Nakapaglaro rin si Sotto, umambag ng 6 pts at 3 blocks

ni Gerard Arce @Sports | July 15, 2023

Sa wakas ay nakapagpakitang-gilas sa NBA Summer League si Kai Zachary “Kaiju” Sotto para sa Orlando Magic na nakapag-ambag ng puntos subalit hindi sapat para muling matikman ang ika-apat na sunod na pagkatalo kontra Portland Trail Blazers, 71-88 kahapon sa Thomas and Mack Centre sa Las Vegas, Nevada.

Nabigyan ng 13:23 minutos ang 7-foot-3 Filipino center na nagrehistro ng 6 puntos, 4 rebounds at 3 blocks para sa debut game kasunod ng tatlong larong pagkabangko matapos pagdesisyunan ni coach Dylan Murphy na hindi paglaruin, kung saan lahat ay nagresulta sa pagkatalo.

Nangapa man sa unang pasok sa laro ang 21-anyos na Gilas Pilipinas nang tawagan ng three-second defensive violation. Naglaro ito ng 5:37 minuto sa first half, ngunit mas naging impresibo sa final half ng laro at nakapagtala ng 6 puntos na ikinahanga ng Pinoy fans.

Nakasalpak ng matinding dakdak mula sa 3-of-7 field goal shooting mula sa bench kabilang sina top draft picks na sina Anthony Black at Jett Howard.

Nanguna sa iskoring para sa 0-4 kartada ng Magic si Dexter Dennis sa 16pts. Umaasang makakakuha ng two-way contract si Sotto sa Orlando upang maging kauna-unahang homegrown player mula sa Pilipinas na makapaglaro sa NBA. Minsang nabigo si Sotto na mapili ng anumang koponan sa nagdaang 2022 NBA Draft, upang maging free agent ito at undrafted, dahilan para bumalik sa dating koponan sa Australian NBL sa Adelaide 36ers kung saan nagwagi ito ng dalawang beses na NBL Fans MVP ng magkasunod.

Hinihintay din ang serbisyo nito sa Gilas Pilipinas para maglaro sa 2023 World Cup kasama si Clarkson.

Angels at Tiggo Crossovers, matibay ang tsansa sa semis

ni Gerard Arce @Sports | July 14, 2023

Parehong naglista ng magkakasunod na panalo ang last conference runner-up Petro Gazz Angels at Chery Tiggo Crossovers sa magkahiwalay na laro upang patibayin ang tsansa sa top-two semifinal spot kahapon sa mas umiinit na salpukan ng preliminary round ng 2023 Premier Volleyball League Invitational Conference sa Philsports Arena sa Pasig City.

Binitbit ni Gretchel Soltones ang Angel nang itala nito ang game-high 31 puntos upang pangunahan ang 7-0 run sa 5th set para ibigay ang unang pagkatalo sa F2 Logistics Cargo Movers sa bisa ng 20-25, 25-22, 25-12, 33-35, 15-9 sa ikalawang laro, habang madaling winalis ng Chery Tiggo ang baguhang Gerflor Defenders sa 25-19, 25-20, 25-18 unang laro sa nakalistang quadruple-header na bakbakan.

Bumanat ng husto sa mga importanteng tagpo sa deciding set ang dating three-time NCAA MVP mula San Sebastian College-Recoletos Lady Stags upang mailista ang 26 puntos mula sa atake kasama ang 4 blocks at isang service ace para tumabla sa Cargo Movers sa 3-1 kartada at magkaroon ng malaking tsansa patungong semis sa tinaguriang “Group of Death” na Pool B. “Tingin ko naman may kanya-kanya kaming goal, pero sabi ko kapag binigay sa akin 'yung bola ibibigay ko ang lahat para makatulong sa team,” pahayag ng 27-anyos mula Catmon, Cebu para sa ikatlong sunod na panalo.

Sumuporta sa puntusan para sa Angels sina Sabete na may 20pts, Pontillas sa 15pts at Palma sa 12pts, habang lumista ng doble-doble pigura si libero Cienne Cruz sa 23 excellent reception at 19 digs. Nabulilyaso ang kagustuhan ng Cargo Movers na manatiling undefeated na pinagbidahan ni Majoy Baron sa 16pts, limang blocks at isang ace, habang nag-ambag sina Ivy Lacsina ng 15pts, Kim Kianna Dy sa 12pts at Jolina Dela Cruz sa 10pts.

Adiwang, lumipat na sa Bali-based MMA team

ni Gerard Arce @Sports | July 14, 2023

Kinumpirma ni hard-hitting strawweight fighter Lito “Thunderkid” Adiwang ang pag-alis sa Team Lakay upang ibandera ang Bali-based HIIT Studio mixed martial arts team mula Indonesia para ipagpatuloy ang kanyang karera sa ONE Championships.

Kabilang ang 30-anyos na MMA fighter na umalis ng pamosong Filipino-based MMA stable kabilang sina dating ONE champions Eduard Folayang, Kevin Belingon, Honorio Banario, Jeremy Pacatiw, Edward Kelly at Joshua “Passion” Pacio na nagtayo ng panibagong grupo na Lions Nation MMA.

Naunang nagtungo sa Thailand si Adiwang upang makakuha ng bagong karanasan mula kina Absolute MMA boxing trainer Piotr Lieb, MMA coach Joseph Luciano at Muay Thai mentor Leamthong Leenoi. “I needed to make the sacrifice and do the right thing, so I packed my bags and decided to come and train here in Phuket,” pahayag ni Adiwang, na pansamantalang bumalik ng Pilipinas bago tuluyang magtungo sa Indonesia para sa HIIT Studio. “Back home is my comfort zone. I felt I was not being pushed too much. I needed to move out and reach my full potential in this sport. I wanted to be pushed more. That is what made me decide to come out of the Philippines—to improve and learn.”

Minsang nagkaroon ng matinding injury sa tuhod si Adiwang dulot ng ACL injury noong Marso 2022 matapos matalo ito sa laban sa kapwa Pinoy fighter na si Jeremy Miado. Nakatakda na sanang magbalik laban ito nitong Enero, subalit muling napuwersang umatras dahil pa rin sa injury.