Kahit ‘di maganda ang pasok ng 2020...

Suwerte sa negosyo ng Fire Rooster, bubuhos bago matapos ang taon

ni Maestro Honorio Ong - @Forecast 2020 | September 15, 2020

Sa pagpapatuloy ng pagtalakay sa magiging kapalaran ng bawat animal sign, pag-usapan natin ang magiging kapalaran ng Rooster o Tandang ngayong Year of the Metal Rat hanggang sa 2021 o Year of the Metal Ox.

Alalahaning ang Rooster o Tandang ay nahahati sa limang uri batay sa taglay nilang elemento at ito ay ang mga sumusunod:

• Metal Rooster o Bakal na Tandang - silang mga isinilang noong 1921 at 1981

• Water Rooster o Tubig na Tandang - silang mga isinilang noong 1933 at 1993

• Wood Rooster o Kahoy na Tandang - silang mga isinilang noong 1945 at 2005

• Fire Rooster o Apoy na Tandang - silang mga isinilang noong 1957 at 2017

• Earth Rooster o Lupa na Tandang - silang mga isinilang noong 1909 at 1969

Sa nakaraang mga isyu, tinalakay natin ang kapalaran ng Metal Rooster, Water Rooster, ganundin ang Wood Rooster at sa pagkakataong ito, pag-usapan naman natin ang Fire Rooster o Apoy na Tandang.

Kung ikaw ay Fire Rooster na isinilang noong 1957, ito ang panahon ng retirement o pamamahinga sa mabibigat na pagtatrabaho upang anihin mo na ang masarap na bunga ng iyong maghapong pinagpaguran. Ngayong 2020 hanggang 2021, bagama’t medyo nagkakaedad ka na at iniisip mo nang bawasan ang mga gawain o pagtatrabaho, hindi naman maiiwasang marami pa ring mga oportunidad at biyayang darating sa buhay mo sa iba’t ibang paraan at pangyayari na karamihan ay mga bagay na iaabot sa iyo ng langit at hindi mo na talaga gaanong paghihirapan pa. Bagama’t hindi gaanong maganda ang dating ng 2020 sa aspetong negosyo at kalakal, bago matapos ang taon, inaasahan namang may malaking buhos ng pera na biglang matatanggap.

Sa negosyo, hindi naman pinapayagang mag-invest sa panahong ito ng pandemya sa kahit ano’ng uri ng kalakal kung saan dapat ay palipasin muna ang 2020 at sa 2021, maaari nang mag-invest sa mga produktong may kaugnayan sa pagkain at kalakal na may kaugnayan sa kalusugan at basic services.

Sa pakikipagrelasyon, patuloy namang magiging kaaya-aya ang pakikisalamuha sa mga kapamilya at mahal sa buhay. Bagama’t may maliliit na problemang magaganap, ito ay agad namang masosolusyunan sa pamamagitan ng pagpapasensiya at pang-unawa. Sikaping tulungan o abutan ang mga kapamilya ng kahit na ano’ng tulong kung sakaling bigla kang makahawak ng malaking halaga dahil ang tulong na ipagkakaloob mo sa kanila ay doble-dobleng ibabalik sa iyo ng langit sa 2021.

Sa pangkalahatan, ngayong 2020 hanggang 2021, ingatan ang kalusugan dahil may babala na masasayang lamang ang malalaking biglaang suwerte na darating sa panahong ito ng iyong buhay kung ikaw ay magkakasakit. Kaya sa panahong ito ng pandemya, iwasan pa ring lumabas ng bahay kung hindi naman kinakailangan. At kung hindi maiiwasan ang paglabas ng bahay, ugaliing magsuot ng face shield at face mask, gayundin, sumunod sa health protocols sa lahat ng oras.

Upang lalo pang gumanda, humaba at lumigaya ang buhay, mahalaga pa ring iwasan ang mga bawal na pagkain sa buong 2020 habang panatilihin din ang regular na page-ehersisyo at pagre-relaks kahit na magtanim-tanim ng gulay at bulaklaking halaman sa gilid ng bahay.

Sa ganyang paraan, tulad ng nasabi na, tuluy-tuloy na magiging mapalad at magiging maligaya ang kapalaran sa pagtatapos ng 2020 hanggang sa pagbungad ng Year of the Metal Ox na may pangako ng mas marami pang suwerte at magagandang kapalaran.

Itutuloy

Mamahalin ng single na Wood Rooster, darating ngayong 2020 pero bawal pa magkaroon ng commitment

ni Maestro Honorio Ong - @Forecast 2020 | September 12, 2020

Sa pagpapatuloy ng pagtalakay sa magiging kapalaran ng bawat animal sign, pag-usapan natin ang magiging kapalaran ng Rooster o Tandang ngayong Year of the Metal Rat hanggang sa 2021 o Year of the Metal Ox.

Alalahaning ang Rooster o Tandang ay nahahati sa limang uri batay sa taglay nilang elemento at ito ay ang mga sumusunod:

● Metal Rooster o Bakal na Tandang - silang mga isinilang noong 1921 at 1981

● Water Rooster o Tubig na Tandang - silang mga isinilang noong 1933 at 1993

● Wood Rooster o Kahoy na Tandang - silang mga isinilang noong 1945 at 2005

● Fire Rooster o Apoy na Tandang - silang mga isinilang noong 1957 at 2017

● Earth Rooster o Lupa na Tandang - silang mga isinilang noong 1909 at 1969

Sa nakaraang mga isyu, tinalakay natin ang kapalaran ng Metal Rooster at Water Rooster, kaya sa pagkakataong ito, pag-usapan naman natin ang Wood Rooster o Kahoy na Tandang.

Kahit laganap pa rin ang pandemya, basta lagi mong pananatilihin ang pagiging optimistic at masayahin, mas madali mong maaakit ang magagandang kapalaran at suwerte.

Ipagpatuloy mo lang ang pagiging friendly o palakaibigan dahil sa panahong ito, maraming magagandang oportunidad ang darating na manggagaling sa lipunan na iyong ginagalawan at sa pakikipagkaibigan.

Anumang oportunidad ng pagkakaperahan ang ibigay sa iyo ng tadhana, wala kang dapat gawin kundi sunggaban agad ito dahil kapag ito ay dumating at iyong binalewala, madali itong mawawala at maglalaho sa kawalan.

Kapag naman biglang nawala ang suwerte na hawak mo na, ‘wag kang mag-alala dahil ang mahalaga ay patuloy kang nakikipagkaibigan at may lipunang ginagalawan. Dahil sa pakikipagkapwa-tao at pakikipagkaibigan, patuloy sa iyong darating ang suwerte at iba’t ibang uri ng magagandang kapalaran. Kaya kahit mawala ang suwerte, babalik din ‘yan sa iyo nang kusa, mas marami at doble-doble pa.

Dagdag pa rito, marami ring mga gawain ang mabubuksan sa buong 2020 hanggang 2021 na lalo pang magpapasigla at magpapayabong ng iyong career at personalidad. Kaya tulad ng nasabi na, wala kang dapat tanggihan, kumbaga, sunggab lang nang sunggab upang lalo ka pang umunlad at maging maligaya.

Nagiging maligaya at mas maunlad ang Kahoy na Tandang, mientras marami silang ginagawa at pinagkakaabalahan. Kaya sa buong taong ito, ‘wag na ‘wag kang mamamahinga, sa halip, dapat maging hectic at laging abala ang schedule mo upang lalo ka pang suwertehin at datnan ng mas marami pang magagandang kapalartan.

Sa love life, sa mga mag-asawa, tinatayang magiging positibo ang relasyon sa buong 2020 hanggang 2021 at lalo pang uunlad at lalago ang pagmamahalan.

Sa mga Wood Rooster na wala pang karelasyon, maaari nang dumating ang hinihintay mong lalaki o babaeng mamahalin sa taong ito, ngunit hindi ka pa rin dapat magkaroon ng commitment dahil alalahanin mong ang higit na mahalaga ay ang pagpapaunlad at papapalago ng career. Kapag nakatapos ka na ng pag-aaral at nagkaroon ng magandang trabaho, saka ka pa lang dapat makipagrelasyon nang seryoso upang mas madaling makamit ang maligaya at panghabambuhay na pag-ibig at pagpapamilya.

Itutuloy

Water Rooster, ‘di dapat tumutok sa paghahanap ng karelasyon dahil ‘di pa darating ngayon

ni Maestro Honorio Ong - @Forecast 2020 | September 8, 2020

Sa pagpapatuloy ng pagtalakay sa magiging kapalaran ng bawat animal sign, ipagpatuloy natin ang pagtalakay sa magiging kapalaran ng Rooster o Tandang ngayong Year of the Metal Rat hanggang sa 2021 o Year of the Metal Ox.

Alalahaning ang Rooster o Tandang ay nahahati sa limang uri batay sa taglay nilang elemento at ito ay ang mga sumusunod:

• Metal Rooster o Bakal na Tandang - silang mga isinilang noong 1921 at 1981

• Water Rooster o Tubig na Tandang - silang mga isinilang noong 1933 at 1993

• Wood Rooster o Kahoy na Tandang - silang mga isinilang noong 1945 at 2005

• Fire Rooster o Apoy na Tandang - silang mga isinilang noong 1957 at 2017

• Earth Rooster o Lupa na Tandang - silang mga isinilang noong 1909 at 1969

Sa nakaraang isyu, tinalakay natin ang kapalaran ng Metal Rooster o Bakal na Tandang, kaya sa pagkakataong ito, pag-usapan natin ang magiging kapalaran ng Water Rooster o Tubig na Tandang.

Isa sa mga pangunahing katangian mo ay ang kahusayan sa pangungumbinsi na maaaring magamit upang madagdagan ang iyong income at lalo pang gumanda ang iyong career. Bukod sa pangungumbinsi, may taglay ka ring husay upang manghikayat ng grupo ng mga tao. Kaya naman kung pagbebenta ang pangunahin mong negosyo o career ngayong 2020, malaki ang posibilidad na makabenta ka ng malaking halaga at lalo mo pang mapalago ang iyong kabuhayan kahit dumaraan sa matinding pagsubok ang mundo dahil sa COVID-19 pandemic.

Dagdag pa rito, ang pagiging palakaibigan ay magagamit mo rin upang lalo pang madagdagan ang iyong kliyente at benta. Kung wala namang kaugnayan sa pagbebenta o pag-aalok ang iyong career o hanapbuhay sa kasalukuyan, magagamit mo pa rin ang iyong mga kaibigan upang kumita ng malaking halaga sa pamamagitan ng kanilang rekomendasyon. Ibig sabihin, habang patuloy ka sa pakikipagkaibigan sa panahong ito ng iyong buhay, kusa namang darami ang magagandang oportunidad upang lalo pang lumago ang iyong kabuhayan sa buong 2020 hanggang 2021.

Samatala, dapat ding alalahanin na may mga tukso o alok ng mga pagbabagong diskarte ngayong 2020 hanggang 2021, na hindi mo dapat basta-basta patulan, sapagkat ang mas mainam sa iyong career at kabuhayan ay mag-stay kung saan ka nakatuntong ngayon.

Tunay ngang ang malawakan at malakihang pagbabago ngayong 2020 hanggang 2021 ay hindi inirerekomenda. Sa halip, anuman ang ginagawa at pinagkakaabalahan mo ngayon, mas mainam na manatili ka muna r’yan habang unti-unti mong pinabubuti at pinagaganda ang iyong sitwasyon at kalagayan.

Gayunman, bukod sa mga gawain at pagpapaunlad ng career na nabanggit, inirerekomenda rin na ituon mo ang iyong mga libreng oras sa pagseserbisyo nang walang hinihintay na kapalit. Sapagkat ayon sa iyong kapalaran, sa pamamagitan ng pag-aalok mo ng tulong sa iyong kapwa o komunidad na iyong ginagalawan, mas maraming suwerte at magagandang kapalaran kang aanihin sa buong 2020 hanggang 2021.

Sa pag-ibig, sa mga wala pang karelasyon o kapareha sa buhay, hindi mo dapat ituon ang paghahanap ng mamahalin dahil hindi naman siya ngayon darating. Ibig sabihin, may dumating man ngayong love interest, hindi mo ito dapat seryosohin dahil tulad ng bulalakaw, mabilis siyang darating at siguradong mabilis din siyang mawawala sa iyong piling. Kaya kung may darating man ngayon na kusang lumalapit, puwede mong pansinin o patusin, pero ‘wag ka namang masyadong seryoso at umasa na kayo na ang forever dahil tulad ng nasabi na, hindi sa panahong ito nakalaan ang iyong suwerte sa larangan ng pag-ibig at pakikipagrelasyon kundi sa 2021 pa.

Sa mga may karelasyon, asawa o kapareha na, magiging masarap at romantiko sana ang inyong suyuan, kaya lang, manaka-nakang kakapusin kayo sa budget o pinansiyal na aspeto. Kaya mas maganda kung pilitin n’yo munang makapagtabi ng malaki-laking halaga para sa future at seguridad n’yong magkapareha. Kapag alam na alam n’yong may ipon na kayo, tiyak na ngayong 2020 hanggang 2021, tulad ng naipaliwanag na, lalong sasarap at tatamis ang suyuan, higit lalo kapag unti-unti nang nakarekober ang mundo sa pandemya kung saan may pangako na lalo pang lalago at sasaya ang inyong relasyon na magiging panghabambuhay na.

Itutuloy