2 Filipino tourists patay sa bus crash sa Germany

by BRO @News | September 28, 2026

Photos: Philippine Consulate General Frankfurt / AP

Patay ang dalawang Filipino at hindi bababa sa walo ang malubhang nasugatan matapos bumaligtad ang bus na sinasakyan ng isang Filipino tour group sa Bavaria, Germany.

Ayon sa German officials, umalis sa highway ang bus malapit sa Buchloe sa Ostallgäu dakong alas-6 ng umaga noong Linggo.

Tinatayang 35 Filipino ang sakay nito na patungo sanang Munich para sa Oktoberfest. Dalawang driver ang kasama sa biyahe at kapwa hindi nasugatan.

Anim na pasahero ang isinugod sa ospital gamit ang rescue helicopters, habang dalawa ang isinakay sa ambulansya. Isa sa mga malubhang nasugatan ay kritikal ang kondisyon.

Patuloy ang imbestigasyon sa sanhi ng aksidente. Nakikipag-ugnayan ang Philippine Consulate General sa Frankfurt sa German authorities para sa mga apektadong Filipino.

Pinoy health workers, nakasama sa €1-B COVID care bonus ng German gov’t — DOLE

ni Lolet Abania | March 15, 2022

Nakatakdang mabenepisyuhan ang mga Filipino healthcare workers sa Germany na nagsilbi sa gitna ng COVID-19 pandemic mula sa COVID care bonus ng German government, ayon sa Department of Labor and Employment (DOLE).

Naglaan ang gobyerno ng Germany ng €1 billion para sa COVID care bonus, kung saan hahatiin equally ito sa mga nurse na nasa care homes at mga nurse sa mga ospital, ayon kay Labor Attaché Delmer Cruz ng Philippine Overseas Labor Office (POLO) sa Berlin sa kanyang report kay DOLE Secretary Silvestre Bello III.

“The initiative of Germany to reward the frontline workers including our very own for their service during the pandemic is really commendable. This will inspire all the more our healthcare workers in providing the brand of service that the Filipinos are known for even in the midst of crisis,” pahayag ni Bello.

Sinabi ng DOLE na ang mga healthcare workers na nakatalaga sa elderly care ay makatatanggap ng insentibo na naglalaro mula 60-550 Euros o P3,400-P31,000.

Kabilang sa mabebenepisyuhan nito ay mga nursing staff na nagtatrabaho sa geriatric care ng tinatayang tatlong buwan sa pagitan ng Nobyembre 1, 2020 at Hunyo 30, 2022, at iyong nananatiling employed hanggang Hunyo 30.

Ang iba pang beneficiaries ng COVID care bonus ay mga support staff, gaya ng administrators at iyong mga nasa building services, kitchen, cleaning, reception at security services, gardening at grounds maintenance, at laundry o logistics.

Ang mga trainees naman para sa elderly care, ibang empleyado, volunteers, at nakilahok sa “voluntary social year” scheme ay eligible din para makatanggap ng naturang insentibo.

1M doses ng Moderna vaccine, dumating na

ni Lolet Abania | December 17, 2021

Dumating na sa bansa ang 1,020,500 doses ng Moderna COVID-19 vaccine na donasyon ng German government ngayong Biyernes.

Ayon sa National Task Force Against COVID-19, lumapag ang latest batch ng vaccine doses ng COVID-19 sa Ninoy Aquino International Airport Terminal 3, bago mag-alas-4:00 ng hapon ngayong araw.

Pinasalamatan naman ni NTF chief implementer at vaccine czar Secretary Carlito Galvez Jr. ang gobyerno ng Germany para sa donasyon nito sa pamamagitan ng COVAX facility.

Sinabi rin ng task force na may karagdagang 940,800 doses pang Moderna vaccine na donasyon ng Germany ang darating ngayong Biyernes ng gabi.

Pahayag naman ng National Vaccination Operations Center (NVOC), nakapag-administer na ang bansa ng kabuuang 100,019,137 ng COVID-19 vaccine doses nationwide hanggang nitong Disyembre 16.