Phl Team giniba ang Cambodia sa AFC U17 Asian Cup qualifiers

ni Anthony Servinio @Sports | November 10, 2026

Photo: Bumida ang Philippine Team sa 2027 AFC U17 Asian Cup Qualifiers Grupo A sa 2-1 tagumpay sa Cambodia. (ASEANFootball) 

Laro sa Miyerkules - Thuwunna

4:30 PM Pilipinas vs. Indonesia

Niyanig ng Philippine Team ang unang araw ng 2027 AFC U17 Asian Cup Qualifiers Grupo A sa 2-1 tagumpay sa Cambodia sa Starcity Sports Club Stadium sa Thanlyin, Myanmar. Ipinasok ni forward Kai Muller ang nagpapanalong goal sa ika-69 minuto.

Si Muller din ang nagtala ng unang goal sa ika-39. Nagawang itabla ng Cambodia ang laban sa 1-1 matapos ang goal ni forward Long Bich sa idinagdag na isang minuto matapos ang takdang unang 45.

Susunod para sa Pilipinas ang Indonesia ngayong Miyerkules sa mas malaking Thuwunna Stadium sa Yangon. Tinalo ng Afghanistan ang Indonesia, 4-1, sa likod ng hat trick o tatlong goal ni Mohammad Fahim Hammas kasabay ng panalo ng mga Pinoy.

Ang iba pang laro ng Pilipinas ay kontra host Myanmar sa Nob. 14 at Afghanistan sa 20. Tanging ang numero uno lang sa grupo ang tutuloy sa torneo mula Mayo 12 hanggang 29, 2027 sa Uzbekistan.

Samantala, maghahain ng apela ang Philippine Football Federation sa AFC para sa ipinataw na suspensiyon sa bansa bunga ng biglaang pag-atras sa 2027 AFC U20 Asian Cup Qualifiers noong Agosto 31 hanggang Set. 6, 2026 sa Kyrgyzstan. Dahil dito, hindi makakalahok ang Pilipinas sa 2029 U20 Qualifier na maaaring pagbidahan ng mga kasalukuyang U17.

Nagpaliwanag ang PFF na umatras sila dahil nakatutok noon sa makasaysayang pagbabalik ng bansa sa Aichi-Nagoya Asian Games.

Filipinas U17, 3rd time qualified sa Asian Cup

ni Anthony Servinio @Sports | October 13, 2026

Photo: Makasaysayan ang ikatlong beses na pagpasok sa AFC U17 Women's Asian Cup ng mga batang Filipina booters. (Phlfootball) 

Pasok na sa pangatlong sunod na pagkakataon ang Philippine Team sa AFC U17 Women's Asian Cup China 2027. Binigo ng mga Batang Filipinas ang Bangladesh, 3-0, at walisin ang Grupo H ng qualifiers sa Do'stlik Stadium sa Uzbekistan.

Bunga ng 2-0 panalo ng Bangladesh sa host Uzbekistan, sapat ang tabla para itulak ang mga Pinay subalit naniguro na sila. Papunta na sa tabla at inabot ng ika-70 minuto bago nahanap ni defender Maya Rose Bascara ang goal.

Matapos niyan ay bumira ng dalawang pandiin na goal si Noelle Granger sa ika-90 at 91 bago pumito ang reperi para wakasan ang laban. Umakyat sa lima ang kanyang goal kasama ang tatlo sa 4-0 tagumpay sa Uzbekistan noong Oktubre 5 sa parehong palaruan.

Maliban sa Pilipinas, pasok din sa Asian Cup ang mga kampeon sa ibang mga grupo na Timog Korea, Vietnam, Indonesia, Chinese-Taipei, India, Thailand at Myanmar.

Sasamahan nila ang defending champion Hilagang Korea, Japan, Australia at host Tsina.

Ang U17 Asian Cup ay tatakbo mula Marso 31 hanggang Abril 17. Ang unang apat ay kakatawanin ang Asya sa FIFA U17 Women's World Cup Morocco 2027.

Magkikita muli ang mga bansa sa Oktubre 14, petsa sa Pilipinas. Bahagi ito ng paghahanda ng Filipinas para sa FIFA Women's World Cup Brazil 2027.

Bigating Pinay futbolera pangako ang higit na 5th place sa Asiad

by Anthony Servinio @Sports News | September 10, 2026

Mga larawan: Si Hali Long, ang 2025-26 Futbolera of the Year ng Philippine Women's Football Association, tinatanggap ang parangal sa nagwagi noong nakaraang taon Dionesa Tolentin. (A. Servinio)

Positibong enerhiya ang umaapaw matapos ang matagumpay na kampo ng Philippine Women's Football Team para sa Aichi-Nagoya Asian Games. Aalis ngayong Biyernes ang pambansang koponan at puntiryang higitan ang pagiging ika-lima sa Hangzhou 2022.

Buo na ang Filipinas maliban kay Jackie Sawicki at Leah Bradley na tutungo agad sa Japan. Dahil hindi sakop ng kalendaryo ng FIFA, hindi obligado ang mga club na ipahiram ang kanilang mga manlalaro subalit may kabutihang nakikita si Coach Mark Torcaso.

Ang Hangzhou ang unang opisyal na torneo ni Coach Torcaso at inamin niya na naninibago siya sa sistema na ituturo sa koponan at sa kabuuang kultura ng Football sa bansa.

Ang pagliban ng ilang beterana ay nagbukas ng puwang para masubukan ang ilang mga kabataan para sa ultimong layunin na FIFA Women's World Cup Brazil 2027. Sa kasamaang palad, ilan sa naunang inihayag na listahan ay kinailangang lumiban pangunahin si Angie Beard na napilay. Ilalabas ang huling listahan bago ang unang laro kontra Uzbekistan sa Setyembre 14.

Noong Huwebes ay nagdaos ang Filipinas ng pampublikong ensayo na sinundan ng pakikisalamuha sa kanilang mga tagahanga sa MOA Sky Football Field. Bilang bahagi ng programa, ginawaran si kapitana Hali Long bilang 2025-26 Futbolera of the Year ng Philippine Women's Football Association. Sina Long, Sawicki, Olivia McDaniel, Katrina Guillou, Reina Bonta, Sofia Harrison-Wunsch, Isabella Pasion at Kaya Hawkinson ang magbabalik mula Hangzhou 2022.

Sa gitna ng mga tinatamasang tagumpay ng Filipinas ay inulat ni Coach Torcaso na mas marami na ang naghayag ng nais na maglaro sa Filipinas at hindi siya magugulat kung aabot ng mahigit 50 ang mga kalahok sa mga kampo sa hinaharap.

Samantala, naniniwala si Coach Torcaso na mahusay ang ipapakita ng Men's Team. Hindi sabay ang araw ng laro ng mga babae at lalake kaya kukunin nila ang pagkakataon na suportahan ang mga kababayan.