Feeding program para sa estudyante, tuloy pa rin!

ni Grace Poe - @Poesible | September 21, 2020

Panahon na naman sa Kamara at Senado ng pagrerebisa ng budget ng mga sangay at ahensiya ng pamahalaan. Isa-isang sumasalang ang mga bawat tanggapan para i-presenta ang planong paggugol nila sa darating na taon, at ipaliwanag sa mga mambabatas kapag may tanong tungkol dito. Bahagi ito ng tungkulin ng Kongreso na magpasa ng national budget para sa bansa matapos suriin ang hinihingi ng mga opisina ng pamahalaan.

Pagkakataon ito para sa mga mambabatas tulad ng inyong lingkod na maisulong ang aming mga adbokasiya. Tulad ng dati, tiniyak natin na ang mga bata ay makatatanggap ng kinakailangan nilang suporta mula sa ating pamahalaan. Pinagtuunan natin ng pansin ang pagpopondo sa school-based feeding program sa ilalim ng national budget kahit pa walang pisikal na klase ang mga mag-aaral.

Pinaglaanan ng P5.97 bilyong pisong budget ang school-based feeding program sa ilalim ng Department of Education. Kasalukuyang itong tinatalakay sa budget deliberations sa Kongreso.

Suportado natin ang naisip ng DepEd na magrasyon ng masustansiyang pagkain sa mga estudyante na maaaring ihatid ng guro sa bahay ng mag-aaral o kaya naman ay kunin ng mga magulang sa paaralan. Kasabay itong dadalhin ng modules ng mga bata. Naniniwala tayong malaking tulong ito para sa ating mga mag-aaral na apektado ng pandemya. Sa gitna ng kinahaharap natin, walang batang nag-aalala dapat kung kailan siya susunod na kakain. Gawan natin ng paraan para lamanan ang kanilang tiyan para maging alerto ang kanilang isipan.

Kabilang na sa target beneficiaries ang mga papasok na kindergarten learners at ang mga mag-aaral mula Grade 1 hanggang Grade 6 na wasted at severely wasted base sa 2019-2020 School-Based Feeding Program report. Gayunman, hindi na kasama rito ang umabante na sa Grade 7.

Ang magandang nutrisyon ay may malaking kaugnayan sa maayos na paglaki ng isang bata. Ang pag-intindi natin sa nutrisyon nila hangga’t maaga ay magbibigay sa ating kabataan ng mas malaking tsansa na labanan ang mga nakamamatay na karamdaman at makatutulong sa kanilang pag-unlad na pisikal, intelektuwal, sosyal, emosyunal at moral.

Katuwang na programa ng national feeding program ang kampanya para sa public health nutrition at values transformation para sa mas buong lapit sa edukasyong pangkalusugan at nutrisyon.

Sa panahong marami sa ating mga kababayan ang nawawalan ng trabaho at pagkakakitaan dahil sa epekto ng COVID-19 sa ating ekonomiya, ang feeding program para sa mga bata ay isang malaking bagay para pangalagaan ang kanilang kalusugan. Ang programang ito ay para sa kapakinabangan ng higit na nangangailangan sa ating lipunan na pinakaapektado ng pandemya. Umaasa tayong maaaprubahan sa Kongreso ang budget nito at maipatutupad ng maayos para makarating ang tulong sa dapat makatanggap nito.

Automation sa Customs, ‘di lang solusyon sa korupsiyon, safety measure rin kontra COVID-19

ni Grace Poe - @Poesible | September 14, 2020

Hello, mga bes! Sa gitna ng pandemyang dinaranas ng ating bansa, nakikita natin ang kahalagahan ng pagkakaroon ng pondo ng pamahalaan para sa mga programang makatutulong sa taumbayan. Isa sa mga pinagkukunan nito ay ang koleksiyon mula sa buwis at taripa.

Nakakailang palit na ng administrasyon at pinuno, hindi pa rin nawawala ang korupsiyon sa Bureau of Customs. Lagi’t laging mainit ang mga mata ng taumbayan sa kawani ng nasabing ahensiya. Mula sa illegal smuggling hanggang sa undervaluation ng imported items, hindi maalis-alis ang alingasngas ng kurakutan sa BOC.

Sa ating pakikipagpulong sa economic managers ng ating bansa tungkol sa 2021 budget, kinumusta natin ang automation project ng Customs na nagkakahalagang P6-B. Idinisenyo ito upang sugpuin ang technical smuggling. Inatasan natin ang BOC na pabilisin ang awtomasyon ng mga proseso sa kawanihan dahil naniniwala tayong kung matatanggal ang interbensiyon ng mga empleyado, hindi lang maiiwasan ang korupsiyon, kundi mababawasan din ang exposure ng mga tao sa isa’t isa na posibleng maging dahilan ng pagkalat ng COVID-19.

Sa panahong ito, kailangan ng gobyerno ng karagdagang pondo para ipantustos sa laban natin sa COVID-19 at sa pagbangon ng ating ekonomiya. Kung ang nawawala sa koleksiyon ng BOC ay mapupunta sa taumbayan, napakaraming makikinabang at matutulungan sa halip na mapunta sa bulsa ng mga tiwaling kawani ng pamahalaan. Bilyung-bilyon piso ang nawawala sa atin dahil sa technical smuggling. Kung makokolekta ito ng Customs at maibubuhos sa makabuluhang mga programa ng pamahalaan, panalo ang taumbayan.

Naniniwala tayong sa pamamagitan ng digitisasyon ng mga proseso ng Customs, masisiguro natin ang bukas at mabisang kalakaran na magpapabuti sa koleksiyon ng ahensiya. Bagama’t may gastos din para maiayos ang sistema, maliit na bagay ito kumpara sa pakinabang na makukuha sa pagsasaayos ng proseso, bukod pa sa dagdag na proteksiyon ng mga kawani at mga taong nakikipagtransaksiyon sa BOC laban sa COVID-19.

Kung paanong nagsisikap ang ating mga kababayan na maghanap ng pagkakakitaan ngayong may pandemya, dapat ring magsigasig ang mga nasa BOC na paigtingin ang pagkolekta ng buwis mula sa nagpapapasok ng kalakal sa ating bansa. Walang magiging pahirap sa tao dahil itatama lang ang baluktot na nakasanayan ng mga nanlalamang sa pamahalaan. Sa halip na mapunta sa katiwalian, ilagay natin ang malilikom mula sa technical smuggling sa mga programang magdadala ng ayuda sa palad at bibig ng mga kababayan nating lubhang nangangailangan.

Hirit ng MTRCB na rating ng Netflix, kalokohan!

ni Grace Poe - @Poesible | September 7, 2020

Hello, mga bes? Kumusta kayo at ang inyong pamilya? Sana ay malusog kayong lahat.

Panahon ito na ubuhin lang ang isa sa mga miyembro ng pamilya, nakakapraning na. May takot palagi na baka nakakuha na ng COVID-19. Hindi natin nakikita ang kalabang ito, ang magagawa lamang natin ay ibayong pag-iingat sa pagsunod ng health and safety protocols na inirerekomenda sa atin ng mga eksperto at palakasin ang ating immune system. Kahit nagluluwag na sa pagbubukas ang mga establisimyento, pakiusap, mga bes, maging mas maingat tayo! Ginagawa natin ito para sa ekonomiya at kabuhayan, hindi dahil wala nang virus!

Paalala rin sa mga kababayan natin na bigyan ng konsiderasyon ang mga suspek at nagpositibo sa COVID-19. Walang puwang ang diskriminasyon sa kanila sa lipunan natin. Basta’t sumusunod sila sa quarantine protocols, huwag natin silang gambalain.

Mag-ingat at maging ligtas palagi, mga bes.

***

Sa gitna ng pandemya, marami sa mga kababayan natin ang naglilibang sa pamamagitan ng panonood ng mga pelikula at serye. Ang streaming services tulad ng Netflix, patok na patok sa ating mga kababayang hindi makalabas ng bahay dahil sa virus.

Lumabas sa balita ang balak na regulasyon ng Movie and Television Ratings and Classification Board (MTRCB) sa streaming services tulad ng Netflix, Amazon Prime Video, at iba pa. Mula ito sa naging pahayag ng legal division chief ng MTRCB sa pagdinig ng isang komite sa Senado na kailangan ng regulasyon ng nilalaman ng mga palabas sa mga nasabing plataporma.

Marami tayong kababayan na umalma sa panukalang ito. Pambihira nga naman, ito na lang ang pinaglilibangan ng tao, pakikialaman pa. Isa pa, mayroon nga namang settings ang nasabing online streaming platforms na may mga palabas na klasipikadong pambata lamang. Hindi na kailangan ng karagdagang regulasyon mula sa pamahalaan.

Bilang dating MTRCB Chair, hindi tayo pabor sa panukalang ito. Ang daming trabaho ng MTRCB at kulang ang tao, kaya hindi nga ma-review lahat ng palabas sa cable TV. Idadagdag pa nila ang Netflix at ang iba pang streaming services sa gusto nilang pasukin. Pagtuunan ng pansin muna ang mga gawaing dapat aksyunan bago magtakda at umako ng panibagong responsibilidad.

Pangunahing trabaho ng MTRCB ang klasipikasyon ng mga palabas. Nauunawaan din naman natin ang pinanggagalingan ng nagpanukala. Gayunman, ang direksiyon dapat ng ahensiya at ng industriya ay tungo sa sariling regulasyon. Hindi censorship ang mandato ng MTRCB. Hindi ito umiiral para maniil at magpahirap kundi para gabayan ang sambayanan sa matalinong panonood at paglilibang.