521 wika, isang mensahe: Ama, bida sa Guinness!

by Info @Gulat Ka 'No?! | February 6, 2026

Kaya n’yo rin kayang ipagsigawan sa buong mundo kung gaano kahalaga inyo ang isang tao?

Sa araw-araw na kasama ninyo ang inyong mahal sa buhay, mga Ka-BULGAR, kailan ang huling beses n’yo silang sinabihan na mahalaga sila sa inyo at mahal n’yo sila?

Sapat na kaya ang araw-araw na pagsasabi ng “Mahal kita”? Kaya n’yo rin kaya ang ginawa ng isang tatay, na lumikha ng kanta upang masabi sa kanyang anak ang salitang “I love you” sa iba’t ibang wika?

Merong humigit-kumulang 521 na magkakaibang wika ang napagsalinan nitong kanta. Ang numerong 521 ay hindi lamang nagkataon, kundi ito ay hango sa kaarawan ng kanyang anak na ipinanganak noong Mayo 21.

Si Philip ay may kakayahang magsalita at makaintindi ng Danish, English, at Arabic, at merong kaunting kaalaman sa Hebrew, French, at Chinese. Sa tulong ng kanyang sariling kagamitan, nagawa niyang mai-translate ang kanyang ginawang kanta sa lahat ng wikang ito.

Si Philip Halloun, na kasalukuyang nasa Denmark, ay isang musician na nakapagsulat ng kanta at bumuwag sa Guinness World Record bilang may pinakamaraming pagsasalin ng isang kanta sa iba’t ibang wika sa buong mundo.

Nalampasan niya ang dating world record na may 398 na pagsasalin sa iba’t ibang wika ng isang kanta, na hawak ni Sunnet Haran mula India.

Sa loob ng 20 taon sa propesyon ng paglikha ng mga kanta sa iba’t ibang wika, marami na ang na-inspire ni Philip—hindi lamang ang kanyang pamilya kundi pati na rin ang buong mundo.

Bagama’t sanay na siya sa paggawa ng kanta, hindi naging hadlang ang iba pang gawain at ang sabay-sabay na pag-aalaga sa kanyang mga anak para makagawa ng isang hindi malilimutang regalo sa kanyang anak.

Isa sa pinakamahirap para sa kanya sa paggawa ng kantang ito ay ang tamang pagpo-pronounce ng bawat salita. Ito rin ang paraan upang maipakita ang respeto sa bawat wika na kanyang sinasambit.

Bukod sa kanyang anak na si William, ginawa ni Philip ang kantang ‘I love you’ upang marinig at matanggap ito ng mga taong talagang nangangailangan ng salitang “I love you.”

Nakakatuwang malaman na sa panahon ngayon na karamihan sa balita ay puro krimen, korupsyon, kahirapan, at isyung pangkalusugan, may mga tao pa rin na pinapalaganap ang pagmamahal at malasakit sa kapwa.

Isa si Philip sa nagpapatunay na ang pagmamahal ay hindi nasusukat sa dami o halaga ng iyong ibinibigay. Kahit sa pinakamaliit na bagay, o kahit isang salitang “I love you,” makakapagbigay ka ng hindi matatawarang halaga sa iba.

111 yrs. old na British, "World's Oldest Man"

ni Eli San Miguel - Trainee @News | April 7, 2024

Opisyal na binansagan bilang "World's Oldest Man" ang 111-anyos na si John Alfred Tinniswood mula sa England.

Inihayag ito ng Guinness World Records noong Biyernes, dalawang araw matapos ang balita ng kamatayan ng naunang title holder na si Juan Vicente Pérez, sa kanyang edad na 114, isang buwan bago ang kanyang ika-115 na kaarawan.

Isinilang si Tinniswood sa hilagang-kanlurang lungsod ng Liverpool sa England noong Agosto 26, 1912.

Sa kabuuan ng kanyang buhay, nagawa niyang dumaan sa panahon ng dalawang digmaang pandaigdig, pati na rin sa Great Influenza at COVID-19 pandemic. Nakatala rin siya bilang pinakamatandang World War II veteran na nakaligtas sa trahedya, ayon sa Guinness.

Sa kabilang banda, 117-anyos naman ang pinakamatandang babae sa buong mundo, si Maria Branyas Morera, na nakatira sa Spain.

Content Creator, kumasa sa 100 hrs. non-stop na pag-iyak, 'nabulag'

ni Mabel G. Vieron @Gulat Ka 'No?! | August 12, 2023

Natural na sa atin ang pag-iyak pero kakayanin n’yo kaya ang ginawa ng isang content creator sa Nigeria? Sinubukan niya lang namang umiyak ng 100 hours.

Yes, mga ka-BULGAR 100 hours para sa Guinness World Record.

Malamang sa malamang ay nais n’yo rin malaman kung sino nga ba itong lalaking itinutukoy ko, ‘wag na tayong magpadalus-dalos pa dahil siya lang naman si Daniel Tembu na sumalang noong Hulyo 9.

Nang nasa ika-anim na oras na siya ng kanyang crying marathon, itinigil niya ito dahil umano nakakaramdam siya ng pananakit ng ulo, pamumula ng mga mata at pamamaga ng mukha. Bukod dito, ang pinakamalalang sintomas na kanyang natamo ay hindi na siya nakakakita!

Matapos ang 45-minutes na pahinga, unti-unting bumalik ang paningin ni Daniel, ngunit hindi na malinaw kung ipinagpatuloy pa ba nito ang crying marathon at kung nakumpleto ba niya ang 100 hours na pag-iyak.

Naging viral ito at nakaabot sa Guinness World Records Organization ang balitang ito, naglabas din sila ng official statement ukol dito.

Ayon sa kanila, ang crying marathon na ginawa ni Tembu ay hindi isang Guinness World Record official attempt. Ito ay dahil wala umano silang category na “longest time crying” o kahit anong may kinalaman sa pag-iyak. Kaya kung nakumpleto man ni Tembu ang 100 oras na pag-iyak, mukhang masasayang lang ang kanyang effort dahil ‘di rin naman pala ito kikilalanin ng Guinness.

Mabuti na lang talaga ay mas inintindi ni Tembu ang kanyang mga nararamdaman kaysa manalo.

Kung ako kay Tembu, baka lalo pa akong maiyak dahil biruin mo ‘yun? Matapos niyang subukan ang 100 hours na pag-iyak ay wala siyang mapapala? Hindi rin biro ang pag-iyak ng anim na oras ‘no!

Kaya mga ka-BULGAR ating isaisip kung ano ang magiging kahihinatnan ng ating mga gagawin, okie?