Mensaheng despedida sa Women's Booters: mananalo ang koponan

ni Anthony E. Servinio @Sports | Jan. 9, 2025

Photo: Ang Philippine National Futsal Team na sasabak kontra Kuwait sa 2025 AFC Women’s Futsal Asian Cup Qualifier Grupo C. (A. Servinio)

Laro sa Sabado – Tashkent 9 PM Kuwait vs. Pilipinas

Mananalo ang Pilipinas sa 2025 AFC Women’s Futsal Asian Cup Qualifier Grupo C na magsisimula ngayong Sabado sa Yunusubod Sport Complex sa Tashkent, Uzbekistan. Iyan ang matapang na pahayag ni Philippine Football Federation (PFF) Presidente John Anthony Gutierrez sa despedida ng pambansang koponan noong Martes sa Makati City.

Pormal na ipinakilala ang koponan na pangungunahan ng mga beteranang sina Katrina Guillou at Isabella Flanigan. Ang iba pang mga kasapi ay sina Sheen Borres, Shelah Cadag, Alisha del Campo, Cathrine Graversen, Rocelle Mendano, Vrendelle Nuera, Regine Rebosura, Dionesa Tolentin at mga goalkeeper Samantha Hughes at Kayla Santiago.

Gagabayan sila ni Coach Rafa Merino na bitbit ang malawak na karanasan sa mga mataas na antas na koponan sa Espanya. Tutulungan siya nina Coach Mark Torcaso ng Filipinas Football, Ariston Bocalan, Albert Besa at trainer Oshin Aguilon.

Unang haharapin sa Sabado ng mga #59 Pinay ang #61 Kuwait na nag-iisang kalaro na mas mababa sa kanila sa FIFA Futsal Ranking. Susunod ang host at #18 Uzbekistan (Enero 13), #38 Turkmenistan (15) at walang ranggo subalit peligrosong Australia (19).

Ang unang dalawa buhat sa apat na grupo at ang may pinakamataas na kartada sa mga magtatapos ng pangatlo ay tutuloy sa torneo sa Tsina mula Mayo 7 hanggang 18.

Ang ginto, pilak at tanso ay papasok sa pinakaunang FIFA Women’s Futsal World Cup sa Pilipinas mula Nobyembre 21 hanggang Disyembre 7 sa Philsports Arena at Victorias City.

Nagdaos ng training camp ang PFF noong Pasko at Bagong Taon upang mabuo ang koponan. Dagdag ni Coach Merino na maganda ang ipinapakita ng koponan sa ensayo at malaki ang suporta ng pederasyon, mga bagay na tutulong na maabot ang kanilang puntirya sa Uzbekistan.

McDaniel tagapagligtas ng Stallion FC sa Women's Cup

ni Anthony E. Servinio @Sports | Dec. 11, 2024

Photo: Chandler McDaniel - Philippine Women's National Football Team, FB

Sumipa ng nag-iisang goal si Chandler McDaniel sa pangalawang minuto upang ihatid sa Stallion Laguna FC ang 2024 PFF Women’s Cup handog ng Coca-Cola laban sa Kaya FC Iloilo, 1-0, Lunes ng gabi sa Rizal Memorial Stadium.

Nakumpleto ang pagbawi ng mga bagong reyna mula sa 2023 PFF Women’s League kung saan wala silang ipinanalo sa siyam na laro. Nararapat lang na si McDaniel ang napiling Most Valuable Player. Naagaw niya ang bola at pinalipad ito mula 90 talampakan lampas sa tumalon na Kaya goalkeeper Inna Palacios.

Nag-uwi rin ng karangalan ang kanyang kakampi at ate Olivia McDaniel na Best Goalkeeper at Best Midfielder Katrina Wetherell. Napunta sa Kaya ang Best Scorer Julissa Cisneros sa kanyang kabuuang 11 goal at Best Defender Hali Long habang iginawad sa Tuloy FC ang Fair Play Award.

Nakamit ng Manila Digger FC ang pangatlong puwesto. Tumakbo ng isang buwan ang palaro tampok ang mga bituin ng Philippine Women’s National Team na ibinahagi sa anim na koponan.

Samantala, nabunot sa maituturing na “magaan” na Grupo A ang Philippine Men’s Football National Team para sa 2027 AFC Asian Cup Qualifiers Round 3 sa susunod na Marso. Makakaharap ng mga Pinoy Booters ang Tajikistan, Maldives at Timor Leste para sa isang tiket patungong torneo sa Saudi Arabia.

Iikot ang mga laro sa mga bansa at may tig-anim ang bawat koponan. Ang mga petsa ng mga laro sa Pilipinas ay Tajikistan (Hunyo 10), Timor Leste (Oktubre 14) at Maldives (Nobyembre 18) at dadalaw sa Maldives (Marso 25), Timor Leste (Oktubre 9) at Tajikistan (Marso 31, 2026). Matatandaan na nagwagi ang Pilipinas kontra Tajikistan, 2-1, sa Rizal Memorial noong Marso 27, 2018.

Kaya Iloilo positibo sa laban sa AFC League 2

ni Anthony E. Servinio @Sports | Nov. 28, 2024

Photo: KAYA Futbol Club - FB

Mga laro ngayong Huwebes

6 PM Jeonbuk vs. Cebu (Jeonju)

8 PM Kaya vs. Sanfreece (Rizal Memorial)

Galing sa inspiradong resulta sa nakaraang laro, bitbit ng Kaya FC Iloilo ng Philippines Football League ang positibong enerhiya sa pagsalubong sa bisitang Sanfreece Hiroshima ng Japan sa pagpapatuloy ng 2024-2025 AFC Champions League Two ngayong Huwebes sa Rizal Memorial Stadium.

Susubukan ng Kaya na sundan ang 2-1 tagumpay sa Eastern SC noong Nobyembre 7 ngunit magiging mas malaking hamon ang nangungunang koponang Hapon.

Bilang huling laro ng Kaya sa tahanan, maliban sa pagpapabuti ng pag-asa na makasingit sa playoffs ay gusto nilang makapagtala ng kahit isang magandang resulta sa harap ng mga kababayan.

Pantay sa tatlong puntos ang Kaya at Eastern at maaari pa nilang mahabol ang pumapangalawang Sydney FC ng Australia na may 6 na puntos habang ang Sanfreece ang nag-iisang kalahok na may perpekto 12 puntos sa apat na panalo.

Tinalo ng Sanfreece ang Kaya, 3-0, noong Setyembre 19 sa Hiroshima. Kasalukuyang pangalawa din sila sa J League na may 18 panalo, 11 tabla at pitong talo. Sasandal muli ang Kaya sa husay nina Daizo Horikoshi at beterano Robert Lopez Mendy na malaki ang papel sa panalo sa Eastern.

Mamimili si Coach Yu Hoshide kay Walid Birrou o Patrick Deyto para sa mahalagang posisyon ng goalkeeper. Samantala, lumakbay ang Dynamic Herb Cebu para harapin ng Jeonbuk Hyundai ng Timog Korea sa Jeonju.

Mabigat na paborito ang mga Koreano na ulitin ang 6-0 panalo sa Gentle Giants noong Setyembre 19 sa Rizal Memorial. Kasalukuyang numero uno ang Jeonbuk sa Grupo H na may siyam na puntos buhat sa tatlong panalo at isang talo.