutulog lang si Joshua sa upuan, nakayukyok sa mesa.

Anyway, ang Love Is Never Gone ay mapapanood sa Prime Video sa darating na May 8. Ito ay sa ilalim ng produksiyon ng Dreamscape Entertainment, sa direksiyon nina Manny Palo at Jojo Saguin. 

Pinagbibidahan ito nina Joshua Garcia, Ivana Alawi, Jane Oineza, JC Alcantara, Fyang Smith, JM Ibarra, Jameson Blake at ng mga batikang artista na sina Irma Adlawan, Epy Quizon, Ara Mina, Michael de Mesa at Dina Bonnevie.

Pang-habambuhay na raw… LOTLOT, IBINULGAR ANG NAIWANG ‘PAMANA’ SA KANYA NI NORA

ni Melba R. Llanera @Insider | April 27, 2026

Photo: FB Lotlot De Leon

“Ang legasiya ni Mommy para sa akin ay hindi lang tungkol sa materyal na bagay, hindi tungkol sa pera, ito’y tungkol sa kanya bilang tao, tungkol sa pagtulong niya sa kapwa n’ya. ‘Yun ang pinakaimportante para sa akin. ‘Di naman kailangan na ulit-ulitin ang mga karangalang natanggap n’ya kasi nasa libro na ‘yan, habambuhay na ‘yan hanggang sa mga susunod na henerasyon. 

“Ang importante sa akin ay ipagpatuloy ang legasiya n’ya in helping others and being kind, just to be kind to other people,” ito ang emosyonal na pahayag ni Lotlot de Leon sa nakaraang Bongga Ka Guy, A Celebration of Life of Ms. Nora Aunor na handog ng mga masusugid na tagahanga ng Superstar para sa 1st death anniversary ng aktres. 

Para nga kay Lotlot, ang legasiya ng ina ay wala sa materyal na bagay na iniwan ni Ate Guy kundi sa magagandang alaala ng kabutihan nito bilang isang tao at kung paano ito magsisilbing inspirasyon para ipagpatuloy ng mga nagmamahal sa Superstar.

Sinariwa rin ng aktres kung paano siya naturuan ng ina na makiharap nang maayos sa ibang tao lalo’t halos araw-araw ay bus-bus na mga tao ang dumadalaw sa kanilang tahanan noon at siya ang pinahaharap nito sa mga tao. 

Para rin kay Lotlot, sa kabila ng pagiging Superstar ni Nora at ang epekto nito sa marami ay mananatiling isang ina para sa kanya si Ate Guy.

Labis ding nagpasalamat si Lotlot sa mga masusugid na tagahanga ng ina na kahit wala na ito ay patuloy pa ring nagmamahal at sumusuporta sa Superstar. 

Ayon pa sa kanya, marami nang haka-haka at panghuhusga ang ibinato sa kanilang magkakapatid at sa ina. Siniguro ng aktres na kasama siya ng mga tagahanga sa journey na ito at ipagpapatuloy nila ang legasiya na naiwan ng ina.

---

PARA sa Regal Entertainment head na si Ms. Roselle Monteverde, naaalala niya si Maricel Soriano sa Pinoy Big Brother (PBB) Gen 11 Big Winner na si Fyang Smith. 

Ilo-launch on big screen ang tambalang JMFyang sa pelikulang Almost Us (AU) ng Regal Entertainment at ayon kay Roselle ay halos magkapanabayan silang lumaki ng Diamond Star na isa sa original Regal babies at kapag pinapanood niya ang bawat galaw ni Fyang sa pelikula ay natatawa siya rito. 

Puring-puri rin ng Regal Entertainment head si JM dahil sa natural nitong pag-arte, kung saan nagagamit nito ang mga mata sa pag-arte at sa on-screen chemistry ng JMFyang love team. 

Para nga kay Roselle, parang hindi umaarte ang dalawa at napakanatural nilang nade-deliver ang mga karakter na ginagampanan.

Ang Almost Us ay produced ng Regal Entertainment at sa ilalim ng direksiyon ni Direk Dan Villegas na siyang direktor din ng mga box office movies na English Only, Please (EOP) at Always Be My Maybe (ABMM). 

Ito ay mapapanood sa mga sinehan nationwide sa darating na May 6. Pinagbibidahan ito nina Fyang Smith, JM Ibarra, Yuki Takahashi, Sam Samarita, JM Salvador, Baus Rufo, Che Ramos, Lotlot Bustamante at Dustin Yu.

Misis ni Arjo… RIA, UMAMIN KUNG BAKIT WALA SA PAMILYA ATAYDE ANG BUMATI KAY MAINE NU’NG B-DAY

ni Melba R. Llanera @Insider | March 19, 2026

Photo: Instagram / Ria Atayde

Sa gitna ng intriga at usap-usapan tungkol sa umano’y cheating issue sa “power couple” sa showbiz, mariing pinabulaanan ni Ria Atayde ang pagkakadawit ng kanilang pangalan ni Zanjoe Marudo, kasabay ng kanyang pagdalo sa mediacon at special screening ng The Silent Noise (TSN) bilang suporta sa asawa na bida sa bagong serye kasama si Angelica Panganiban. 

Sumagot naman agad sa amin ang aktres na hindi maiiwasan ang ganyang mga isyu sa industriyang kinabibilangan nila, pero nagpapasalamat siya sa nagtuturing sa kanila bilang power couple.

Masaya at kuntento sa pagsasama nila ni Zanjoe, puring-puri nga ni Ria ang pagiging ama ng kanyang mister at napakasuwerte niya raw na si Zanjoe ang kasama niya sa pagbuo ng kanilang pamilya. 

Nang tanungin namin kung ano ang sikreto para sa isang masayang buhay-may-asawa, sinabi ni Ria na bukas na komunikasyon sa pagitan ng mag-partner at nagpapasalamat siya na nakikita niya ang effort ng asawa na kahit may anak na sila ay kailangan pa rin nila ng quality time para sa isa’t isa.

Ikinuwento rin ni Ria na kapag may mga proyekto sila ni Zanjoe ay bahagi ng proseso nila na basahin ang script na gagawin nila at natutuwa at proud siya kung paano isinasabuhay ang script at ang mga karakter na bumubuo rito, kabilang na ang role ni Zanjoe bilang Anton Carpio sa istorya.

Samantala, tinanong din siya tungkol sa puna ng maraming netizens na wala raw bumati kay Maine sa social media mula sa pamilya Atayde noong mag-birthday ito noong March 3. 

Paliwanag ni Ria, lahat sila sa pamilya ay namahinga muna sa social media. 

Sa parte niya, ang pokus ay ang pag-aalaga ng anak na si Sabino at hindi na siya aktibo sa industriya kaya wala siyang nakikitang dapat i-post. 

Siniguro rin ni Ria na maayos ang relasyon ng mga Atayde kay Maine at makikita ito sa birthday celebration ng ama nilang si Art Atayde kamakailan.

Sa kabila ng mabigat na pagsubok na pinagdaanan ng pamilya Atayde, partikular na ng kapatid na si Arjo Atayde na hindi biro ang inabot na pamba-bash mula sa mga netizens, nanatiling matatag at matibay ang pamilya nila. 

Ayon kay Ria, ganu’n ang isang pamilya na kahit ano ang mangyari ay hindi nila iiwan ang bawat isa sa anumang pagsubok na dumaan sa kanila.

Samantala, kinokonsiderang isa sa magagaling at versatile actress ng kanyang panahon si Ria. Pero sa kabila ng pag-amin na nami-miss niya ang pag-arte, ine-enjoy niya muna ang papel bilang ina kay Sabino na ngayon ay isang taon at limang buwan pa lamang at hindi niya ipagpapalit ang oras at role na ginagampanan niya bilang ina.

---

GUMAGANAP bilang Jackie Carpio at matriarka sa pamilya Carpio sa crime drama series na The Silent Noise, naniniwala ang Kapamilya actress na si Angelica

Panganiban na ang pagiging komportable nila ni Zanjoe Marudo sa isa’t isa ang rason kung bakit click ang tambalan nila, mapa-big screen man o TV series. 

Isang ina na may anak na pipi na ginagampanan ni KD Omalin, aminado si Angelica na mahirap sa umpisa ang kanyang role at malaking challenge ito dahil hindi siya exposed sa mundo ng mga pipi. 

Ngunit habang ginagawa na niya ang series ay paunti-unti niyang natutunan ang lengguwahe ng mga ito sa pamamagitan ng sign language at kapag binabagalan ay naiintindihan na niya.

Samantala, kahit abala sa pagiging asawa kay Gregg Homan at ina kay Baby Bean, para kay Angelica ay hindi lang dito umiikot ang buhay niya, kaya kung may maganda at challenging role ay tinatanggap niya. 

Siniguro rin niyang ipapapanood kay Baby Bean ang lahat ng mga proyektong nagawa niya at wala siyang ikahihiya. 

At 3 yrs. old, ‘di pa alam ni Baby Bean na isa siyang artista at kung darating ang punto na gugustuhin din nitong pumalaot sa showbizness at mag-artista ay susuportahan niya nang buung-buo.

Ang The Silent Noise ay mapapanood sa Prime Video simula bukas, March 20 (sa Pilipinas) at sa 240 na bansa sa buong mundo. 

Bukod kina Angelica, Zanjoe at KD, kasama rin sina Zaijian Jaranilla, Mutya Orquia, Karina Bautista, Monching Gutierrez, Joem Bascon at iba pa. Ito ay produced ng ABS CBN Studios sa ilalim ng direksiyon ni Direk Onat Diaz.