Pinay booters, lalarga sa AFC U-17 Asian Cup Q'fiers

ni Anthony E. Servinio @Sports | April 22, 2023

Laro ngayong Sabado – GFA Training Center, Harmon 5:00 p.m. Guam vs. Pilipinas

Bubuksan ng Philippine Women’s Football National Team ang kampanya sa 2024 AFC Under-17 Women’s Asian Cup Qualifiers Round 1 laban sa host Guam ngayong Sabado. Sisipa ang aksiyon sa 5:00 ng hapon, oras sa Pilipinas sa Guam Football Association (GFA) Training Center sa Harmon.

Matapos ng Guam ay haharapin ng Filipinas ang Lebanon sa Miyerkules (Abril 26) sa parehong palaruan at oras. Tatlo lang ang bansa sa Grupo G at tanging ang numero uno ang tutuloy sa Round Two sa Setyembre na tutukoy sa apat na tutuloy sa torneo sa Abril 2024 at samahan ang mga naunang nakapasok na defending champion Japan, Hilagang Korea, Tsina at host Indonesia.

Ang unang tatlo sa Indonesia ay maglalaro sa 2024 FIFA Women’s Under-17 Women’s World Cup na hinahanapan pa ng host. Ang torneo ay para sa mga manlalaro na ipinanganak simula Enero 1, 2007.

Samantala, maaaring malalaman na kung sino ang magiging kampeon ng 2023 Philippines Football League (PFL) hatid ng Qatar Airways sa higanteng salpukan ng Kaya FC Iloilo at Dynamic Herb Cebu FC ngayong Linggo (Abril 23) sa Cebu. Noong isang araw ay naubos na ang tiket ng inaabangang laro na sisipa sa 3:30 p.m.

Hawak ng Kaya ang liderato na may 45 puntos mula sa 15 panalo at tatlong talo habang pangalawa ang Cebu na may 43 puntos galing 13 panalo, apat na tabla at isang talo. Ito ang ika-apat at huling paghaharap ng mga higante ng PFL at ang kampeon ang may pinakamaraming puntos matapos ang apat na round.

Women's Football, sisipa laban sa China sa AFC q'fying

ni Anthony E. Servinio @Sports | March 7, 2023

Laro sa Miyerkules – Laos National Stadium, Vientiane

5:00 PM Pilipinas vs. Tsina

Sisikapin ng Philippine Women’s Football National Team na makapasok sa 2024 AFC Under-20 Women’s Asian Cup sa pagsipa ng qualifiers ngayong Miyerkules (Marso 8) sa National Stadium sa Vientiane, Laos. Malaking hamon ang haharapin agad ng Filipinas sa katauhan ng Tsina simula 5:00 ng hapon, oras sa Pilipinas.

Susunod ang mga laro kontra host Laos sa Biyernes at Hong Kong sa LInggo. Maglalaro ang apat na bansa ng single round robin at ang numero uno lang ang tutuloy sa Round 2 sa Hunyo.

Naglabas ang Philippine Football Federation ng listahan ng 23 manlalaro sa pangunguna ng tatlong beterana ng Senior Filipinas na sina forward Isabella Flanigan, defender Chantelle Maniti at goalkeeper Kaiya Jota. Ang iba pa ay inakyat mula sa Under-18 o natuklas sa masinsinan na tryout na ginanap sa California, Cebu, Davao at Carmona, Cavite noong Enero sa gabay ni Coach Nahuel Arrarte.

Sasamahan si Flanigan sa atake nina Jodi Mae Banzon, Jada Louise Bicierro, Elaine Pimentel, Ariana Salvador at Chayse Ying. Binubuo ang midfield nina Jonalyn Lucban, Jade Anne Jalique, Sabrina Isabel Go, Tamara Elly Lisser, Natalie Rae Oca, Sabine Alexi Ramos at Isabella Pasion.

Si Jota ang napipisil na numero unong goalkeeper at tutulungan siya nina Jessa Mae Lehayan at Alexis Louise Tan. Maliban kay Maniti, ang iba pang defender ay sina Rae Mikella Tolentino, Kylie Ann Yap, Julia Gabrielle Benitez, Robyn Eara Dizon, Journey Hawkins at Arian Isabella Markey.

Samantala, nagtala ng 5-0 panalo ang Kaya FC Iloilo laban sa Maharlika FC Manila sa 2023 Philippines Football League (PFL) hatid ng Qatar Airways noong Sabado sa Rizal Memorial Stadium.

Nagkampeon ang Iceland vs. Ph sa 2023 Pinatar Cup

ni Anthony E. Servinio @Sports | February 23, 2023

Ginawa ng Iceland ang nararapat at dinurog ang Philippine Women’s Football National Team, 5-0, at tanghaling kampeon ng 2023 Pinatar Cup sa Pinatar Arena ng Murcia, Espanya Miyerkules ng madaling araw, oras sa Pilipinas. Tinapos ng Filipinas ang torneo na walang panalo para sa ika-apat at huling puwesto subalit nag-uwi ng maraming aral na magagamit sa mas malaking laban.

Lumaban ng sabayan ang mga Pinay hanggang nakuha ng Iceland ang maagang pambungad na goal kay Amanda Andradottir sa ika-20 minuto. Nanatiling matibay ang depensa ng Filipinas subalit bigla itong gumuho pagsapit ng second half.

Lumitaw ang kalidad ng Iceland na ika-16 sa FIFA World Ranking kung ihahambing sa ika-53 Filipinas. Ang Iceland din ang pangalawang pinakamataas na bansa na hindi nakapasok sa 2023 World Cup sa likod lang ng ika-10 Hilagang Korea.

Bumanat ng pangalawang goal si Andradottir sa ika-51 subalit pumalag pa rin ang Filipinas. Tuluyang bumigay ang mga Pinay at nagsunuran ang mga goal nina Selma Magnusdottir (71’), Hlin Eiriksdottir (80’) at Alexandra Johannsdottir (93’).

Sa naunang laro, lumaban sa 1-1 tabla ang Scotland at Wales kaya kinailangan ng Iceland na magwagi ng malaki upang umiwas sa komplikasyon at mauwi ang tropeo. Nagtapos ang Iceland na may 7 puntos mula sa dalawang panalo at isang talo at sinundan ng Wales (5 puntos), Scotland (4) at Pilipinas (0).

Susunod para sa Filipinas ang qualifier para sa 2024 Paris Olympics sa Abril. May mga naka-abang din na FIFA Friendly o isang munting torneo sa huling linggo bago magbukas ang 2023 FIFA Women’s World Cup sa Hulyo 20.