Leleksiyunan ng CCS ang Gerflor, abangan ang laro ni Rondina sa PVL

ni Gerard Arce @Sports | June 29, 2023

Mga laro ngayong Huwebes

(FilOil EcoOil Arena, San Juan City)

1:30 n.h. – Creamline vs Gerflor Defenders (Pool A)

4:00 n.h. – Choco Mucho vs Farm Fresh (Pool B)

6:30 n.g. – Petro Gazz vs Foton (Pool B)

Puntirya ng defending champions Creamline Cool Smashers na makuha ang ikalawang sunod na panalo at maagang liderato sa pakikipagtuos sa baguhang Quezon City Gerflor Defenders sa pambungad na laro, habang masisilayan din sa unang pagkakataon ngayong komperensiya ang Choco Mucho Flying Titans at Foton Tornadoes laban sa magbabawing Farm Fresh Foxies at Petro Gazz Angels sa 2023 Premier Volleyball League (PVL) Invitational tourney ngayong Huwebes ng hapon sa FilOil EcoOil Arena sa San Juan City.

Maagang ipinamalas ni three-time conference MVP Diana Mae “Tots” Carlos ang kanyang bagsik sa laro nang pangunahan ang pangwawalis ng Cool Smashers laban sa pinalakas na Chery Tiggo Crossovers sa 25-22, 25-22, 25-17 noong Martes ng gabi.

Kumarga si Carlos ng game-high 24 puntos mula sa 21 atake kasama ang 9 digs, katulong sina Jema Galanza na tumapos ng 12 puntos at limang excellent receptions, habang umantabay din si Celine Domingo sa 6, Jeanette Panaga sa 5 at Alyssa Valdez na nagbabalik sa liga sa tatlong puntos at 10 digs, matapos sumailalim sa operasyon at mahabang rehabilitasyon.

“It’s quite different talaga. Siguro this is the longest time that I’ve never played volleyball in my life. Six months,” wika ng dating three-time MVP at multi-titlist na unang beses nakitang nakabalik sa laro sa nakalipas na 32nd Southeast Asian Games sa Phnom Penh sa Cambodia. “So, it’s one step at a time, and I really have to trust the process.”

Makakatapat ng Cool Smashers ang Gerflor Defenders sa unang laro sa ala-1:30 ng hapon, na ipaparada ang mga baguhang manlalaro mula collegiate league na sina Alyssa Bertolano at Ethan Arce mula UP Lady Maroons at mga beteranong sina Carmina Aganon-Digal, Fen Emnas, Mary Anne Esguerra, Shanne Palec, Janine Navarro at Ivy Perez.

Masisilayan sa pagbabalik aksyon sa indoor volleyball si Cherry Anne “Sisi” Rondina para sa Choco Mucho na makakaharap ang magbabawing Farm Fresh sa 2nd game ng 4:00 ng hapon, habang tatapusin ng three-game schedule ang All-Filipino runner-up Petro Gazz kontra baguhang grupo ng Foton Tornadoes na pagbibidahan nina Jasmine Nabor, Nene Bautista at Shaya Adorador sa alas-6:30 ng gabi.

Phl Women's Team, 7th Place vs. Uzbekistan sa AVC Cup

ni Gerard Arce @Sports | June 26, 2023

Tumapos sa ika-pitong pwesto ang Pilipinas sa 2023 AVC Challenge Cup for Women matapos ang manaig kontra sa Uzbekistan sa iskor na 25-14, 13-25, 25-18, 25-18 kahapon sa Tri Dharma Petrokimia Gresik Gymnasium sa East Java, Indonesia.

Nagtulungan sina incoming rookie spiker mula Akari Chargers Faith Nisperos kay Shaya Adorador ng Foton Tornadoes at Aiza Maizo-Pontillas ng Petro Gazz Angels upang makabangon sa masamang second set na laro upang tapusin ang two-game losing skid ng bansa sa torneo.

Bumanat ang dating Ateneo Blue Eagles power-hitter ng kabuuang 17 puntos sa ikalawang paglahok sa national squad matapos masilayan noong AVC Women’s Club Championship sa Thailand noong 2021 sa ilalim ni coach Jorge Souza de Brito ng Brazil.

Sumaklolo sina Adorador sa 13 pts at Maizo-Pontillas sa 12pts, habang mayroong siyam na puntos si Ezra Madrigal upang maiangat ang bansa sa fourth set at tumapos sa ika-7th sa kabuuang 11 na koponan sa torneo.

Naging mahusay ang pagsisimula ng women’s squad ng maagang dominahin ang first set sa 25-14, subalit kinulelat ng husto sa second set ng bumanat para sa Uzbeks sina Tursunpulatova Malikakhon at Boymirzayeva Dilnoza para itabla ang laro sa 13-25.

Nakabangon naman sa third set ang Pinay spikers ng pangunahan ni Nisperos ang atake ng bansa, habang tumulong na rin si Madrigal sa laro.

Naging maganda ang simula ng kampanya ng bansa sa torneo ng pulbusin ang Macau sa straight set, habang nabaon sa host country na Indonesia sa sumunod na laro.

Nagkaroon ng tsansang makapasok sa semifinals ang Pilipinas ang talunin ang India sa dikdikang fifth set na laro sa semifinal berth, hanggang sa payukuin ng Australia.

Nabigo ang bansa laban sa Iran sa classification round para sa 7th place game.

Bagong Foxies, gugulatin ang katunggali sa PVL Opening

ni Gerard Arce @Sports | June 26, 2023

Manonorpresa ang bagong koponan na Farm Fresh Foxies na binubuo ng mga manlalaro galing ng back-to-back NCAA champions na College of Saint Benilde Blazers at dating players ng Adamson University Lady Falcons sa 2023 Premier Volleyball League (PVL) Invitational Conference na magsisimula bukas sa FilOil EcoOil Center sa San Juan City.

Pagbibidahan nina 2023 Finals MVP Jade Gentapa, Gayle Pascual, Mitch Gamit, Cloanne Mondonedo, Jessa Dorog, Clydel Catarig, Chin Basarte, Kim Estenzo, Fiona Getigan, Zam Nolasco, Camille Avila, Wielyn Estoque, Cristy Ondangan at Corrine Apostol mula CSB Lady Blazers at mga dating Lady Falcons na sina Trisha Gayle Tubu, Kate Santiago, Aprylle Tagisip at Jelean Lazo, gayundin ang dating Ateneo Blue Eagles players na sina Joan Narit at Sofia Daniela “Pia” Ildefonso.

“So far, they've been training non-stop. For the Blazers, they never stopped training since the NCAA. And coach Jerry has been very hands-on with the team, integrating all of the players into one cohesive unit,” wika ni assistant team manager Kiara Cruz. Makakasama ng Farm Fresh sa Group B ang Choco Mucho Flying Titans, Cignal HD Spikers, F2 Logistics Cargo Movers, Petro Gazz Angels, at baguhang Foton Tornadoes.

“On our side, our family is already here in sports while my dad used to play volleyball. Ako rin, I used to play because of my dad. It's a sport that has been lingering around with the family. For us, why not try? We are already in basketball so why not volleyball?” saad ni team manager Janica Lao, anak ni sports patron Frank Lao.

Kamakailan lang ay nagdesisyong umalis sa Adamson sina Tubu, Santiago, Tagisip, Rizza Cruz at ace playmaker Louie Romero matapos tanggalin sa Adamson si head coach Jerry Yee, na sinalo naman ng UE Lady Warriors para gumabay sa koponan sa season 86th ng UAAP women’s volleyball tournament.