Kapakanan ng kaibigan, inuuna ng Year of the Dog kaysa sa sarili at pamilya

ni Maestro Honorio Ong - @Forecast 2020 | September 22, 2020

Sa pagpapatuloy ng pagtalakay sa magiging kapalaran ng bawat animal sign, pag-usapan natin ang ugali at magiging kapalaran ng Dog o Aso ngayong Year of the Metal Rat hanggang sa 2021 o Year of the Metal Ox.

Kung ikaw ay isinilang noong 1934, 1946, 1958, 1970, 1982, 1994, 2006 at 2018, ikaw ay mapabibilang sa animal sign na Aso o Dog.

Bagama’t isa sa pinakamatalinong nilalang sa 12 animal signs na ipinatawag ni Lord Buddha sa kanyang palasyo, madalas sa mga pagdedesiyong ginagawa, laging may pagdadalawang-isip at pag-aalinlangan ang Aso. Kaya sa halip na maghakot ng maraming tagumpay at ligaya sa buhay, ang mga ito ay nababalam, naglalaho o nauusyami sa kawalan. Minsan naman, tuluy-tuloy na sanang magiging maligaya at matagumpay ang isang Aso, pero dahil habang ginagawa niya ang isang proyekto nang may pagdadalawang-isip pa rin ang kanyang sarili, hindi niya lubos na nae-enjoy ang masarap na lasa ng pagwawagi at tagumpay. Gayunman, kung sa bawat kilos at gawain ng Aso ay tuluy-tuloy niyang ipatutupad ito, walang pagdadalawang-isip at mabilis niyang gagawin at tatapusin ang isang proyketo o plano na kanyang pinag-isipan, higit na magiging matagumpay at masarap ang lasa ng ligaya at pagwawagi para sa isang Aso, higit lalo sa buong 2020 hanggang 2021.

Kaya naman kung ikaw ay isang Aso at may naiisip kang magandang proyekto ngayong 2020, walang pagdadalawang-isip mo itong ipatupad dahil sa ganyang paraan, matitiyak ang iyong ligaya at tagumpay.

Dagdag pa rito, ang Aso ay isa sa pinakamasarap kasama at kaibigan dahil sa kanyang pagiging tapat at loyal. Bukod sa pagiging tapat na kaibigan, siya rin ay matulungin at laging handang lumingap at dumamay sa mga kaibigan niyang nangangailangan.

Kadalasan, inuuna niya ang kapakanan ng kanyang kaibigan kaysa sa kanyang sarili, na nagiging dahilan upang ma-misinterpret ng kanyang pamilya ang aksiyon niyang ito kung saan iisiping mas mahal niya ang kanyang mga kaibigan kaysa sa pamilya. Pero hindi naman ganu’n ‘yun, sa halip, tunay lang na sobra-sobra ang pagmamalasakit ng Aso sa kanyang mga kaibigan, lalo na sa panahong siya ay nasa kagipitan at talagang nakikita niyang nangangailangan ng kanyang tulong ay hinding-hindi niya ito matatanggihan.

Dagdag pa rito, mabilis magpasya ang Aso, lalo sa mga hindi niya kilala. Sa unang kita pa lamang niya ang isang tao, nasasagap agad ng kanyang intuition kung ang samahan ay mauuwi sa pagkakaibigan o pagtatalusira. Kaya naman hindi na pinatatagal ng Aso kung sakaling naramdaman niyang mabuti kang tao dahil ibibigay agad niya sa iyo ang kanyang tiwala. Kabaligtaran naman nito, kapag naramdaman niyang hindi ka magiging mabuting kaibigan sa unang pagkikita pa lang, tiyak na mahihirapan kang makuha ang kanyang tiwala at pagmamahal. Kadalasan, tama ang kanyang mabilis na paghusga at pandama sa mga taong una pa lang niyang nakikita at nakakasalamuha, pero minsan ay sumasablay din naman ang kanyang pang-amoy.

Itutuloy

Mabagal na pagpapasya...

Dahilan kaya nasasayang ang magagandang oportunidad ng isinilang sa Year of the Dog

ni Maestro Honorio Ong - @Forecast 2020 | September 19, 2020

Sa pagpapatuloy ng pagtalakay sa magiging kapalaran ng bawat animal sign, pag-usapan natin ang ugali at magiging kapalaran ng Dog o Aso ngayong Year of the Metal Rat hanggang sa 2021 o Year of the Metal Ox.

Kung ikaw ay isinilang noong 1934, 1946, 1958, 1970, 1982, 1994, 2006 at 2018, ikaw ay mapabibilang sa animal sign na Aso o Dog. Ito ang ika-11 sa 12 animal signs sa Chinese Astrology kung saan siya rin ang zodiac sign na Libra sa Western Astrology na may kaakibat na planetang Venus.

Ang mapalad na oras para sa isang Aso ay mula alas-7:00 ng gabi hanggang sa alas-9:00 ng gabi, sa mapalad na direksiyong kanluran (west) at hilagang-kanluran (north-west).

Sinasabing higit na agresibo at matapang ang Aso na isinilang sa gabi kung ikukumpara sa maamo at mabait niyang kapatid na isinilang sa umaga o tanghaling-tapat.

Kilala sa pagiging tapat at makatarungan ang Aso, habang ang kababaang-loob ay isa rin sa kanyang mga pangunahing ugali, kaya karamihan sa kanila ay itinuturing ding mababait at maawain, lalo na sa mga nangangailangan at kapus-palad.

Ang problema lamang, isang negatibong ugali rin ng Aso ang pagiging mabilis magduda at hindi agad-agad nagtitiwala sa kanyang kapwa. Kaya naman mahirap mong makuha agad ang loob niya, lalo na kung ikaw ay hindi pa niya lubusang kakilala. Kumbaga, sa umpisa, paghihinalaan ka muna niya ng hindi maganda bago kayo tuluyang maging matalik na magkaibigan. Pero kapag nakasama ka na niya at natuklasang okey at mabait ka, roon mo lang makukuha ang kanyang loob at tiwala.

Kaya naman sa unang pagkikita, maaaring sa pag-ibig at pakikipagtransaksiyon sa negosyo, tulad ng naipaliwanag na, hindi mo agad makukuha ang pagsang-ayon ng isang Aso. Sa halip, hindi mo lang alam na posible pa ngang pinaghihinalaan ka niya ng hindi maganda, pero hindi niya ‘yun sasabihin o ipahahalata sa iyo.

Ang isa pang negatibong ugali ng Aso na dapat iwasan upang makamit ang maligaya at matagumpay na buhay ay ang pagdadalawang-isip. Palagi nang may labanang nagaganap sa kaibuturan ng puso ng Aso, kaya naman hindi siya agad-agad na makapagdedesisyon. Dahil matagal magpasya, nasasayang ang mga ginto at magagandang oportunidad na dumarating sa kanyang buhay. Kung matutunan niya na magdesisyon agad, marami sana siyang ligaya, pag-unlad at pagtatagumpay na aanihin sa taniman ng kanyang mga kararanasan at pakikipagsapalaran.

Kaya nga kung ikaw ang isang Aso, iwasan mong magpakupad-kupad at alipinin ng pagdadalawang-isip, sa halip, mas maganda kung lagi mong bibilisan ang mga pagpapasya at pagdedesisyon. Sapagkat sa ganyang paraan, matitiyak ang iyong tagumpay at wagas na kaligayahan, hindi lamang ngayong 2020 at 2021 kundi maging sa buong buhay mo.

Itutuloy

Earth Rooster, dapat umiwas sa away para ‘di pumangit ang career at kabuhayan

ni Maestro Honorio Ong - @Forecast 2020 | September 17, 2020

Sa pagpapatuloy ng pagtalakay sa magiging kapalaran ng bawat animal sign, pag-usapan natin ang magiging kapalaran ng Rooster o Tandang ngayong Year of the Metal Rat hanggang sa 2021 o Year of the Metal Ox.

Alalahaning ang Rooster o Tandang ay nahahati sa limang uri batay sa taglay nilang elemento at ito ay ang mga sumusunod:

• Metal Rooster o Bakal na Tandang - silang mga isinilang noong 1921 at 1981

• Water Rooster o Tubig na Tandang - silang mga isinilang noong 1933 at 1993

• Wood Rooster o Kahoy na Tandang - silang mga isinilang noong 1945 at 2005

• Fire Rooster o Apoy na Tandang - silang mga isinilang noong 1957 at 2017

• Earth Rooster o Lupa na Tandang - silang mga isinilang noong 1909 at 1969

Sa nakaraang isyu, tinalakay natin ang kapalaran ng Metal Rooster, Water Rooster, Wood Rooster at Fire Rooster, kaya sa pagkakataong ito, pag-usapan naman natin ang pinakahuling uri ng Rooster at ito ang Earth Rooster o Lupa na Tandang.

Kilala sa pagiging praktikal, matalino at mapamaraan ang Earth Rooster. Sa panahong ito ng pandemya, hindi siya agad-agad magagapi o mawawalan ng pag-asa, sa halip, habang patuloy na may pagsubok at suliranin ang buhay, lalo namang tatatag at gaganda ang kanyang kapalaran. Kumbaga sa gradas ng sabungan, lagi silang handang makipaglaban kung saan sa bandang huli, ang kalaban ay madali nilang nagagapi.

Sa career at propesyon, bagama’t ngayong 2020 hanggang 2021 ay magtutuloy-tuloy na bubulas at gaganda ang kapalaran na may kaugnayan sa kabuhayan, ito ay mangyayari sa patuloy na pakikisalamuha at pakiki-umpok sa lipunan. May babala naman na ang mga intriga, paninira at inggitan ay hindi rin maiiwasan sa buong 2020. Kapag hindi ka nagpakahinahon, may babala na ang mga maliliit na intriga ay lumaki, na magiging dahilan upang pumangit ang career at kabuhayan. Kaya naman ngayong 2020 hanggang 2021, kung sakaling may maliit na sigalot at intriga, hindi mo na dapat itong patulan o palakihin. Sa halip, ang pagpapasensiya at pang-unawa ang siya pa ring pinakamabisang solusyon upang makaiwas ka sa mga problemang may kaugnayan sa pakikisalamuha sa iyong kapwa. Sapagkat kapag napanatili mo ang pagiging kampante at walang kaaway ngayon hanggang sa 2021, may pangako na lalo pang uunlad at lalago ang inyong kabuhayan.

Sa pag-ibig at pakikipagrelasyon, may babala na ang mga dating relasyon na dumating sa buhay mo ay muling mauulit, ngunit hindi mo dapat na patulan pa, higit lalo kung ikaw ay may karelasyon o pananagutan na sa buhay. Gayunman, kahit sabihin pang single ka, may kapareha o asawa, bukod sa mga dating pakikipagrelasyong babalik, may mga bago at kakaibang relasyong mararanasan, na makapagbibigay sa iyo ng kakaibang sarap at sigla sa kabila ng katotohanang ang mga biglaang relasyong ito ay itatala na panandalian lamang.

Sa pangkalahatan, magiging masarap at maligaya pa rin ang kasalukuyang relasyong iniingat-ingatan, hanggang napananatili ang mataas na level ng kabuhayan. Ibig sabihin, walang problema sa pamilya, pakikipagrelasyon, hangga’t napananatili mong masagana at maunlad ang materyal na aspeto ng iyong buhay, hindi lamang ngayong 2020 kundi maging sa 2021, may pangako at tiyak namang magkakatotoo na lalo pang uunlad at magiging maligaya ang buhay ng tulad mong praktikal, matalino at masayahing Lupa na Tandang.

Itutuloy