Dating Cebu Gov. Garcia, pumanaw sa edad 95

ni Lolet Abania | August 19, 2021

Pumanaw na si dating Deputy Speaker at Cebu Governor Pablo “Pabling” Garcia sa edad na 95. Nagpahayag ng pakikidalamhati ang House of Representatives sa pamilya at mahal sa buhay ni Garcia na nagsilbi sa panahon ng 8th, 9th, 14th at 15th Congresses.

“The House of Representatives, led by Speaker Lord Allan Velasco, mourns the demise of former Deputy Speaker and Cebu Rep. Pablo ‘Pabling’ P. Garcia,” ayon sa statement ng Kamara. “Our prayers and heartfelt sympathies to the family and loved ones he has left behind, especially to his son and our colleague in the 18th Congress, Deputy Speaker Pablo John F. Garcia,” dagdag pa nito.

Sa hiwalay na pahayag, sinabi ni Velasco na mananatili sa alaala ng marami ang mga nagawa ni Garcia para sa bayan. “He was a devoted public servant who dedicated two-thirds of his life to public service -- an extraordinary feat worthy of emulation,” ani Velasco.

“Cebu and the entire nation lost an exceptional public servant admired for his diligence, intelligence and integrity,” sabi pa. Naglingkod si Garcia bilang governor ng Cebu mula 1995 hanggang 2004.

Nagsilbi rin siya bilang vice-governor mula 1969 hanggang 1971. Nakilala rin si Garcia na isang trial lawyer, law professor at respetadong constitutionalist. Naulila niya ang kanyang mga anak na sina Gwendolyn, Deirdra, Winston, Byron, Farla at Pablo John, 27 apo at 18 apo sa tuhod.

Aprub sa Kamara… Birth, death at marriage certificates, 'di na kailangang i-renew

ni Lolet Abania | June 2, 2021

Pinagtibay ng Mababang Kapulungan ng Kongreso sa ikatlo at huling pagbasa ang panukala para sa permanent validity ng birth, death at marriage certificates ngayong Miyerkules.

Pasado na ang House Bill 9175 o ang panukalang Permanent Validity of the Certificates of Live Birth, Death, and Marriage Act, kung saan nakakuha ito ng 199 affirmative votes sa Kamara.

Nakasaad sa mandato ng bill na permanenteng balido na ang mga certificates ng live birth, death at marriage na na-issue, pinirmahan, sinertipikahan o authenticated ng Philippine Statistics Authority at National Statistics Office, at maging ang mga na-issue ng local civil registries.

Gayundin ang permanent validity para naman sa mga reports ng birth, death at marriage registered na na-issue ng Philippine Foreign Service Posts at naipadala sa PSA kahit anumang petsa ng issuance nito.

Layon din ng panukala ang pagsasagawa ng isang civil registry database at ang pagkakaroon ng isang virtual viewing facility sa mga local civil registries at Philippine Foreign Service Posts upang ma-verify ang authenticity ng mga certificates.

Sa ilalim ng bill, ipinagbabawal na sa mga national government agencies, government-owned at controlled corporations, local government units, pribadong kumpanya, pribado at pampublikong educational institutions at iba pang non-government entities ang paghingi ng mga bagong kopya ng nasabing mga certificates sakaling may isa nang valid nito ang maisa-submit.

Free annual medical check-up, aprub sa Kamara

ni Ronalyn Seminiano Reonico | June 1, 2021

Inaprubahan na ng House of Representatives ang House Bill 9072 o ang proposed Free Annual Medical Check-up Act ngayong Martes sa ikatlo at huling pagbasa nito.

Nakakuha ng 245-0 votes ang naturang bill na naglalayong gawing libre ang medical check-up sa mga Pilipino sa mga pampublikong ospital at institusyon.

Kabilang sa medical check-up ay ang blood sugar at cholesterol tests at mga laboratory at diagnostic tests.

Saklaw ng naturang panukala ang mga miyembro ng Philippine Health Insurance Corp. (PhilHealth) sa ilalim ng Republic Act No. 11223 o ang Universal Health Care Law.