Triathlete Casares Gold sa SEAG, SIBOL Esports, naka-ginto pa

ni Gerard Arce @Sports | May 9, 2023

Matagumpay na nadepensahan ni Fernando Casares ang kanyang korona sa men’s Triathlon, habang ginalingan naman ng SIBOL Esports national squad ang laro sa League of Legends: Wild Rift (mobile) sa 32nd Southeast Asian Games sa Cambodia.

Sinimulan ng Filipino-Spanish triathlete ang araw ng Lunes sa mabilis na paglangoy, pagtakbo, at pagpidal sa kabuuang oras na 58.32 minuto upang malampasan sa karera ang Indonesian triathlete na si Rashif Amila Yaquin na rumehistro sa 58.45, habang nakapaglista ng dagdag na bronze medal mula kay Andrew Kim Remolino sa 59.53 para sa kanyang ikalawang medalya matapos magbulsa ng silver medal sa men’s individual Aquathlon noong Sabado sa Kep City, Kep Town Beach.

Naputol ang pagrereyna ni Kim Mangrobang sa women’s triathlon nang maunahan ng halos 2 minuto ng naturalized triathlete na si Margot Garabedian upang matapos ang tatlong taong nasa tuktok ng podium finish.

Rumehistro si Mangrobang ng 1:07.21 para sa silver medal, habang nakuha ni Garabedian ang ikalawang gintong medalya (1:05.31) nang manguna sa women’s individual Aquathlon noong Sabado ng umaga.

Nabigo namang makapag-uwi ng double gold si Mangrobang na kakapanalo lang ng gintong medalya sa women’s duathlon noong Linggo.

Bago tapusin ang araw ng kompetisyon nitong linggo ng gabi, nagpamalas ng husay at diskarte sa laro ang SIBOL upang makuha ang Wild Rift title sa mixed team, 3-1 kontra Vietnamese.

Naisagawa ng grupo nina Aaron Bingay, Chammy Nazarrea, Golden Hart Dajao, Justine Ritchie Tan, Reniel Angara at Gerald Gianne Gelacio ang unang gintong medalya para sa SIBOL sa biennial meet ng padapain Vietnamese team na binubuo nina Gia Huy Tran, Hong Phuc Tran, Minh Manh Bui, Nhat Tan Dang, Trung Hau Ho, Tien Nhat Hoang at Trung Duc Nguyen.

Masusubukan ang kaastigan ni Casimero kontra Namibian

ni Gerard Arce @Sports | May 9, 2023

Muling masisilayan sa ibabaw ng ring si dating three-division World champion John Riel “Quadro Alas” Casimero na sisimulang gapangin pabalik ang World title fight sa pakikipagbanatan kay reigning WBO global super bantamweight champion Fillipus “Energy” Nghitumbwa ng Namibia para sa homecoming bout nito sa Mayo 13 sa Okada Manila sa Paranaque City.

Mayroong eight-fight winning streak si Casimero (32-4, 22KOs) na nais muling makapasok sa World rankings matapos matanggalan ng korona na WBO bantamweight title nung isang taon matapos labagin ang alituntunin ng British Boxing Board of Control (BBBoC) sa United Kingdom sa nakalinyang laban kontra kay Paul Butler, na nauwi sa panalo ng Briton kay Jonas Sultan, na kalauna’y pinatumba ni Naoya “Monster” Inoue upang maging undisputed 118-pound champion.

Matagumpay namang nakabalik sa pakikipaglaban si Casimero na nakuha ang second-round knockout kay Ryo Akaho nung Disyembre sa Paradise City Plaza, Incheon South Korea.

Ito rin ang unang pagkakataon na dadalhin ng 34-anyos mula Ormoc City, Leyte ang Treasure Boxing Promotions na ibabandera ni dating World champion Masayuki Ito ng Japan, habang muling masisilayan rin sa kanyang unang laban sa Pilipinas sapol nung 2019 ng talunin nito si Cesar Ramirez Lora ng Mexico sa bisa ng 10 round knockout sa San Andres Civic and Sports Center sa Malate, Manila.

Kasalukuyang naka-pwesto sa No.5 contender sa WBO, No.8 sa WBC, at No.15 sa IBF title belt si Casimero sa 122-lbs division na kasalukuyang pinaghahatiang pagharian nina Filipino Marlon “Nightmare” Tapales (IBF at WBC) at American Stephen Fulton (WBA at WBO), habang nasa 10th sa WBO si Nghitumbwa.

Mayroon namang 11-fight winning streak ang Namibian boxer na si Nghitumbwa (12-1, 11KOs) na lahat ng panalo ay galing sa knockout, kung saan idedepensa niya sa ikatlong beses ang titulo na unang napagwagian laban kay South African Innocent Mantengu (15-7-1 5KOs) nung Oktubre 16, 2021, habang nadepensahan niya ito laban kina Said Chino ng Tanzania at Sabelo Ngebinyana ng South Africa.

Ramos naka-3 silver medals sa Asian W'Lifting C'Ships

ni Gerard Arce @Sports | May 6, 2023

Muling nagbigay ng karangalan sa Pilipinas si Filipina weightlifter Rose Jean Ramos matapos bumuhat ng tatlong silver medals sa women’s 45kgs category sa isinasagawang 2023 Asian Weightlifting Championships kahapon sa Jinju Arena Weightlifting Hall, South Korea.

Nagtapos sa 2nd place sa lahat ng kategorya ang Zamboangena lifter nang buhatin ang 73kgs sa snatch, 88kgs sa clean and jerk at kabuuang 161kgs upang sumegunda kay 2012 London Olympics 4th placer Chayuttra Pramongkhol ng Thailand sa mga nabuhat na 77kgs (snatch), 100kgs (clean and jerk) at 177kgs (total).

Minsang nadiskuwalipika si Pramongkhol noong 2018 Ashgabat ng International Weightlifting Federation matapos magpositibo sa ipinagbabawal na substansiya, habang naibulsa ni Siti Nafisatul Hariroh ng Indonesia ang 3 bronze medals nang makuha ang 71kgs (snatch), 88kgs (clean and jerk) at 159kgs (total).

Nahirapang malampasan ng 17-anyos na Junior High School mula Mampang National High at two-time Youth World Championships ang mabibigat na binuhat ng 2022 Bogota World silver medalists pagtuntong ng clean and jerk, sapat na upang mahigitan ang tansong medalya na kinubra sa 2022 edisyon sa Manama, Bahrain.

Nasundan ni Ramos ang gintong medalya sa Asian Youth Weightlifting Championships sa Tashkent, Uzbekistan, habang silver din siya sa Junior event ng parehong timbang.

Sumasabak din ang kapatid nito na si Rosegie sa women’s 49kgs division, habang pinananabikan ang pagsabak nina 2020+1 Tokyo Olympic gold medalist Hidilyn Diaz at Olympian Elreen Ando sa women’s 59kgs category sa Linggo, habang bubuhat din sina John Ceniza ngayong Sabado sa men’s 61kgs at nina SEA Games gold medalists Vanessa Sarno at Kristel Macrohon sa women’s 71kgs class sa Martes. .