Arroyo, aprub kay P-BBM sa pagsuspinde sa Maharlika funds

ni Angela Fernando - Trainee @News | October 18, 2023

Sinang-ayunan ni dating presidente at ngayon ay House Deputy Speaker Gloria Macapagal-Arroyo ang naging desisyon ni Pangulong Bongbong Marcos na pansamantalang suspendihin ang Maharlika fund.

Wala raw mawawala kung susuportahan ang ating pangulo, ani Arroyo matapos tanungin ng isang reporter sa Kamara nitong Miyerkules, Oktubre 18.

Dumalo nga sa isang pagdinig ng Komite para sa Basic Education si Arroyo nang hingan ito ng kanyang pahayag bilang siya ay isang ekonomista, sa ginawang kilos ng Presidente kamakailan.

Tiwala umano ito sa magiging kilos ni Presidente Bongbong at alam nitong may dahilan ito sa kanyang naging desisyon.

"As a member of Congress, what I want to say is, to repeat, the President must have his reasons and we trust him... and I think we have nothing to lose if we support the President." Saad pa ni Arroyo.

GMA kay ex-P-Du30: Balik ka na sa pulitika

ni Mylene Alfonso @News | September 12, 2023

Kinumbinse ni dating Pangulo at ngayo'y House Deputy Speaker Gloria Macapagal-Arroyo si dating Pangulong Rodrigo Duterte na maging aktibong muli sa pulitika.

Ito ang inihayag ni Senador Christopher "Bong" Go matapos mag-post ng litrato sa Facebook ng pagpupulong nina Arroyo, Duterte, dating Senate President Vicente Sotto III at dating Executive Secretary Salvador Medialdea noong Sabado.

"Isang simpleng kamustahan at masayang pagkikita ang nangyari kasama ang mga pinunong naglingkod sa bayan sa iba’t ibang posisyon o kapasidad noong mga nakaraang administrasyon. Nagbalik-tanaw sila sa mga panahong nagkasama sila sa gobyerno," ani Go.

"Sa nasabing pagkikita, kinukumbinse rin ni Arroyo si Duterte na maging aktibo muli sa pulitika," saad pa ng senador.

Inimbitahan umano ni Arroyo si Duterte sa isang ‘informal meeting’ sa pamamagitan ng isa sa mga staff at nagkataon namang nasa Maynila ang dating Pangulo.

"Nagkataong magkasama kami ni Tatay Digong noon matapos ko siyang samahan sa kaniyang medical check up sa hospital, gaya ng dati kong ginagawa sa kanya," paliwanag pa ni Go.

"At dahil bihira lang naman na pumunta sa Maynila sa ngayon si dating Pangulong Duterte, sumabay na rin sa pagkikitang iyon, sa tulong ni dating executive secretary Salvador Medialdea, si dating Senate President Tito Sotto na gusto ring makumusta nang personal ang kanyang itinuturing na kaibigan na si Tatay Digong," ayon kay Go na dating aid ni Duterte.

"Sabi ko nga, magkaiba man ng pinanggalingan, iba’t iba man ang hinawakan nilang posisyon sa gobyerno, iisa lang ang kanilang hangarin — ang paglingkuran ang sambayanan,” pagtatapos ng senador.

GMA sa meeting nila ni Robredo: Usapang pulitika

ni Mylene Alfonso @News | September 11, 2023

Nagsalita na si dating Pangulong Gloria Macapagal-Arroyo nitong Sabado sa mga espekulasyon kaugnay sa larawan nila kasama si dating Bise Presidente Leni Robredo.

Sa isang pahayag, sinabi ni Arroyo na dumalo lamang siya sa isang social dinner kasama si Robredo.

"I recently had a social dinner with former Vice President Leni Robredo and mutual friends from Bicol," ani Arroyo.

"We chatted about Bicol politics," wika pa ng House Deputy Speaker.

Nagpatibay umano kasi ang naturang larawan na umikot sa social media tungkol sa mga usapan sa diumano'y pagkakaugnay ni Arroyo kay Robredo, na nabigo sa karera sa pagka-pangulo laban kay Pangulong Ferdinand Marcos Jr. Nabatid na si Arroyo ay kilalang kaalyado ng kasalukuyang Vice President na si Sara Duterte-Carpio, ang running mate ni Marcos.