Espanya sa ika-2 korona ng FIFA, Argentina sinawi

ni Elyssa Nichole @Sports | July 21, 2026

Photo:

Isinipa ni reserba Ferran Torres ang nag-iisang goal sa makapigil-hiningang 1-0 panalo ng Espanya laban sa defending champion Argentina at makamit ang FIFA World Cup 2026 kahapon sa harap ng mahigit 80,000 sa MetLife Stadium sa East Rutherford, New Jersey kahapon. Ito ang pangalawang kampeonato ng mga Kastila matapos ang una noong 2010.

Kasisimula pa lang ng pangalawang 15 minuto ng extra time, ipinasa ni Pedro Porro ang bola kay Nico Williams na nakatayo malapit sa goal. Lalampas na ang bola sa linya kaya ibinigay niya ito sa umaatakeng si Torres para makabutas sa ika-106.

Tinanggap ng mga Kastila ang tropeo at mga medalya mula kay Pangulong Donald Trump at FIFA President Gianni Infantino. Napiling Golden Ball o MVP si La Roja kapitan Rodri habang Best Young Player ang 19-anyos na si Cubarsi at Golden Glove o Best Goalkeeper si Unai Simon na isa lang ang pinalusot sa buong torneo laban sa Belgium noong quarterfinals.

May konsuwelo na Silver Ball si Argentina kapitan Leo Messi na maaaring nilaro ang huling World Cup sa edad 39. Bronze Ball si Kylian Mbappe ng Pransiya na inuwi rin ang pangalawang sunod na Golden Ball o pinakamaraming goal na 10 matapos ang walo noong Qatar 2022.

May apat na taon na ang La Roja para maghanda at sa Espanya gaganapin ang World Cup 2030 kung saan co-host din ang Portugal at Morocco. Dahil ito rin ang unang siglo ng torneo, may panukala ang FIFA na palakihin lalo ito sa 64 bansa kaya may tsansang makalahok sa unang World Cup ang Pilipinas. 

Canada unang pumasok sa knockout playoffs ng FIFA

ni Anthony E. Servinio @Sports | June 30, 2026

Photo: Makasaysayan ang kauna-unahang knockout win ng Canada laban sa South Africa sa FIFA World Cup 2026  kung saan pinabagsak ang Africans tungo sa Round-of-16.   

Laro ngayong Martes

1 AM Brazil vs. Japan

4:30 AM Alemanya vs. Paraguay

9 AM Netherlands vs. Morocco 

Sumandal ang co-host Canada sa makapigil-hiningang goal ni Stephen Eustaquio at pauwiin ang Timog Aprika, 1-0, sa simula ng knockout playoffs ng FIFA World Cup 2026 sa SoFi Stadium sa Inglewood, California. 

Mula 48 ay 31 koponan na lang ang naiiwan sa pinakamalaking palaro sa buong mundo.

Walang iskor at nagbabanta ang dagdag 30 minuto, bumira si Eustaquio mula 30 talampakan sa ika-92 minuto at walang nagawa ang depensa. Masikat ang resulta para sa Springboks dahil nasa sa kanila ang bola 55% ng panahon subalit kalidad ang atake ng Canada oras na napunta ang bola sa kanila at sumipa ng 12 beses kung saan pito ay muntikan na.

Susunod para sa Canada ang mananaig sa pagitan ng Netherlands at Morocco ngayong araw sa Estadio BBVA sa co-host Mexico. Ang laro ng Canada sa Round-of-16 ay sa Linggo sa NRG Stadium sa Houston, Texas. Ilan sa mga aabangan pang laro sa Round of 32 ay ang paboritong  Brazil laban sa Japan ngayong araw sa NRG. Lalabanan ng co-host Estados Unidos laban sa Bosnia at Herzegovina sa Hulyo 2 sa Levi's Stadium sa Santa Clara, California.

Filipinas shoot na sa World Cup Brazil 2027

ni Anthony E. Servinio @Sports | March 20, 2026

Photo: Si Head Coach Mark Torcaso at Player of the Match Jael Guy, matapos ang 2-0 victory kontra Uzbekistan - The Philippine Football Federation / Philippine Women's National Football Team

Laro ngayong Sabado - Accor Stadium

5 PM Australia vs. Japan (Finals)

Brazil, parating na ang Filipinas! Nakamit ng Philippine Football Team ang tiket sa FIFA Women's World Cup Brazil 2027 sa bisa ng 2-0 panalo sa Uzbekistan kahapon sa Cbus Super Stadium ng Gold Coast sa Queensland, Australia. 

Inihatid nina Angie Beard sa ika-48 at Jackie Sawicki sa ika-53 minuto ang mga nagpapanalong goal. Pareho itong galing sa mga matalas na pasa ni Jael-Marie Guy.

Nagbunga ang pasensiya ni Beard na naudlot ang dalawang muntikan na goal sa unang 45 minuto na nagwakas sa 0-0. Sinubukan din nina Chandler McDaniel, Sofía Harrison-Wunsch, Sara Eggesvik at Guy subalit matatag ang depensa ng Uzbekistan bago ito tuluyang gumuho.

Ito ang pangalawang sunod na pagsabak ng Filipinas sa World Cup matapos ang makasaysayang 2023 sa Aotearoa New Zealand at Australia. Ang 2027 edisyon ay tatakbo mula Hunyo 24 hanggang Hulyo 25 sa walong palaruan kasama ang higanteng Maracana Stadium na kaya ang 73,000 tagahanga.

Maliban sa Pilipinas, pasok na rin sa World Cup ang mga nasa semifinals na Australia, Tsina, Japan at Timog Korea habang pinaglalabanan pa ng Hilagang Korea at Chinese-Taipei ang huling upuan kagabi. Ang mabibigo ay sasamahan ang Uzbekistan sa Inter-Confederation Playoffs sa Nobyembre laban sa mga kinatawan ng Europa, Aprika, Oceania at Hilaga at Timog Amerika para sa huling tatlong tiket at mabuo ang 32 kalahok.

Maliban sa World Cup, ang pagpasok ng Filipinas ay tumiyak ng kanilang paglahok sa Asian Qualifiers para sa Los Angeles 2028 Olympics.