Cong. Acop ng Antipolo, pumanaw na

ni Ronalyn Seminiano Reonico | May 28, 2021

Pumanaw na si Antipolo 2nd District Representative Resurreccion Acop. Ito ang kinumpirma ng lokal na pamahalaan ng Antipolo ngayong Biyernes.

Ayon sa pahayag na kanilang inilabas sa social media, “Paalam at maraming salamat po, Antipolo City 2nd District Congresswoman Resurreccion ‘Dra. Cion’ Marrero Acop...

“Taos-pusong pakikiramay at panalangin sa mga naiwang pamilya at mga kababayan sa ikalawang distrito ng lungsod...”

Maging ang House of Representatives ay nagpahayag din ng pakikiramay sa pagpanaw ni Acop.

Pahayag pa ng House of Representatives, "She will be remembered for her kindness, passion and commitment to selflessly serve the people of the 2nd District of Antipolo City."

Wala namang inilabas na pahayag ang pamilya ni Acop tungkol sa sanhi ng pagkamatay nito.

Samantala, si Acop ay isang pediatrician at asawa ng dating congressman na si Romeo Acop.

Batasang Pambansa, sarado para sa disinfection

ni Lolet Abania | May 6, 2021

Sinuspinde ni Speaker Lord Allan Velasco ang mga trabaho sa Batasang Pambansa Complex sa Quezon City simula May 10 hanggang May 14 para sa gagawing disinfection.

Ayon kay Velasco, ito ay bilang preparasyon sa pagbabalik ng kanilang sesyon sa Mayo 17.

Dagdag niya, isasagawa rin ang pagbabakuna kontra-COVID-19 sa lahat ng empleyado ng House of Representatives sa Mayo 10, mula alas-8:00 ng umaga hanggang alas-4:00 ng hapon sa South Wing Annex.

Aniya, prayoridad na maturukan ng COVID-19 vaccines ang mga House employees na nasa health services, mga senior citizens, persons with comorbidities at frontline personnel sa mga essential sectors, kabilang na ang mga uniformed personnel.

Senado, naka-lockdown hanggang Holy Week; Congress, sarado rin

ni Lolet Abania | March 22, 2021

Mananatiling naka-lockdown ang Senado hanggang Holy Week dahil sa patuloy na banta ng pandemya ng COVID-19, ayon kay Senate President Vicente Sotto III.

Sa isang interview kay Sotto, sinabi nitong pinapayagan na niya ang mga empleyado na hindi na mag-report kapag Holy Week, subali't mayroon pa ring skeletal staff na nagtatrabaho sa Senado.

"Eto [ngayon] walang skeletal, lockdown talaga ito.... After Holy Week, pagdating ng Pasko ng Pagkabuhay, 'yung Lunes na 'yun, naka-skeletal ang Senate," ani Sotto ngayong Lunes.

Wala ring isinagawang session ngayong Lunes sa Senate, matapos na ang buong gusali nito ay isinailalim sa lockdown hanggang Martes nang gabi. Magbabalik naman ang mga session sa Senado sa Miyerkules.

Gayunman, ayon kay Sotto, dalawa hanggang tatlong miyembro mula sa Secretariat at sa Office of the Sergeant at Arms, at ilan lamang mga senador kabilang na siya, ang maaaring dumalo physically sa Senado sa Miyerkules.

Samantala, inanunsiyo rin ng House of Representatives ngayong Lunes na suspendido ang kanilang operasyon simula Martes (March 23) hanggang Miyerkules (March 24) dahil pa rin sa patuloy na pagtaas ng COVID-19 infections sa Metro Manila.

Sa inilabas na memorandum, magbabalik ang plenary session sa Congress sa Huwebes, March 25.

Gayunman, ang mga opisina gaya ng Office of the Secretary General, Finance and Engineering Departments, at Office of the Sergeant-at-Arms o ang Legislative Security Bureau ay mananatiling may skeletal forces para patuloy ang serbisyo sa kani-kanilang departamento.