Rollback sa gas next week

ni Lolet Abania | July 2, 2022

Asahan umano ng mga motorista ang bawas sa presyo sa mga produktong petrolyo sa susunod na linggo, matapos ang limang magkakasunod na linggong price hikes sa diesel habang apat na magkakasunod na linggo naman sa gasoline.

Sa kanilang fuel price forecast para sa Hulyo 5 hanggang 11 na trading days, ayon sa Unioil Petroleum Philippines ang presyo ng kada litro ng diesel ay posibleng mabawasan ng P2.80 hanggang P2.90.

Habang ang gasolina ay tinatayang may bawas na P0.10 kada litro o walang pagbabago sa presyo nito.

Batay sa oil industry source, ang presyo ng diesel ay posibleng magkaroon ng roll back ng P3.10 hanggang P3.30 habang ang gasoline ay may tapyas naman ng P0.20 hanggang P0.40 kada litro.

Ayon kay Department of Energy-Oil Industry Management Bureau Director Rino Abad, mayroong dalawang dahilan ng inaasahang oil price rollback kabilang dito ang China lockdown at ang epekto sa mundo ng paghirap ng ekonomiya at sa demand sa langis.

Kasado na sa Martes… Oil price hike, next week – DOE

ni Zel Fernandez | April 23, 2022

Mapapaaray na naman ang mga motorista sa posibleng panibagong taas-presyo ng gasolina na nakaambang mangyari sa susunod na linggo, batay sa ulat ng Department of Energy (DOE).

Ayon kay DOE Oil Industry Management Bureau (OIMB) Director Rino Abad ngayong Sabado, Abril 23, “ang kadalasan po na adjustment natin on a weekly basis ay sa umaga po ng Tuesday. So, mangyari ito next week, sa umaga ng Tuesday”.

Bagaman, hindi tinukoy ni Director Abad ang presyo na idaragdag sa singil sa mga produktong petrolyo dahil maaari umano nitong maapektuhan ang mga oil companies, na hindi pa nagbibigay ng kanilang pabatid sa kung magkanong halaga ang ipapatong sa kasalukuyang halaga ng gasolina, iniiwasan din aniya ng DOE na magbanggit ng presyo na posibleng gayahin lamang ng ibang kumpanya ng langis.

“May increasing po tayong ine-expect, pero hindi ko po masabi kung ilang mga amount kasi ayaw po sana natin maimpluwensiyahan ang mga oil companies which will actually provide the notification, usually on Monday. So, upon receipt po nu’ng notification nila, du’n lang po kami pwedeng makapagsabi para hindi po lumabas na nauuna tayo sa pagsasabi ng amount at baka kopyahin na lang po ng mga oil company ‘yung sinabi natin”, paliwanag ng tagapangasiwa.

Ayon kay Abad, isa pa rin sa pangunahing sanhi ng patuloy na pagtaas ng presyo sa bansa ay ang hindi maayos na relasyon sa pagitan ng Russia at Ukraine, na noong magkaroon din ng pahiwatig ng inaasahang peace talks ay naging daan upang bumaba ang halaga ng langis. Ngunit, nang maudlot ito ay muli ring nagdulot ng pagmamahal ng gasolina.

Dagdag pa rito, ang muling pagpapatupad umano ng lockdown sa Shanghai dahil sa tumataas na kaso ng COVID-19 ay naging sanhi rin ng dagdag-singil sa petrolyo dahil nakikita ng merkado na magiging agresibo na naman umano ang China, kasabay ng mas mataas na demand sa produktong langis.

Pahayag pa ni Abad, isa pang anunsiyo na bahagyang nagdulot ng pangamba sa world market ay ang planong pinag-uusapan ng European Union (EU) na posible na aniyang i-ban ang Russian export ng langis at gasolina dahil ito raw ang pinanggagalingan ng perang ginagamit na panggastos sa military action.

Tugon naman ng Organization of the Petroleum Exporting Countries (OPEC), ang mawawalang Russian oil na aabot sa tinatayang 5 milyong barrel exports kada araw sa merkado ay hindi nito kayang punuan kaya hindi talaga umano maiiwasan ang pabago-bagong singil sa petrolyo sa kasalukuyang sitwasyon sa buong mundo.

P5.85 at P3.60 kada litro… Petro Gazz stations nationwide may roll back sa presyo ng petrolyo

ni Jasmin Joy Evangelista | March 10, 2022

Inanunsiyo ng fuel company na Petro Gazz na magpapatupad sila ng price roll back sa diesel at gasoline products sa lahat ng stations nationwide.

Sa isang advisory, sinabi ng Petro Gazz na ang mga stations nito nationwide ay magro-roll back sa diesel ng P5.85 kada litro at P3.60 kada litro naman sa gasoline, simula March 10 hanggang 13.

Ang price adjustments na ito ay ipatutupad mula 6 a.m. sa March 10.

Layon umano ng rollback na “minimize the impact to motorists since we are expecting another round of oil price hike next week,” ayon sa Petro Gazz.

Noong March 8, nagkaroon ng pinakamataas na pagtaas sa presyo ng petrolyo ngayong taon, kung saan ito ang ika-10 sunud-sunod na linggo ng price increase mula nang pumasok ang taong 2022.

Tumaas ang diesel ng P5.85 kada litro, P3.60 kada litro sa gasolina, at P4.10 kada litro sa kerosene.