Misyon sa susunod na 500 taon

ni Fr. Robert Reyes - @Kapaayapaan / Patakbo-takbo | June 25, 2022

Ngayong Sabado, ika-25 ng Hunyo 2022 ay Pista ng Ina Ng Laging Saklolo sa aming parokya sa Barangay Bahay Toro, Project 8, Quezon City. Noong inihahanda namin ang mga tema ng nobenaryo ng mga misa, kinailangan naming magnilay, magsaliksik at magdasal para piliin ang pangkalahatang tema — at ang tema ng bawat araw ng nobenaryo.

Ang napili naming pangkalahatang tema ay “Balik Misyon, Balik Pamayanan.” At upang maunawaan ang kahulugan at kahalagahan ng tema, binuo namin ang siyam na magkakaugnay na tema. Heto ang mga nabuong tema ng nakaraang siyam na araw:

June 16, Thursday Misyonero Sila Noon, Misyonero Tayong Lahat Ngayon

Misyonero Tayong Lahat, Kasaysayan at Konteksto ng Misyon

June 17, Friday Ang pangarap ng Diyos, ang kaharian, ang misyon ng Ama

June 18, Saturday Ang katapatan ng anak, ang krus, ang misyon ni Kristo

June 19, Linggo Ang pangako ng mang-aaliw, ang kaganapan ng buhay, ang misyon ng espiritu santo

June 20, Lunes Ang mundo at kaharian ng Diyos: pandemya, giyera at pulitika.

sakripisyo, katapangan at paninindigan

June 21, Martes Ang bagong simbahan, mga buhay, nagbibigay-buhay, naglilingkod, nagmamalasakit, magkakaibigang pamayanan

June 22, Miyerkules Ang bagong misyonero, lumalabas, nakikinig, namamahayag, nagtataya, nakikiisa, kaamoy ng mga maralita… sumasaksi

June 23, Huwebes Ang bagong misyonero, luntian, nagmamahal, nagtatanggol kay Inang Kalikasan.

June 24, Biyernes Ang bagong misyonero, kayumanggi, magmamahal kay Inang Bayan, hinuhubog, ginagabayan, inaalalayan ang susunod na henerasyon sa misyon para sa kaharian ng Diyos at misyon para kay Inang Bayan. Pinag-iisa: kabayanihan at kabanalan.

Makikita sa siyam na tema ang mga sumusunod na konsepto at prinsipyo. Una, kung noong mga unang panahon, sinimulan at inasa sa mga misyonerong banyaga na karamiha’y Kastila ang mga una at susunod na hakbang ng pagpapalaganap ng pananampalatayang Kristiyano-Katoliko, iba na ang nagpapatuloy at kailangang magpatuloy sa gawaing ito. Hindi lang ang mga pari at relihiyoso ang may pananagutan, kundi ang lahat ng mga bumubuo sa Simbahang-Katolika. Kaya’t malinaw ang pangangailangang magkaroon ng malalim at matatag na paghuhubog sa mga katuwang na lider-layko upang mapagtulungan ang misyon ng ebanghelisasyon.

Pangalawa, kailangan ang malalim na pag-aaral sa kahulugan ng misyon na magsisimula sa misyon ng Banal na Santatlo: ang misyon ng Ama, ang misyon ng Anak at ang misyon ng espiritu santo. Pangatlo, kailangang unawain ang mundo, ang mismong kinikilusan ng lahat ng mga misyonerong tagapaghatid at tagapagpalaganap ng mabuting balita ng Panginoong HesuKristo. Pang-apat, kailangang unawain at tuklasin ang bagong simbahang hinihingi at hinahanap ng Panginoon. Isang buhay, bumubuhay, naglilingkod, nagmamalasakit at tumatangkilik ng mga pamayanan ng mga magkakaibigan at magkakapatid kay HesuKristo. Panlima, kailangang magkaroon ng bagong pag-unawa sa bagong misyon sa nagbabagong mundo. Sinimulan ni Papa Francisco ang pagninilay sa simpleng hamon noong simula ng kanyang paglilingkod bilang papa. Pang-anim, ayon sa isinulat ni Papa Francisco na liham-pastoral hinggil sa kalikasan, ang Laudato Si, kailangang ibahin na natin ang ating uri ng pakikitungo sa Inang Kalikasan. Pampito, sa “Fratelli Tutti” ang pinakabagong liham-pastoral tungkol sa pagkakaibigang panlipunan, kailangan nating matutunan ang bagong pulitika na itinuturing na kapatid ang lahat kung kaya’t sa halip ng pagsasamantala at paggamit sa kapwa-tao, kinikilala ang dangal at karapatan ng mga ito. Mula sa ganitong pananaw, makikita ang malalim na ugnayan ng pagmamahal sa Diyos at pagmamahal sa sariling bansa, kay Inang Bayan.

Mabigat ang pinagdaraanan ng buong daigdig mula pandemya tungo sa mga panlipunang krisis, tulad ng pinagdaraanan natin sa Pilipinas at lalo na sa pinagdaranan ng Ukraine mula sa marahas at madugong panghihimasok ng Russia.

Oo nga’t mabigat, ngunit hindi sapat na malungkot, matakot at walang gawin, kaya’t hindi sapat na lumingon lang at magpasalamat sa nakaraang 500 taon ng paglilingkod at pagsisikap ng mga unang misyonero at lahat ng humalili sa mga ito upang palaganapin at patatagin ang pananampalatayang Kristiyano-Katoliko.

Ito na nga’t sisimulan sa aming parokya, na tumugon kasama ng buong simbahan na mag-balik misyon, bumalik pamayanang nagsisikap buuin at palakasin ang maliliit, ngunit buhay at masiglang pamayanang Kristiyano.

Si Jose Rizal at ang pagmamahal sa Diyos at sa bayan

ni Fr. Robert Reyes - @Kapaayapaan / Patakbo-takbo | June 20, 2022

Ipinanganak si Jose Rizal, ang ating pambansang bayani noong ika-19 ng Hunyo 1861 o 161 taon nang nakalilipas.

Naglaro, tumakbo, umakyat ng puno, namangha sa mga bagay-bagay sa kanyang kapaligiran, nagtanong sa kanyang nanay tungkol sa kung anu-ano, tulad ng gamo-gamo.

Ang lahat ng ito ay kanyang ginawa sa kanyang munting tahanan sa Calamba, Laguna. Tiyak na itinanong din ni Jose sa kanyang ina ang mga bagay tungkol sa Diyos at ang mga nangyayari sa loob at paligid ng simbahan. Tiyak na napag-usapan nina Jose at ng kanyang nanay tungkol sa mga prayleng may suot na itim na pangharap at puting abito.

Maraming hirap na pinagdaanan ang kanyang pamilya. Tiyak na napansin at naranasan ito ng batang Jose at dahil sa kanyang mapag-usisang kaisipan, napagkuwentuhan na rin niya ito sa kanyang mahal na ina, ama at sa kanyang paboritong kuya.

Lumaki ang batang Jose at sinikap ibigay ng kanyang mga magulang ang magandang edukasyon. Ipinadala ito sa Ateneo de Munisipal ng mga Heswita sa Sta. Ana, Manila.

Lalong nahasa sa kanyang pag-aaral ang matalas, matalim at malikhaing pag-iisip ng batang Rizal. Dito pinanday ang galing ni Rizal sa agham, kasaysayan, literatura at sining.

Sa kanyang murang-murang isipan naitanong ni Rizal kung paano nasangkot sina Padre Mariano Gomez, Jose Burgos at Jacinto Zamora sa marahas na aklasan. Malamang, tinanong din ng bata kung “talaga bang may kinalaman ang tatlong pari sa aklasan o isinangkot lang ang mga ito ng mga makapangyarihang Kastilang opisyal na hindi nagugustuhan ang mga sinasabi at ginagawa ng tatlong pari?”

Hindi naisulat ng batang Jose ang mga damdamin at kaisipang sumagi sa kanyang puso at isip sa mga sandaling ginagarote ang tatlong paring martir, ngunit maraming nagsabi na nag-iwan ito ng malalim na marka sa murang kamalayan ng bata.

Tatlong pari, mga alagad ng Diyos. Binitay dahil sa diumanong pagkakasangkot ng mga ito sa madugong aklasan sa Cavite.

Paano na ito, ang mga taong simbahan, alagad ng Diyos na sangkot sa aklasan laban sa Espanya ng mga taumbayan?

Sa Laguna, lalawigan ni Rizal nagtungo tayo ngayong linggo sa kaarawan ng ating bayaning martir upang pagpugayan ito sa kanyang mabunga, makabuluhan, mapaghamon at mapagpalayang buhay.

Pag-ibig na para sa Diyos at sa bayan

ni Fr. Robert Reyes - @Kapaayapaan / Patakbo-takbo | June 18, 2022

Mahirap ba magmahal? Ito ang sinabi ng ebanghelyo noong Martes, “Narinig ninyong sinabi: Mahalin mo ang iyong kapwa at kamuhian ang iyong kaaway. Ngunit sinasabi ko sa inyo: Mahalin ninyo ang inyong kaaway at ipagdasal ang umuusig sa inyo.” (Mateo 5:43)

Mahalin ang kaaway? Paano ‘yun? Hindi ba kaya’t kaaway ang tawag sa tao ay dahil sa mga ginagawa nitong hindi katanggap-tanggap sa iyo? Tingnan na lang natin ang patuloy na ginagawa ng kasalukuya’t patapos nang administrasyon kay Senador Leila de Lima. Nagbaliktaran na ang mga testigo laban sa kanya, ngunit ang opinyon ni Justice Sec. Menardo Guevarra ay “Hangga’t hindi humaharap sa korte ang mga testigong bumaliktad at masusing na imbestigahan ang mga ito at napatunayang totoo ang mga sinasabi, hindi pa rin maituturing na katanggap-tanggap ang pagtestigo ng mga ito.”

Dahil sa maraming ulit nating pagdalaw sa Senadora, meron tayong kaunting nalalaman sa kondisyon at disposisyon ng mabuting Senadora. Napakahirap ng kalagayang walang kalayaan sa loob ng piitan na matagal na niyang tinitiis. Mabuti na lang at madasalin at masipag siyang magnilay at magsulat, hindi ito nilalamon ng bagot, galit at pagkawala ng gana at pag-asa.

Buo pa rin ang loob niya at hindi nito inuubos ang lakas sa galit at pagkamuhi sa mga ginagawang laban sa kanya ng mga nakapuwesto. Ngunit, tuloy ang laban at pagtatanggol ng Senadora sa kanyang pagkainosente. Ito ay dahil mahal niya ang katotohanan at patuloy nitong hinahanap at ipinagtatanggol ang katarungan, hindi lang para sa kanyang sarili kundi para sa lahat ng Pilipino.

Mahal ba ni Senadora Leila ang kanyang mga kaaway? Kung mahal niya ang mga ito, bakit patuloy niyang ipinaglalaban ang katotohanan? Bakit hindi siya tumitigil sa pagtatanggol sa kanyang sarili? Hindi lang dapat ipagtanggol ng inosente ang kanyang pagiging inosente laban sa mga nais durugin at tuluyan nang patayin ang kanyang matapang, matalino at naninindigang diwa, higit pa ay ang katotohanang binabaluktot at binabaliktad na dapat higit na ipaglaban.

Ito ang karugtong ng ebanghelyong binasa noong Martes: “Kung mahal ninyo ang nagmamahal sa inyo, bakit kayo gagantimpalaan? Di ba’t ginagawa rin ito ng mga kolektor ng buwis? At kung ang mga kapatid ninyo lamang ang inyong binabati, ano ang naiiba rito? Di ba’t ginagawa rin ito ng mga pagano?”

Madaling maging karaniwang abogado. Tumanggap ng kliyenteng magbabayad sa iyong serbisyo. Ngunit iba ang maging abogadong lumalaban hindi lang para sa isa o dalawang kliyente kundi para sa lahat ng apektado ng sistemang mali, abusado, hindi makatao at hindi makatarungan.

Kung mahal mo ang iyong kaaway, hindi mo papayagang saktan ka nito at ang marami pang iba. Sa kanyang pag-iisa, natutunan ng senadora mahalin ang katahimikan at ang pagkakataong manalangin at magnilay na bigay nito. Natutunan nitong umasa at kumuha ng lakas sa Diyos sa gitna ng mahaba, hindi makatarungan at makataong pagpapahirap sa kanya. Sa gitna nito, higit pang lumalim ang pagmamahal niya para sa kanyang bansa at mamamayang pinahihirapan at inaabusong, tulad niya.

Noong linggo, Araw ng Kalayaan, muli naming inilunsad ang proyekto ng pagtatanim ng 500 krus at puno. Ngunit dahil sa nangyayari sa ating bansa, dinagdagan pa namin ng isa pang itatanim, ang ating bandera. Kaya’t ang bagong panawagan ay: Replant the Cross, Replant the Faith. Replant the Flag, Rebuild the Nation.