Matapos mabakunahan kontra-COVID-19... Walang naitalang adverse effects sa mga kabataan — FDA

ni Lolet Abania | November 14, 2021

Ipinahayag ng Food and Drug Administration (FDA) na sa ngayon ay wala pang nai-report na adverse reactions sa mga kabataang edad 12 hanggang 17 na nakatanggap na ng kanilang first dose ng COVID-19 vaccine.

Ayon kay FDA Director General Eric Domingo, ilan sa mga bata lamang, siyam dito na naturukan ng Pfizer vaccine at isa na nabigyan ng Moderna, ang nagkaroon ng allergies at nakaranas ng hyperventilation at post-vaccination body pain subalit aniya, gumaling din kinabukasan.

Kasalukuyang inaprubahan pa lamang ng FDA ang Pfizer at Moderna COVID-19 vaccines para sa mga minors na edad 12 hanggang 17.

“So far, ‘yung monitoring natin, siguro mga 400,000 na ‘yung nabakunahan na mga bata, wala naman tayong nakikita na adverse events na grabe, na talaga pong nagkaron ng problema,” sabi ni Domingo sa isang interview ngayong Linggo.

Paliwanag ni Domingo, ang mga menor-de-edad na wala naman ng tinatawag na underlying conditions ay hindi na kailangang magprisinta ng medical certificates mula sa kanilang mga doktor bago bakunahan, maliban sa mga kabataang may comorbidities.

“Hindi naman kailangan ng medical certificate para magpabakuna ng bata aged 12-17. Basta walang sakit at pupunta sa vaccination centers, puwede naman bakunahan,” sabi ni Domingo.

Matatandaang sinimulan ng gobyerno ang pediatric inoculation program noong Oktubre 15 para sa mga may comorbidities, at nitong Nobyembre 3 naman para sa lahat ng minors na nasa edad 12 hanggang 17.

Batay sa datos ng gobyerno, mayroong 12.7 milyong kabataan na nasa edad 12 hanggang 17 sa bansa, kung saan 1.2 milyon dito ay may comorbidities.

Target ng pamahalaan na makapagbakuna kontra-COVID-19 ng 80% o tinatayang 10 milyong menor-de-edad ng hanggang Disyembre 2021.

Pagbabakuna sa edad 5-11... Pfizer EUA, hinihintay na ng FDA — DOH

ni Lolet Abania | November 12, 2021

Inaasahan ng Food and Drug Administration (FDA) na magsusumite na ang Pfizer ng kanilang aplikasyon para sa emergency use authorization (EUA) sa pagbabakuna kontra-COVID-19 sa edad 5 hanggang 11, ayon sa Department of Health.

Sinabi ni DOH Undersecretary Maria Rosario Vergeire na wala pang manufacturer na nag-a-apply ng isang EUA para sa COVID-19 vaccination ng naturang age group sa bansa.

“Ang sabi ng Food and Drug Administration, they are expecting submission already from Pfizer kasi sa US FDA naaprubahan na siya,” ani Vergeire sa isang media briefing.

“Usually daw, apparently, according to FDA, pagka nakakakuha na ng emergency use authority sa US, ang manufacturers ay agad-agad nagsu-sumite sa ibang bansa ng kanilang application,” paliwanag ni Vergeire.

Nitong Oktubre, inawtorisa na ng US FDA ang Pfizer Inc. at BioNTech SE coronavirus vaccine para sa pagbabakuna ng mga menor-de-edad na 5 hanggang 11-anyos, kung saan ito ang kauna-unahang COVID-19 shot para sa mga mas bata sa United States.

Gayunman, ayon kay Vergeire, hihintayin nila ang ebalwasyon at ang issuance ng EUA mula sa FDA.

“Lagi naman, ano, kapag tayo ay nagbabago ng age group o may idinadagdag na age group doon sa mga puwedeng bakunahan with a specific brand of vaccine, kailangan natin antayin ‘yung emergency use authority,” sabi ng opisyal.

Galing sa China at Malaysia... P600K ‘di rehistradong mantika, nakumpiska

ni Lolet Abania | November 6, 2021

Tinatayang nasa P600,000 halaga ng hindi rehistrado na imported na mantika ang nakumpiska ng mga awtoridad sa San Fernando, Pampanga.

Ang mga gallon ng palm oil na sinasabing mula sa China at Malaysia ay natagpuan na naka-stock sa isang warehouse.

Napag-alaman na ibinibenta umano ang mga naturang produkto sa ilang palengke, kahit pa hindi ito rehistrado mula sa Food and Drug Administration (FDA).

Gayunman, ang caretaker ng warehouse ay inaresto na ng mga awtoridad. Subalit, itinanggi naman nito at sinabing hindi niya alam na ang mga produkto ay unregistered sa FDA.