P20K-P30K multa at kulong — DILG... Paggamit ng ilegal na paputok, bawal

ni Lolet Abania | December 28, 2021

Naglabas ng direktiba ang Department of the Interior and Local Government (DILG) ngayong Martes sa lahat ng local government units (LGUs) at mga ahensiya ng gobyerno na gumawa ng aksiyon laban sa paggamit ng ilegal na mga firecrackers o paputok at indiscriminate firing para sa nalalapit na selebrasyon ng Bagong Taon.

Sa isang statement, sinabi ni DILG Secretary Eduardo Año na dapat tiyakin ng Philippine National Police (PNP), Bureau of Fire Protection (BFP), at LGUs na ang publiko ay sumusunod hinggil sa panuntunan na ipinatutupad sa mga paputok.

“Inaatasan ko ang PNP na doblehin ang pagmomonitor at pag-iinspeksyon para siguruhing hindi kakalat sa merkado at walang gagamit o madidisgrasya sa ilegal na paputok,” giit ni Año.

Ayon kay Año, ang PNP at LGUs, ang may responsibilidad na magpatupad ng mga national at local policies tungkol sa mga paputok upang maiwasan ang anumang disgrasya at mga insidente ng sunog.

Inatasan na rin ng kalihim ang PNP na arestuhin ang sinumang lalabag sa regulasyon sa mga firecrackers. May multang P20,000 hanggang P30,000, anim na buwan hanggang isang taon na pagkakulong, kanselasyon ng lisensiya at business permit, at pagkumpiska sa mga inventory stocks ang kanilang ipapatupad laban sa mga violators.

Nagbabala rin si Año laban sa paggamit ng mga firearms o baril para salubungin ang Bagong Taon.

“The DILG will not tolerate the use of firearms in welcoming the New Year. We will apply the full force of the law against those that will fire their firearms during the New Year.

Let’s welcome the New Year with clean hands and clean hearts,” sabi ni Año.

Tiniyak naman ng opisyal sa publiko na papanagutin at papatawan ng kaukulang parusa ng mga awtoridad ang sinumang mahuhuling nagsagawa ng indiscriminate shooting o walang habas na pagpapaputok ng baril.

Samantala, sa isang interview kay BFP spokesperson Fire Superintendent Annalee Carbajal-Atienza, sinabi nitong nagsasagawa sila ng kampanya laban sa paggamit ng ilegal na paputok.

“Ang ating pong mga firetrucks, ating kabomberuhan ay nag-iikot sa mga barangay and doing rekorida, pag-aanunsiyo at pagpapaalala,” ani Carbajal-Atienza.

Pinayuhan naman ng opisyal ang publiko na manood na lamang ng mga fireworks display sa mga inilaang lugar na inorganisa ng kanilang LGUs.

Sa ngayon, ayon kay Carbajal-Atienza wala pang iniulat na insidente ng sunog sanhi ng mga paputok.

Total ban ng paputok sa Pasko’t Bagong Taon — P-Du30

ni Thea Janica Teh | December 8, 2020

Nagbabala na si Pangulong Rodrigo Duterte na maaari na nitong ipagbawal ang paggamit ng mga paputok at pyrotechnics sa Pilipinas tuwing Kapaskuhan at Bagong Taon.

Sa public briefing nitong Lunes, sinabi ni P-Duterte na delikado ang paggamit ng mga paputok at ito na rin umano ang paraan upang mapanatili ang kaligtasan at kalusugan ng publiko.

Aniya, “By mid-year, I may issue the necessary documents banning totally, totally banning paputok.” Ibinahagi rin ni P-Duterte na noong mayor pa lamang siya sa Davao City ay ipinagbawal na rin nito ang paggamit ng paputok.

"Kagaya sa amin, sa amin maganda man. New Year, Pasko, we celebrate it with the family. May music, lahat na. Gaiety and all. Walang nasusugatan, walang namamatay," dagdag niya.

Samantala, binalaan din ni P-Duterte ang mga pulis, militar at civilian, may lisensiya man o wala, na huwag gumamit ng baril bilang paputok. "Kapag nahuli ka dito sa pagpaputok mo...papahirapan kita.

Kung sa New Year ka magpapaputok... papahirapan kita. Sabihin ko sa mga pulis, 'wag n'yong linisin mga kubeta n'yo sa preso...' wag n'yo linisin sa Pasko pati New Year.' Kasi diyan ko ipasok 'yung mga 'yan. That's an order. Do not clean," sabi ni P-Duterte.

Noong nakaraang taon, ibinahagi ng Department of Health na bumaba ng 35% ang mga nadisgrasya dahil sa paputok.