Pagpuslit ng milyun-milyong galon ng langis ng U.S. sa Subic, paki-explain AFP at DND!

ni Imee Marcos @Imeesolusyon | Enero 26, 2024

Heto na naman ang Amerika, pasikreto na namang binubulaga ang mga Pinoy.

Abah eh, akala ata ng U.S. ‘di natin mabubuking ‘yang shipment ng 39 milyong galon ng langis ng US Navy mula sa Pearl Harbor patungong Subic.

Abah, abah, para saan ‘yan ha? Ano’ng meron? 

Akala ata ng U.S. ‘di natin mabubuko at makukuha ang info sa iba’t ibang international shipping tracker na ang langis ay kinuha sa Pearl Harbor at kinarga sa US-registered tanker, Yosemite Trader noong December 20 at dumating sa Pilipinas noong Martes.

Take note ha, ang pananahimik ng Philippines at U.S. government sa isyu ay nagpainit lamang sa hinala na nagsasagawa na ng pre-positioning ng military supplies sa bansa dahil sa posibleng pagsiklab ng giyera sa pagitan ng China at Amerika dahil sa Taiwan.

Hay naku ha, kaimbiyerna! Not again! 

Kayong mga taga-U.S. ha, sumosobra na kayo sa pang-iiwan n’yo sa mga Pinoy sa dilim kung ano bang mga kasunduan ‘yan! Hello, hindi naman kami bobo no! Buking na namin ang istilo n’yo!

Puwede ba ‘wag n’yong ipagkait ang karapatan naming mga Pinoy! 

Hindi lang ‘yan pang-aapak sa rights naming mga Pinoy, kundi paninira rin sa kalikasan at pangyuyurak sa soberanya ng Pilipinas!

Remember, hindi porket may Mutual Defense Treaty, lisensya na ito para iwanan sa dilim na walang kaalam-alam ang mga Pinoy sa bagay na ito!

Pangalawa, ang Subic ay hindi na EDCA site, kaya saang teritoryo ng Pilipinas ilalagak ng U.S. ang milyun-milyong galon ng langis?

Wala namang ganyanan! IMEEsolusyon na ipaliwanag ng AFP at DND ang bagay na ito sa sambayanang Pilipino! Plis lang!

Pananakot sa deadline at bawi-prangkisa sa mga tsuper at operator, tantanan na

ni Imee Marcos @Imeesolusyon | December 29, 2023

Noong Oktubre pa nagsimulang pumarada sa kalsada ang mga transport group para magprotesta.  

At ngayon naman, may panibagong banta silang magtutuluy-tuloy ang transport strike hanggang sa papasok na taon, dahil nga ayaw nang bigyang extension ang FRANCHISE CONSOLIDATION ng mga jeepney sa December 31, 2023.

Nanindigan ang mga jeepney driver na hindi nila keri ang magbayad ng modernong jeep. Daing pa nila, pati maintenance nito tiyak na magpapasakit sa ulo nila.

Indikasyon ito na naghihingalo na ang mga lumang jeep, tila magbaba-bye na sila nang tuluyan, na deka-dekada nang bahagi ng pamumuhay ng maraming Pinoy. ‘Wag natin itong payagan!

Ang jeep ang isa sa pinakamurang masasakyan ng mga ordinaryong Pinoy. Pero bakit tila pinapatay na ito ng iilan nating kababayang nasa poder ng gobyerno.

Ni wala ngang subsidiyang maaasahan sa gobyerno, kundi ‘yung Php210,000 hanggang Php280,000 na ilang porsyento lang ng Php2.5 million na halaga ng bagong Euro-4 PUV?

At bakit nga ba pipilitin ng libu-libong operator at drayber na magmiyembro ng transport coop? Kung ngayon, may-ari at maliit na negosyante ang turing sa kanila, sa ilalim ng coop magiging hamak na empleyado na lang ba sila? 

Pati sa suplay, parts, at serbisyo ay hindi pa handa ang mga dealer. Ang TESDA mismo ay umaamin na hindi pa nila kering i-repair dahil Euro-2 PUV pa lang ang pinaghandaan nila.

Kung mangutang ang operator o drayber, igagarantiya ba ng coop? ‘Pag nagkabulilyaso ang bayaran, sasagutin ba ng coop ang utang o hihilain lang din ng bangko ang sasakyang inutang? 

Sa laki ng gagastusin para bumili ng bagong sasakyan, magkano naman ang itataas ng pamasahe? Hay naku, anlabo talaga!

Sa ganang akin, IMEEsolusyon na bawiin na muna ng DOTr ang deadly deadline na ‘yan ng PUV modernization na mula pa noong 2017, bulilyaso na ito?! 

Ikalawa, kailangang magbalik-konsultasyon ang gobyerno, mga driver, operator maging ang mga commuter.

Kumplikado ang isyung ito kaya dapat lang na makinig naman tayo sa daing ng mga PUV operators, drayber at mga commuter.

Panghuli, puwede ba tantanan naman ng LTO at DOTr ang mga tsuper sa pananakot na deadline, pagsuspinde at pagbawi ng prangkisa. Hello!!! Awat na!

No To Cha-cha! Sikmurang kumakalam muna!

ni Imee Marcos @Imeesolusyon | December 16, 2023

Nabuhay na naman ang Cha-cha! May gusto na namang sumayaw, at naghahanap ng ka-partner.

Ano ba ‘yan, kunwa-kunwariang para sa ekonomiya, talaga bah?

Aber, sige bantayan natin kapag umusad ‘yan.

Sa totoo lang ha, kahit sinupamang mag-push n’yan, kumpiyansa ako na wala ‘yang lugar! 

Mabibigo lang no! Tama ba namang i-push na naman ‘yan?

I smell something fishy! Ha-ha-ha! Hay naku, tell it to the marines, double bladed ‘yan!

Bakit ba ke kulit, kulit?! Makailang beses nang na-float ‘yan pero sinusupalpal agad ‘yan ng ading ko no!!

Santisima, sure ba kasing concern talaga sa economy? O me inaambisyon para sa sariling pakinabang?!

Hindi IMEEsolusyon ‘yang sayaw ng Cha-cha ngayong baon sa hirap ang ating mga kababayan! 

Ang totoong IMEEsolusyon ngayon ang unahin ang kumakalam na tiyan ng ating mga kababayan!

Unahin ang pagkain! Mag-push pa ng mga measure o mga hakbang para bumaba ang presyo ng bilihin!

IMEEsolusyon na mapalago lalo ang produksyon ng lokal na mga pagkain, palay, mga gulay, mga isda, prutas!

IMEEsolusyon na back to basic tayo, tangkilikin ang sariling atin o buy local at ‘wag mag-import ng foods hangga’t maaari! 

I-flush na natin sa CR ang Cha-cha, saka na ‘yan no! Tama na muna ang pulitika, pagkain muna!