Google, hindi lilitisin para sa kaso sa US digital ads

ni Angela Fernando @Overseas News | June 9, 2024

Nagdesisyon ang jury na hindi haharap ang Google sa paglilitis kaugnay sa mga alegasyon ng pagiging dominante nito sa digital advertising matapos magbayad ng $2.3-milyong danyos na hiningi ng gobyerno ng United States.

Ang pagbabayad ng Google ay nangangahulugang maiiwasan nito ang paglilitis sa harap ng hurado. Hiling rin ng kumpanya na ito ang maging kauna-unahang paglilitis sa harap ng hurado sa isang sibil na kaso ng antitrust na isinampa ng U.S. Justice Department.

Matatandaang sinampahan ng kaso ng Justice Department nu'ng nakaraang taon at ng isang coalition ng mga estado ang tech giant, na inaakusahan ng ilegal na monopolyo sa digital advertising at sobrang singil sa kanilang mga users.

Nagdesisyon si U.S. District Judge Leonie Brinkema sa Alexandria, Virginia, nu'ng nagdaang Biyernes at itinakda ang paglilitis na hindi kinakailangan ng jury sa Setyembre 9, kung kailan niya diringgin ang mga argumento upang direktang magpasya sa kaso.

Google, inaayos ang demanda sa ‘Incognito’

ni Angela Fernando - Trainee @News | April 2, 2024

Magbubura ang Google ng bilyun-bilyong talaan ng data bilang bahagi ng pag-aayos para sa isang demanda sa ‘Incognito’ feature kung saan inakusahan ang tech giant ng hindi wastong pagsubaybay sa pag-browse sa web ng mga user na dapat sana'y pribado.

Ang kaso ay orihinal na isinampa nu'ng 2020 na kumaladkad sa kumpanya dahil sa maling pagpapakita ng kinokolekta nitong data mula sa mga user na nag-browse sa internet sa pamamagitan ng private browsing mode sa Chrome.

Sumang-ayon ang Google na ayusin ang kaso nu'ng 2023, ngunit ang mga tuntunin ng pag-aayos ay unang ibinulgar sa isang pagsusumite nu'ng Abril 1.

Ang mga aksyon ng kanilang pagsasaayos ay nakapaloob sa dokumento ng Korte na isinumite nu'ng Lunes sa pederal na Korte ng San Francisco.

Papalitan din ng Google ang kanilang pahayag upang ipaalam sa mga user kung anong data ang kinokolekta nito sa bawat pagpasok ng isang user sa isang pribadong sesyon ng pag-browse.

Samantala, sa susunod na limang taon, papayagan ng Google ang mga user ng Incognito na i-block ang third-party cookies bilang bahagi ng pag-aayos.

YouTube, Gmail, at Google Drive, nagloko

ni Ronalyn Seminiano Reonico | December 14, 2020

Nagloko ang YouTube, Gmail at Google Drive ngayong Lunes nang gabi at hindi ma-access ng mga netizens sa buong mundo ang mga naturang sites. Mabilis na nag-trending sa social media ang hashtags #googledown at #YouTubeDOWN.

Pahayag naman ng YouTube, "We are aware that many of you are having issues accessing YouTube right now – our team is aware and looking into it. "We'll update you here as soon as we have more news."

Ayon sa outage monitoring website na DownDetector.com, karamihan sa mga naapektuhan ng pagloloko ng mga naturang sites ay ang mga users na mula sa Manila, Poland, Hungary, Belgium, London, Australia, United States, Britain at India.

Samantala, naibalik din naman ang serbisyo ng YouTube at Gmail matapos ang mahigit isang oras. Saad pa ng YouTube, “Update -- We’re back up and running! You should be able to access YouTube again and enjoy videos as normal.”