Catantan handa na sa US NCAA Fencing, Olympic Qualifying

ni Gerard Arce @Sports | March 22, 2024

Patuloy na nagpapalakas si Olympic hopeful fencer Samantha Kyle Catantan na nananatiling wala pa sa siyento-por-siyento ang kalusugan ng tuhod nito makaraang magtamo ito ng pinsala sa kanyang ACL noong 2023. 

Bahagyang nakahinga ng maluwag ang 2021 Southeast Asian Games women’s foil gold medalist na paunti-unting nakakabalik sa aksyon matapos ang isang buwang pagpapahinga at pagpapagaling. Nakatakdang sumabak ang Penn State University team captain sa pinal na estado ng US NCAA Fencing Championships simula Marso 21 hanggang 24 sa Colombus, Ohio. “Coming back to fence after 9 months of recovery from ACL surgery was such an experience. I’m grateful and excited to return to the sport I love and once again fence for the Philippines,” pahayag ng fourth-year student-athlete.

Napuwersang iatras sa kanyang huling salang sa Finals sa 2023 SEA Games sa Phnom Penh, Cambodia ang 22-anyos na Pinay Fencer makaraang magtamo ng injury laban kay Kemei Chung ng Singapore sa semifinals, dahilan upang hindi na makalaban kay Maxine Wong ng Singapore sa gold medal match.

Sa kabila ng kahanga-hangang pagtapos na pumangalawa sa pangkalahatan sa Mid-Atlantic/South Regionals noong Marso 9 sa Drew University sa New Jersey, inamin ni Catantan na hindi pa rin siya ganap na nakabalik sa porma. “I’m not quite at 100% yet, pero nagiging close ako araw-araw. Currently, I still need to wear a functional brace for additional support while fencing. It's a temporary measure until I fully regain confidence in my movement,” eksplika ng dating University of the East junior fencer na aminadong masaya at kuntento sa kanyang naging laro, subalit nananatiling mataas pa rin ang inaasahan sa sarili. “I'm very happy with my performance, especially considering this was my international comeback tournament.” 

50/50 pa ang Pacman-Benn fight dahil suspendido ang Briton

ni Gerard Arce @Sports | March 20, 2024

Ang inaabangang pagbabalik sa professional fight ng nag-iisang 8th-division World champion na si Manny “Pacman” Pacquiao ay nabigyan ng bahagyang pag-aalinlangan dahil sa estado ng suspensiyon na ipinataw kay undefeated British boxer Conor “The Destroyer” Benn ng United Kingdom Anti-Doping (UKAD) at British Boxing Board of Control.

Nananatiling naghihintay ang kampo ng dating World Boxing Association (WBA) Continental (Europe) welterweight titlist sa pagtanggal ng naturang suspensiyon sa kanilang bansa, lalo pa’t malaki ang pagnanais ni Matchroom promoter at owner Eddie Hearn na ganapin ang kanilang laban sa London, England.  “Listen, we all want that fight. Manny flew in for talks and to watch the show in Saudi Arabia, so that’s what we’d like to do,” paliwanag ni Hearn sa IFLTV. “We’re waiting for the Conor Benn announcement from the appeal. We were told it was going to be in two weeks. It’s nearly four weeks, so we’ll hear about that appeal any day.”

Nitong Marso 8 ay nagawang dumalo ni Pacquiao at asawang si Jinkee sa laban nina dating heavyweight champion at Olympic gold medalist Anthony Joshua at dating UFC Heavyweight champion Francis “The Predator” Ngannou, mula sa imbitasyon ni His Excellency Turki Alalshikh, Saudi Adviser sa Royal Court bilang Minister ng at chairman ng General Entertainment Authority ng Saudi, habang nagging commentator naman si Benn para sa DAZN.

Nagawang magkaharap at mag-face-off nina Pacman at Benn na matinding itinutulak ng parehong boxing promoter, maging ng bansang Saudi Arabia na ganapin sa kanilang bansa ang naturang bakbakan. Maging si MP promotions President at international matchmaker Sean Gibbons ay kinumpirma ang pagpayag ng dalawang kampo na isuntok ang laban ngayong darating na Mayo o Hunyo.

Golden Tigresses hindi magpapatinag sa Eagles

ni Gerard Arce @Sports | March 20, 2024

Mga laro ngayong Miyerkules (Smart Araneta Coliseum)

2 n.h. – NU vs UP

4 n.h. – Ateneo vs UST 

Patuloy na ilalaban ng University of Santo Tomas Golden Tigresses ang kanilang malinis na kartada laban sa Ateneo Lady Blue Eagles sa tampok na laro, habang kakagatin ng NU Lady Bulldogs na makabawi sa kanilang huling pagkatalo kontra sa nakabawi-bawing (UP) Lady Maroons sa pambungad na laro ngayong araw sa 86th season ng UAAP women’s volleyball tournament sa Smart Araneta Coliseum sa Quezon City.

Ito ang kauna-unahang beses na tangan ng UST ang matamis na 7-0 start sa Final Four era, habang huling beses natikman ng koponan ang malinis na kartada nung 2006 championship run na may siyam na sunod na panalo na tangkang maipagpatuloy ang misyon kontra sa Ateneo sa main game sa alas-4:00 ng hapon, habang maghahampasan naman sa unang laro ang NU at UP sa alas-2:00 ng hapon.

Hindi inaasahang malalagay sa tuktok ng tagumpay ang Golden Tigresses na winalis ang first round kabilang ang mga kampeon ng dalawang season na No.2 at No.3 na De La Salle University Lady Spikers at Lady Bulldogs.

Sagana sa nakukuhang tulong at suporta ang team captain at ace libero na si Bernadett Pepito mula sa kanyang mga batang kakampi sa pangunguna ni league leading MVP at top attacker Angge Poyos na may 42.07 percent at pangalawa sa services sa 0.44 per set, habang mahusay naman ang pamamahagi ni ace playmaker Cassie Carballo sa pagiging top setter sa 4.96 kada laro at top sa service zone sa 0.48 per set.