‘Sibuyas Queen’, ginisa sa Kongreso.. Taga-DA na kasabwat sa hoarding, secret

ni Mylene Alfonso | February 16, 2023

Kagagawan ng tinaguriang ‘Sibuyas Queen’ kung bakit tumaas nang todo ang presyo ng ibinebentang sibuyas sa bansa.

Ito ang naging pananaw ng sources matapos isiwalat ng isang magsasaka ng sibuyas ang modus ng tinaguriang ‘Mrs. Sibuyas’ sa pagharap nito sa pagdinig sa Kongreso nitong Martes.

Isiniwalat ni Israel Reguyal, chairman ng Bonena Multipurpose Cooperative, sa mga mambabatas ng House Committee on Agriculture and Food, na bumibili ng bultu-bultong sibuyas ang isang Lilia Leah Cruz, na tinawag ng kanyang mga kritiko bilang ‘Mrs. Sibuyas’.

Ani Reguyal, nag-aangkat ng bultu-bultong sibuyas si Cruz para bigyang-katwiran ang pag-aangkat ng mga ani.

“Kapag panahon po ng bilihan sa storage, ang gagawin po niya, bibilhin niya po ang lahat ng laman nu’ng nasa storage. ‘Pag nabili na po ang lahat ng sibuyas, ito na po ang Department of Agriculture, magpapalabas na ng import permit doon po kami patay, kaya nga po ito ‘yung napakabigat sa amin,” pahayag ni Reguyal.

Nang atasan ng mga mambabatas si Reguyal na pangalanan kung sino ang maaaring kasabwat ni Cruz sa Bureau of Plant Industry, humingi siya ng closed door executive session sa mga mambabatas na pinagbigyan naman ng panel.

Una nang sinisi ni Reguyal si Cruz sa pagkawala nito ng humigit-kumulang P30 milyon para sa sibuyas noong 2012.

Ani Reguyal, binayaran lamang ni Cruz ang 15,000 sa 80,000 sako ng sibuyas na kanyang nabili. Sinabi pa ni Reguyal na kinailangan niyang ibenta ang real estate property para mabayaran ang mga magsasaka na nagdeposito ng kanilang ani ng sibuyas sa kanya.

Sinabi naman ni Sagip Partylist Rep. Rodante Marcoleta sa kanyang bahagi na binayaran ni Cruz ang mga magsasaka ng mga talbog na tseke, na sinabi ni Cruz na naayos na.

Inihayag ni Reguyal sa mga mambabatas na aabot sa P168 milyong halaga ng sibuyas ang nasira noong nakaraang taon lamang habang nakaimbak sa isang bodega sa Marilao, Bulacan.

Ayon kay Reguyal, nasira ang mga sibuyas dahil nabuo ang yelo habang nasa imbakan.

“Nag-file na po kami ng kaso sa kanila dahil po sa aming pagkakaalam ay dahil po sa kapabayaan nila, na-over, nasobrahan po sa lamig nagyelo po ‘yung sibuyas,” ayon kay Reguyal.

Sinabi ni Reguyal sa mga mambabatas na kailangan nilang itapon ang mga sibuyas dahil sa pagkasira, pero kailangan din nilang magbayad sa pag-iimbak.

Ang mga sibuyas ay nagmula sa mga magsasaka na nagdeposito ng kanilang mga sibuyas sa kanya. Ipagpapatuloy ang pagdinig sa Kamara sa susunod na linggo.

70 staff ng House of Representatives may COVID-19

ni Lolet Abania | January 14, 2022

Nasa tinatayang 70 personnel ng House of Representatives ang nagpositibo sa test sa COVID-19.

Ito ang inihayag ni House of Representatives Secretary General Mark Llandro Mendoza, tatlong araw bago mag-resume ang lower chamber sa kanilang plenary sessions na may limitadong physical attendance sa Batasang Pambansa. Sa Lunes, nakatakdang magbalik sa sesyon ang mga mambabatas.

“So far ang updated, nasa 70 pero karamihan naman nasa labas ‘yun, wala sa House. ‘Di naman kami nagpapapasok kasi ‘pag may nag-positive na staffer [na] pinapasok sa amin, nire-record lang namin. So far nasa 70 as of today,” ani Mendoza sa sa isang phone interview.

Ayon kay Mendoza, inoobserbahan pa nila ang tinatawag na hybrid session set-up, kung saan papayagan lamang sa maximum na 30 mambabatas at 20 hanggang 25 congressional staff sa loob ng session hall para mapanatiling ligtas ang lahat sa gitna ng panganib ng COVID-19.

Gayundin aniya, ang mga congressional staff ay magre-resume ng kanilang operasyon matapos ang isang extended break.

Subalit, ayon sa secretary general, 20 porsiyento ng mga staff lamang ang papayagan para pisikal na maka-access sa complex, habang wala namang bisita na papayagang makapasok dito.

Giit ni Mendoza, ang mga papasok sa complex ay kailangang magdaan muna sa antigen testing.

Binanggit naman ni Mendoza na sa ngayon, ang House of Representatives ay nakapagbigay na ng booster shots sa tinatayang 400 personnel, habang plano nilang i-resume ang pag-administer ng booster shots sa loob ng dalawang linggo.

Aniya pa, halos 95 percent ng Secretariat staff ay mga fully vaccinated na kontra-COVID-19. Magbabalik ang session ng 18th Congress sa Enero 17 hanggang Pebrero 4, 2022.

Habang sa pagitan ng Pebrero 5 at Mayo 22, 2022, nasa kanilang usual break ang Congress para sa nakaiskedyul na election campaign at magbabalik muli sa Mayo 23 hanggang Hunyo 3, 2022.

Roque: DDS o hindi, babakunahan

ni Mary Gutierrez Almirañez | May 27, 2021

Nilinaw ni Presidential Spokesperson Harry Roque na walang political discrimination o pamumulitika sa vaccination rollout ng COVID-19 sa ilalim ng administrasyon ni Pangulong Rodrigo Duterte, kaugnay sa isyung prayoridad lamang nito ang mga kapartido.

Aniya, "Scientifically, you can’t discriminate because you’re defeating the purpose of a mass vaccination. No one is safe until we are all safe. It does not make sense if you give priority to areas just because they are political supporters and ignore other areas because the nature of the virus is it does not discriminate against or for political allies or opponents."

Matatandaan namang mahigit 1,600 empleyado ng House of Representatives (HoR) na ang nabakunahan kontra COVID-19 at ilang pulitiko na rin mula sa iba’t ibang local government units (LGU) na nasa high-risk area ng COVID-19 ang napasama sa priority list.

Kabilang din sa isinusulong ng mga opisyal ay ang mas mabilis na vaccination rollout, kung saan inirerekomendang bakunahan na rin ang publiko kahit hindi pa prayoridad sa listahan.

Sa ngayon ay 4,495,375 indibidwal na ang nabakunahan kontra COVID-19. Kabilang dito ang mga healthcare workers, senior citizens at may comorbidities o nasa A1 hanggang A3 priority list.

Inaasahan namang susunod na ang rollout sa ilalim ng A4 at A5, kung saan kabilang ang economic frontliners at mga mahihirap.

Samantala, pinag-aaralan na ng Food and Drug Administration (FDA) ang isinumiteng application para sa emergency use authorization ng Pfizer COVID-19 vaccines upang iturok sa edad 12 hanggang 15-anyos.

"Ang ating mga experts, in-evaluate. In fact, early this evening, I already got the recommendations of our experts and it's very favorable… Within the week, we will issue an amendment and we will be able to use it in children of 12 to 15 years old," sabi pa ni FDA Director General Eric Domingo.