Ivermectin kontra-ASF, tetestingin

ni Lolet Abania | May 4, 2021

Bumuo ang Department of Agriculture (DA) ng isang research team upang alamin ang potensiyal na maaaring ibigay ng antiparasitic drug na Ivermectin para maiwasan at makontrol ang pagkalat ng African swine fever (ASF).

Sa isang Special Order No. 310, series of 2021, na may petsang April 30, 2021, iniutos ni DA Secretary William Dar na magtatag ng isang research team kung saan tututok sa ASF control and prevention upang maresolbahan ang krisis sa nasabing sakit.

“The research team is tasked to prepare research proposals on the use of Ivermectin, ASF Buster, Cloud Feed and other potential products for the control and prevention of ASF,” ayon sa inilabas na special order ng DA.

“The team is also directed to conduct preliminary field trials of Ivermectin and other agents to produce science-based evidence in support to control and prevention programs of ASF,” dagdag pa ng DA.

Binubuo ang team ng mga technical advisers, kabilang na sina DA Undersecretary William Medrano, National Livestock Program Director Dr. Ruth Miclat-Sonaco, at Bureau of Animal Industry (BAI) officer-in-charge Director Dr. Reildrin Morales.

Inilagay din bilang program leader si BAI OIC-Assistant Director Dr. Rene Santiago habang si Philippine Carabao Center OIC-Deputy Executive Director for Production and Research Dr. Claro Mingala ay assistant program leader.

Ang mga project leaders naman ng research team ay sina National Dairy Authority Deputy Administrator Dr. Farrel Benjelix Magtoto, Pampanga State Agricultural University Associate Professor Dr. Rogelio Carandang, Jr., at BAI Livestock Research and Development Division chief Dr. Marivic de Vera.

Nakasaad pa sa special order na inaatasan ang research team, “to formulate and draft science-based policies for National Guidelines in using Ivermectin and other agents in the control and prevention programs of ASF and collaborate with international research and institution to conduct experiments to support claims in the use of Ivermectin and other agents.”

Matatandaang nagbigay ng matinding atensiyon sa publiko ang Ivermectin dahil sa sinasabing magagamit itong gamot kontra-COVID-19.

Gayunman, hindi pa aprubado ng Food and Drug Administration (FDA) ang pag-inom ng tinatawag na human-grade Ivermectin sa Pilipinas. Ayon sa batas, ang Ivermectin ay maaari lamang i-prescribe sa mga hayop.

Subali't, ang FDA ay nagbigay na ng compassionate use permit para sa paggamit ng Ivermectin sa mga tao laban sa COVID-19 sa limang ospital.

Ayon naman sa FDA, ang pag-isyu nila ng compassionate use permit ay hindi nangangahulugan na ginagarantiya ng ahensiya ang safety at efficacy nito, bagkus, pinayagan lamang nila ito para sa legal administration ng gamot sa bansa.

Samantala, ang resulta ng clinical trials ng Ivermectin bilang treatment sa COVID-19 ng Department of Science and Technology (DOST) ay posibleng lumabas sa Enero 2022.

'Pinas, gagawing testingan ng gamot ng South Korea kontra-COVID

ni Mary Gutierrez Almirañez | April 12, 2021

Gaganapin sa ‘Pinas ang clinical trial ng bakunang EuCorVac-19 na gawa ng South Korea upang labanan ang lumalaganap na COVID-19 pandemic, ayon sa Glovax Biotech Corporation ngayong araw, Abril 12.

Ayon kay CEO Giovanni Alingog, “The reason we wanted to do a clinical trial in the Philippines is most of the companies that were given EUA (emergency use authorization) in our country have not done a clinical trial locally. The reason we wanted to trial locally is to show, for ethnicity purposes, for Filipinos, that the vaccine is also effective and safe.”

Ngayong Abril ay nakatakdang isagawa ang combined phase 1 at phase 2 trial ng EuCorVac-19.

Batay pa sa pag-aaral, nagtataglay ito ng 91% hanggang 95% na efficacy rate.

Dagdag ni Alingog, “Because of the emergency purposes or the need of vaccine, we are asking the clinical research organizations and our FDA (Food and Drug Administration) to fast-track a bit our clinical trial so we can serve the Filipino people with a quality and safe vaccine from Korea.”

Samantala, iginiit naman ni Department of Health (DOH) Secretary Francisco Duque III na nakikipagtulungan na rin ang Glovax sa Department of Science and Technology (DOST) upang makapag-develop ang ‘Pinas ng sariling bakuna kontra COVID-19.

Sa ngayon, ang may emergency use authorization (EUA) pa lang na bakuna ay ang Pfizer-BioNTech, AstraZeneca, CoronaVac ng Sinovac, at ang Sputnik V ng Gamaleya Institute.

Lip at cheek tint na dahilan ng organ failure, pinangalanan ng FDA

ni Lolet Abania | March 17, 2021

Nagbabala ang Food and Drug Administration (FDA) sa publiko tungkol sa pagbili at paggamit ng Ever Bilena's EB Lip & Cheek Stain Night Berry dahil sa naglalaman umano ito ng sobrang microbial contaminants na mapanganib sa kalusugan.

Sa advisory na inilabas ng FDA, base sa isinagawa nilang test, ang dami ng microbial contaminants na mayroon ang nasabing produkto ay higit sa 1000 cfu/g na itinatakdang limit ng ahensiya.

"And as published in the ASEAN Cosmetic Directive (ACD)," nakasaad pa sa advisory, "the aforementioned adulterated product is found to be non-compliant with the existing standards, and, thus, pose potential hazards to the consuming public," ayon sa FDA.

"The use of adulterated cosmetic products may result to adverse reactions, including but not limited to, skin irritation, itchiness, anaplylactic shock and organ failure," sabi ng FDA.

Sa isang statement naman na nai-post sa Twitter ng Ever Bilena, ayon sa kumpanya, nagsasagawa na rin sila ng kanilang internal testing upang i-validate ang lumabas na pagsusuri ng FDA habang anila, "results should be out in 7 days."

"Simultaneously, we are also engaging with a 3rd party lab for their findings," ayon pa sa kumpanya. Gayundin, sinabi ng Ever Bilena company na ang apektado lamang na produkto sa FDA advisory ay ang batch #19A03QW ng Lip & Cheek Stain Night Berry variant.

"We would like to inform everyone that all of our products go through quality control before they are go signaled for distribution to the market," sabi pa ng kumpanya.

Ayon pa sa Ever Bilena, ang kanilang mga produkto ay napasailalim sa microbial testing bago ito inilabas sa mga pamilihan habang sinisiguro rin nila sa publiko, "[e]verything released from warehouse are FDA compliant."